Cha Sol riꞌi va karovoru
9
Taim ve,
Cha Sol inyia kairirai veka keta disaipel ya Biapako nayei neviri.
Ya kanoi iya hetpris vou tempel,
The Conversion of Saul (Aposel 9:1-19)
2 ya katere roa ke pas-a narereꞌe roiy hetman yei oꞌro lotu yei aro Juda erinyia mataimon pako Damaskus.
Ya kopei Hetpris-a pas-a karereꞌe ya kaoroa varu Cha Sol.
Awirai ve kerinyia pas ero,
kuirai veka,
“Bo Cha Sol napirikei aro biam ovu o aro bom ovu inyia pa nepikeo Raraa ya Biapako,
keta nako yei nekape mataimon pako Jerusalem veka kalabus.”
3 Yauke Cha Sol mataimon pako Jerusalem-a karereo ya kanoi Damaskus.
Ya kopei taim karoiko kakuke iu Damaskus,
lait raꞌa vou heven-a korokoraka ta koviriri taka.
Lait em koviriri pako,
4 ya Cha Sol raro karei meꞌri,
ya karivo bia raꞌa a va kairai roa veka.
“Ma Sol,
Ma Sol!
To koraka ro ta nai-ya inyia kamona?”
5 Kopei Cha Sol katere roa veka,
“Biapako,
to moma bia nape?”
Ya kopei bia emo kairai roa veka,
“Nena Yesus,
mema inyia nai-ya kamona.
6 Nama variko nanomi mataimon pako,
ya bia raꞌa keta nairai roma arape namao.”
7 Aro ve kenopi pova Cha Sol vo,
keririko toro ya roꞌo va kowaunki rei.
Poko ya bio kerivo,
ta via epirikeiya.
8 Ya kopei Cha Sol kavariko.
Taim ine kaperiki,
via kuinyia iu ao va raꞌa napirikeo vai,
ine keiya taipo ven.
Korao veka ta eno po kerainyaka kyiute kenopinaka Damaskus.
9 Kakei nau ine taipo konoi kuinyia iu umo 3-pla,
ta via pii va aton ta aokorom-a via ara minyiao.
10 Kopei mataimon pako Damaskus,
disaipel raꞌa kakei,
awoꞌo yaꞌa Cha Ananaias.
Kayiyo naka Biapako kairai roa veka,
“Ma Ananaias!”
Ya Cha Ananaias kairai roa veka,
“Biapako,
kakeni em.”
11 Ya kopei Biapako kairai roa veka,
“Nama variko ya nanomi oꞌro ya Cha Judas kuinyia rara voro keipinao veka Rara Topan.
Ya namatere moiy bia raꞌa vou mataimon Tarsus,
awoꞌo ya Cha Sol.
Mare kakei inyia beten-a karao ere.b
12 Cha Sol kayiyo veka bia raꞌa awoꞌo yaꞌa Cha Ananaias,
kakai eno riepin kareretaka ya ine kaperiki varu.”
13 Ya Cha Ananaias kaorova veka,
“Biapako,
bia ero kanarivo beiyo prumo kyirai pova veka pasin taipo maramara kararao roiy aro bombiam mema ekepi Jerusalem.
14 Bia emo,
bikpris-a kyirai poa kakai ke nako yei aro voro inyia lotu nau beten-a kepao pow awoꞌo mema ero,
keta narerei roki kalabus.”
15 Ta Biapako kairai roa Cha Ananaias veka,
“Nanomi!
Bia emo mare kana mompe yaꞌa ven veka bia bo arao rona,
keta awoꞌo nena nairirai nanoi iꞌiy aro via yiave Juda,
awei king yei ta yei Israel minyiao.
16 Keta naniritaka veka nai pako keta napoi taim awoꞌo nena nairirai nonoi roiy aro bombiam.”
17 Ya kopei Cha Ananaias kaute kanoi ya kakoi oꞌro aꞌari ya Cha Judas.
Ya eno para riepin kareretaka Cha Sol,
ya kairai roa veka,
“Raꞌai nena ma Sol,
Biapako Yesus-a kakamap ima rara taim inyia kamaute kakame.
Ya mare kairai rona kakane nima ke ine va nama periki varu ya rova name mow Holi Spirit.”
18 Taim Cha Ananaias awirai-ya kairai ven,
bererenki po ao veka ba biri kuinyia ine ya Cha Sol,
raro korei ya ao va kapirikere varu.
Ya kavariko ya baptais-a kako.
19 Ya Cha Sol aokorom-a kara ya kakuprapana varu.
Cha Sol awirai neman ya God-a kairirai Damaskus
Ya Cha Sol kakei Damaskus iꞌiy disaipel umo ovu vova ke.
20 Ya bererenki po kavariko kanoi rorore oꞌro lotu yei Juda awirai-ya kairirai veka,
“Yesus yaꞌa Ma Biam ya God”.
21 Aro mowmow awirai ya Cha Sol kerivo,
keririko toro.
Ya kyirai veka,
“Bia emo inyia karao roiy toro aro bombiam inyia lotu nau beten epao pow awoꞌo ya Yesus.
Inyia kararao mataimon pako Jerusalem,
mare kakai ke nakalabusim yei ya nako yei nenopi piy bikpris.”
22 Ta Cha Sol kareva pana row revo awirai-ya nairirai revo nariritai Juda ekepi Damaskus veka,
Yesus yaꞌa Krais.
