Cha Pita kairai roiy Jerusalem row bo arao ero
11
Ta aposel awei aro kebilip kekepi tintin vere distrik Judia kerivo veka,
aro via yiave Juda yei minyiao awirai ya God-a keko ta kebilip.
2 Ya taim Cha Pita kakoi mataimon pako Jerusalem,
ya kopei yei disaipel inyia pa kepikeo pasin vou tao va nyioro ero,
ketoivia.
3 Ya kyirai poa veka,
“Mema kanomi oꞌro yei aro via tao va yioro ta kakemi aokorom-a kamamiy.”a
4 Ya kopei Cha Pita awirai-ya kaveroro roiy ao mowmow okamap roa ero.
Kairai veka,
5 “Kakeni mataimon Jopa beten-a kanao,
ta ao va raꞌa kana pirikeo veka kanayiyo.
Ao en kana pirikeo korao veka no pako raꞌa koraro uteno nake.
Ao ovu kyiavopiu kona 4-pla vou ya kerokoperi koraro iu bo ve aron em.
6 Kanaoroꞌnonow revo ya kuro vou no em,
kana pirikere aomeꞌe kom 4-pla ererinyia ero,
ta aomeꞌe ererin row riꞌi ta rere ruꞌu minyiao.
7 Ya kanarivo poko raꞌa kuirai rona veka,
‘Ma Pita!
Nama variko aomeꞌe naimyere ya nama.’
8 “Ya kanairai veka,
‘Baun ben,
Biapako.
Nena ao voro via oniniu iu ine mema ta ine konana rarimi via kuinyia iu nema vai.
Lo memi kuirai veka ao en keretaipere.’
9 “Ta poko raꞌa kwei koraro heven,
tare kuirai rona veka,
‘Ao va God-a kararerare kereniniu ven,
via namairai veka keretaipo vai.’
10 Ao en kokamap 3-pla taim ya kopei kwatikeko varu heven.
11 “Taim emo,
beiyo 3-pla vou mataimon Sisaria,
Cha Kornilius kasalim yei kekape revo oꞌro aken em.
12 Holi Spirit-a kairairona nanoninoiy,
via nonina.
Ya raꞌai 6-pla ve kekapepona ya awei kanoni oꞌro aꞌari ya Cha Kornilius.
13 Ya Cha Kornilius kairai romi veka ensel-a kapirikeiya karoika iya oꞌro aꞌari yaꞌa ta kairai roa veka,
‘Beiyo nama salim yei nenopi mataimon Jopa nyiorenanaka Cha Saimon,
awoꞌo raꞌa keipinaka Cha Pita.
14 Bia emo keta awirai-ya konakai roma.
Awirai ve keta nairai roma,
kokepi kopu neman revo iu ine ya God awei aro mowmow kekepi oꞌro mema.’
15 “Kopei taim kanavariko a va inyia kairai,
Holi Spirit-a kararotai veka tija kararo imi ero.
16 Ya kopei ova kana kinaoko varu awirai Biapako airai ero.
Kairai veka,
‘Cha Jon pii kanapon-a kabaptaisim yei aro bombiam,
kopei mopu keta baptais-a nopuko pow Holi Spirit.’
17 Tija kemibilip mova Yesus Krais ta God-a Holi Spirit-a karomi veka presen memi.
Ta mare presen ve God-a karoiy minyiao.
To nena bia bekaipe ta bo ya God-a kanake nanaonaniu?”
18 Taim awirai ya Cha Pita kerivo,
ya via ova ekinao ke a va nyirai warapoa vova vai.
Ya awoꞌo ya God-a kyiavoko kyirai veka,
“Mare kemi pirikeo veka God-a karin aro via yiave Juda,
riꞌi va kerovoru ya laip vou nekepi toratora keko.”
Aro bombiam yei Antiok awoꞌo Kristen-a keko
19 Taim ve kepyeiya Cha Stiven karai ya kopei pasin taipo kepao poiy toro aro bombiam ve kebilip pova Yesus.
Ya mowmow yei kevereko ya kepepe tintin.
Ovu yei kenopi distrik Fonisia,
ovu yei kenopi kekepi mataimon Antiok,
ya ovu kenopi kekepi ailan Saiprus ya awirai ya Yesus-a kyirirai poiy Juda unake.
20 Ta yei aro ebilip pova Yesus ero,
ovu yei kekape ailan Saiprus ta mataimon Sairini.
Aro ve kenopi Antiok ya awirai neman ya Biapako Yesus-a kyirirai poiy Grik minyiao.
21 Kupuana ya Biapako koraro kuinyia iꞌiy ta aro bombiam mowmow kebilip ya kerovoru kekape piya Biapako.
22 Aro bombiam vou sios ekepi Jerusalem awirai ve kerivo,
ya kesalim yaꞌa Cha Barnabas kanoi Antiok.
23 Taim kanoi kareiki Antiok,
ya kapirikeo veka God-a kamarimari roiy ta karao roiy revo.
Ya Cha Barnabas ova korova ya awirai kupuana karoiy ke riꞌi yei nuinyia nokupuana rova Biapako unake.
24 Cha Barnabas,
yaꞌa bia neman,
ro va kare row Holi Spirit ta bilip yaꞌa kokupuana.
Ta aro bombiam mowmow kebilip ya kekape piya Biapako.
25 Ya kopei Cha Barnabas kanoi Tarsus ke naorenanaꞌka Cha Sol.
26 Ya taim kapirikeiya Cha Sol,
kako yaꞌa kanoi varu mataimon Antiok.
Korao veka ta ainini moike raꞌa ero,
Cha Barnabas eri Cha Sol kerai kepipiy aro bombiam koka vou sios yei Antiok,
ya skul-a kerepoiy konoi kuinyia iu ainini moike raꞌa.
Mataimon Antiok aro ve kebilip pova Yesus ero,
awoꞌo Kristen-a keko ven ato.
27 Taim ve profet ovu kepepeo mataimon pako Jerusalem ta keparo Antiok.
28 Raꞌa yei profet awoꞌo yaꞌa Cha Agabus,
kavariko karoi row kupuana ya Holi Spirit ya kairirai veka,
boko mowmow vou kantri Rom,
taim vou aokorom-a keta nowaunrei.
(Ao en korereka iꞌiy taim Cha Sisar Klodius kakei veka king yei Rom.)
29 Kopei Kristen moike moike ve awirai ya Cha Agabus kerivo,
ya to va kyirai minyiao ke ketao va nesalim poiy Kristen ekepi Judia.
Ya Kristen ve ketao va kepoiy kuinyia iu mak yei nepoiy ero.
30 Ao en kepao ya ketao va keupoa Cha Barnabas eri Cha Sol keraiko kerai nopi poiy hetman yei aro bombiam vou sios.