Ensel-a kakai iya Cha Kornilius ya awirai-ya kairai roa
10
Beiyo raꞌa kakei mataimon Sisaria,
awoꞌo yaꞌa Cha Kornilius.
Bia emo,
yaꞌa kepten yei 100 soldia yei Rom,
keipinai veka,
“Aro soldia yei kantri Itali.”
2 Kepten ve awei aro famili yaꞌa ta pasin neman God-a karererow ero kepao.
Awei aro yaꞌa kekepi oꞌro yaꞌa ero,
inyia kepia kepiroko God.
Bia emo inyia beten-a karao roa God,
ta ao ipin-a kawani roiy aro ao va owaunrei ero.
3 Umo raꞌa,
korao veka 3 kilok bariri ta ao va kapirikeo revo vatiron veka kayiyo.
Kapirikeo ensel raꞌa ya God-a kakai iya oꞌro aꞌari ya kairai roa veka,
“Ma Kornilius!”
4 Cha Kornilius katorotoro keiya ta kariri,
ya kairai veka,
“Biapako,
to arape?”
Ya ensel-a kairai roa veka,
“Beten mema,
ta ao voro inyia amoiy beiyo ero koneman veka ofa,
God-a kapirikeo ven ta ova kakinao roma.
5 Mare aro ovu namairai moiy nenopi mataimon Jopa ke nyirai poa Cha Saimon,
awoꞌo raꞌa keipinaka Cha Pita,
ke nakai.
6 Bia emo kakei oꞌro ya Cha Saimon raꞌa,
bo va ta karao rore tao rere ao meꞌe maramara veka bulmakau.
Oꞌro yaꞌa kuinyia row nao ika.”
7 Ensel-a a va kairai roa ven Cha Kornilius,
ya karereiya kanoi.
Ya kopei Cha Kornilius riepin yei wokboi yaꞌa,
ta soldia moikera kairiy kekape.
Soldia ve inyia pa karikeo pasin neman ya God.
Umumoka inyia kakei iya revo Cha Kornilius.
8 Cha Kornilius awirai-ya kairai roiy revo row ao mowmow ensel-a airai roiy ero,
ya kairai roiy kenopi mataimon Jopa.
Cha Pita ao en kapirikeo veka kayiyo
9 Kyiute kenopi ya kopei uri vou,
kokaku iu 12 kilok,
ya kerepika kakuke iu mataimon Jopa.
Ya Cha Pita kakoi kakeitawki oꞌro nake ke beten-a narao.
10 Cha Pita koraiyova ta karake aokorom-a raꞌa nara.
Ta aokorom-a baunke inyia kererao.
Ya ao va raꞌa kapirikeo veka kayiyo.
11 Kapirikeo uteno koruriki,
ya ao veka no pako raꞌa ao raꞌa koavo iu kona 4-pla vou ya korokoreri koraro meꞌri pika.
12 No pako em koraro nare aomeꞌe maramara veka,
aomeꞌe kom 4-pla ererinyia ero,
ta aomeꞌe ererin row riꞌi ta rere ruꞌu.
13 Ya kopei Cha Pita karivo poko raꞌa kuirai roa veka,
“Ma Pita!
Nama variko aomeꞌe ve naimyere nama.”
14 Ya Cha Pita kairai veka,
“Baun ben,
Biapako.
Nena ao voro via ere niniu iu ine mema ta ine konana rarimi via nema vai.
Lo memi kuirai veka ao en keretaipo.”
15 Ya kopei poko em tare kuirai roa vova veka,
“Ao va God-a kararerare kereniniu via namairai veka via ere niniu vai.”
16 Ao en kokamap 3-pla taim,
ya kopei bererenki no pako em kokoi varu uteno.
17 Ya Cha Pita inyia kakei ova kakinakinao row ku vou ao voro kapirikeo veka kayiyo ero,
korao vekaipe.
Ya aro ve Cha Kornilius kasalim yei kekape ero ya kekamap ven.
Ta ketere poiy beiyo,
oꞌro ya Cha Saimon uinyia ro,
ya kekape keropi kamo.
18 Ya kyepi veka,
“Cha Saimon,
awoꞌo raꞌa keipinaka Cha Pita,
era kakei vai?”
19 Ya taim Cha Pita inyia kakinakinao row ao voro kapirikeo veka kayiyo ero,
ya Holi Spirit-a kairai roa veka,
“Ma Saimon!
Beiyo 3-pla kyiorenanama.
20 Nama variko namaro pika ya nanomi moiy.
Via ova nama kinakinao pako vai,
nena veku aro voro kanairai noiy ta kekape.”
21 Ya Cha Pita kararo iꞌiy beiyo 3-pla ya kairai roiy veka,
“To nena bia emo inyia koporenana evo.
To kokape arape nopao?”
22 Ya kyirai poa veka,
“Cha Kornilius,
kepten yei 100 soldia kairai romi ta kekame mima.
Bia emo,
yaꞌa bia neman ta inyia kariri roa God.
Yei aro Juda ta awoꞌo yaꞌa kyiavoko.
Ensel raꞌa ya God-a kairai roa nairima nanomi oꞌro yaꞌa ke awirai ovu narivo roma.”
23 Ya kopei Cha Pita kako yei kenopi oꞌro aꞌari ya kaorerariy,
ya roro kinyia piya.
Kopei uri roronai kavariko kanoi roiy,
ya aro ovu inyia kebilip pova Yesus kekepi mataimon Jopa minyiao kenopi poiy.
Cha Pita kanoi oꞌro ya Cha Kornilius
24 Kopei umo raꞌa vova,
ya kenopi kerepiki iu mataimon Sisaria.
Ta Cha Kornilius kakeikei,
ya kairiy aro noꞌo yaꞌa awei aro kura yaꞌa minyiao kekape kyiopokeo kekepikei.
25 Taim Cha Pita kakai oꞌro aꞌari ya Cha Kornilius,
Cha Kornilius kakai boratapo katureriyo iu kom ya Cha Pita ya lotu karao roa.
26 Ta ya Cha Pita kaiviako varu ya kairai roa veka,
“Nama variko!
Nena minyiao bia kanapo.”
27 Taim kerai ropi a va baunke inyia kerai yirai,
ya Cha Pita kanoi aꞌari ya kapirikei aro bombiam koka kyiopokeo ven oꞌro aꞌari.
28 Ya kairai roiy veka,
“Mopu veku kopu yarau ven veka lo memi Juda kuirai veka,
via kuinyia iu nenomi nerom nemarara o nenomi nekemi miy aro via yiave Juda.
Ta God-a kariritana veka,
via nanairai noa bia raꞌa veka via aniniu iu ine ya God.
29 Korao veka ya taim awirai-ya kanarivo veka koperepona,
tapara ve kakane evo.
Via a va anapana vai.
Ya kopei kanatere nopu,
to koipina kakane arape?”
30 Kopei Cha Kornilius kairai roa veka,
“Umo 4-pla konoiki ven taim kakeni oꞌro nena beten-a kanao,
taim veka mare vo,
3 kilok bariri.
Beten-a inyia kanao kopei bererenki bio raꞌa kana pirikeiya karoi ina cha,
ta noreka yaꞌa koperemki nau.
31 Ya kairai veka,
‘Ma Kornilius,
God-a beten mema karivo ven ta ova kakinao row minyiao pasin inyia amao ero.
Inyia ao va kamoiy aro bombiam ao va owaunrei ero.
32 Namairai moiy aro ovu nenopi mataimon Jopa ya nipia Cha Saimon,
awoꞌo raꞌa keipinaka veka Cha Pita.
Bia emo kakei oꞌro ya Cha Saimon raꞌa.
Cha Saimon ve bo va ta karao rore tao rere ao meꞌe maramara,
oꞌro ya koroi row nao ika.’
33 Tapara aro ovu kanairai noiy kenopi nama bereren,
ta pasin neman-a kamao ta kakame.
Ta mare vo,
memi aro mowmow kekame kekemi revo ine ya God,
kemake awirai mowmow Biapako airai roma ero namairai momi nemirivo.”
Cha Pita a va kairirai oꞌro ya Cha Kornilius
34 Ya kopei Cha Pita ava kairai veka,
“Awakai,
mare kana yarau,
God-a pasin ve karao roiy minyiao aro bombiam mowmow ta,
yei aro raꞌa tirin minyiao.
35 God-a karereroiy aro bombiam mowmow epiakepiroko ta pasin neman-a epao ero.
36 Mopu awirai ve God-a karoiy Israel kopu yarau ven,
awirai neman ya Yesus-a kairirai veka,
Yesus Krais ya Biapako memi aro bombiam mowmow.
Ya karao kekame rimoꞌo moikera iya God.
37 Mopu veku kopu yarau ven ao arape ere kamap ato provins Galili vo,
ya kopei konoi boko mowmow vou Juda.
Ao en pa va kere rikere Cha Jon Baptais taim kairirai roiy aro bombiam baptais-a neko.
38 Kopu yarau ven God-a kamompe yaꞌa Yesus vou Nasaret,
ta Holi Spirit-a nau kupuana pako kaoroa.
Ya Yesus-a kanoi rorore boko mowmow kalpim yei aro bombiam Satan-a kabagarapim yei ero.
Ku vou korao veka God-a kakei iya.
39 “Ta memi aro vou ao va emi pirikere ta kemi irirai more ao voro Yesus-a kararerare Juda ta mataimon pako Jerusalem.
Ya kopei ketutari naka aꞌai raꞌa ya karai.
40 Kopei umo namba 3,
God-a karaonaka kavariko varu ta karoika iꞌiy ine yei aro bombiam-a kepirikeiya.
41 Juda mowmow via epirikeiya.
Kakai imi aro God-a yaꞌa veku kamompe ta awirai yaꞌa kemi irirai.
Memi aro ve,
aokorom-a kema pii va kemiton miya minyiao.
42 Awirai kupuana va karomi ke nemi irirai moiy aro bombiam revo vatiron veka,
bia emo po,
God-a kamompe yaꞌa veka jas yei beiyo ekepi tare ta beiyo eviri ven.
43 Profet mowmow awirai-ya kyirirai pova arape keta nararerare.
Korao veka ta aro voro kebilip pova ero,
God-a keta sin yei napereokirei row awoꞌo yaꞌa Yesus.”
Aro raꞌa tirin-a Holi Spirit-a keko
44 Taim Cha Pita karoi ava inyia kairai,
Holi Spirit-a kararo iꞌiy aro bombiam mowmow ekepi ta awirai-ya erivo ero.
45 Ta yei Juda voro kebilip ta kekape pova Cha Pita keririko toro,
kepirikeo veka,
God-a Holi Spirit-a karoiy veka presen yei aro voro via yiave Juda.
46 Ku vou korao veka,
aro ve Holi Spirit-a keko ava kyirirai poko maramara ta awoꞌo ya God-a kyiavoko.
Ya Cha Pita kairai veka,
47 “Aro ve Holi Spirit-a keko ven veka memi veku.
To bia nape kainyia iu narao rarimi ke via pii va nemibaptaisim yei vai?”
48 Ya Cha Pita awirai kupuana kairai roiy aro bombiam voro baptais-a keko pow awoꞌo ya Yesus Krais.
Ya kopei ketere poa Cha Pita kakeiki iꞌiy umo ovu vova ke.