Kopei yei Juda ekepi Damaskus awirai ya Cha Sol kerivo ta via inyiapi awirai-ya raꞌa nyirai ke awirai ya nepyevope ya netaowoaka.
Juda ine kepia trotropu Cha Sol ya karekai
23 Kopei umo mowmow-a kerenoriki ven,
Juda to va kyirai minyiao ke Cha Sol nepyeiya narai.
24 Ta Cha Sol awirai vou ao en kepake nepao ero karivo roiy ven.
Umo roro,
inyia kyiorepariya revo kamo mowmow vou mataimon ve ke nepyei narai.
25 Ta yei aro inyia kyiutute popova Cha Sol ero,
keko yaꞌa roro ke ya kekope naka kamo pako raꞌa kuinyia rora iu reiy koroka rariu mataimon em.
Ya kyirai poa kakei rovo yam anai raꞌa ya kereru koraro naka upuo vou reiy pako vou mataimon ve.
Cha Pol kakei Jerusalem
26 Ya kopei Cha Sol kanoi kareiki Jerusalem,
ya karake nanoi naroroiko iꞌiy disaipel ovu.
Ta yei disaipel-a keriri poa ta via ebilip veka kave disaipel.
27 Ta Cha Barnabas kako ya Cha Sol ya karainyaka kanoi iꞌiy aposel.
Ta awirai ya Cha Sol kairai roiy veka,
“Cha Sol kapirikeiya Biapako ta Biapako a va kairai roa taim kaute row rara koraro mataimon pako Damaskus.
Ya taim Cha Sol kakei Damaskus,
via ariri,
kakuprapana row awirai-ya nairirai row awoꞌo ya Yesus.”
28 Korao veka ta Cha Sol kakei iꞌiy aposel mataimon pako Jerusalem ya katowa roroiy.
Kakuprapana row revo awirai-ya nairirai row awoꞌo ya Biapako.
29 A va inyia kairirai wararoiy Juda ovu inyia poko Grik-a yirai ero.
Ta yei baunke rara inyia kyiorenao ke nepyeiya narai.
30 Taim aro inyia kebilip pova Yesusc ao en keyarau,
keko yaꞌa Cha Sol kararo mataimon Sisaria,
ya kesalim yaꞌa kanoi mataimon Tarsus.
Cha Pita karao Cha Ainias kaneman varu
31 Korao veka ta aro bombiam vou sios ekepi provins Judia,
distrik Galili awei distrik Samaria kekepi riꞌi mariri ta kekupuana.
Ta Holi Spirit veku kalpim yei ta kupuana karoiy ya namba yei kokoi kopako.
Ya pa kepikeo po pasin vou nepiakepi roko Biapako.
32 Kopei Cha Pita kautute rorore boko mowmow,
ya kanoi kapirikei aro bombiam ya God kekepi mataimon Lida.
33 Boko vere,
kapirikeiya bia raꞌa awoꞌo yaꞌa Cha Ainias.
Kom-a keiya rai ta inyia kaininyia po bet konoi kuinyia iu ainini 8-pla.
34 Ya kopei Cha Pita kairai roa veka,
“Ma Ainias!
Mare Yesus Krais-a karao kama neman varu.
Nama variko bet mema nama roroka.”
Bererenki po Cha Ainias kavariko karoi.
35 Ta aro mowmow ekepi mataimon Lida awei aro ekepi meꞌri koraꞌa Saron emo,
kepirikeiya Cha Ainias kaneman varu.
Ya riꞌi va kerovoru kekapepiya Biapako.
Cha Pita karao Kwa Tabita kovariko varu
36 Kopei mataimon Jopa,
disaipel bom raꞌa kokei,
awoꞌo vou Kwa Tabita.
(Poko Grik,
keipinao veka Kwa Dorkas.)
Bia bom ve,
inyia pasin neman-a korao koelpim yei aro bombiam ao va owaun rei ero.
37 Taim evo a va korao ta korai.
Ya pii va kereniriu ya kere rere kuinyia rum raꞌa kuinyia nake.
38 Mataimon Lida kuinyia kakuke iu revo mataimon Jopa,
korao veka ta disaipel-a kerivo veka Cha Pita kakai kakei mataimon Lida.
Ya kyirai poiy bia riepin-a kerai nopi naka ya kerai yirai poa veka,
“Ei,
kemere moma nakame momi bereren!”
39 Ya kopei Cha Pita kavariko ya kanoi roiy bia riepin.
Ya taim kerepiki mataimon Jopa,
keko yaꞌa kakoi roiy rum uinyia nake.
Ta rere aro bom,
am-a eviripere ven,
kerekare kere rori kakuke iya Cha Pita ya kerero.
Noreka nau no vou Kwa Dorkas orarerare ero taim baunke kokei tare kere riritaka Cha Pita.
40 Ya Cha Pita kairai roiy aro bombiam mowmow kenopi nau upuo,
ya boratapo katureriyo beten-a karao.
Ya karovoruki iu bia bom orai em ya kairai row veka,
“On Tabita,
nom variko.”
Ya ine koperiki ya kopirikeiya Cha Pita ya kovariko kokei.
41 Ya Cha Pita eno karuavo ya kavoko koroi nake.
Ya kaiyki roiy aro bombiam ya God awei aro bom am-a eviripere ven ero,
kekape.
Ya kariritai veka Kwa Tabita kokei tare.
42 Awirai vou ao en Cha Pita arao ero,
koawetari konoi rorore boko mowmow erinyia mataimon Jopa,
ta mowmow yei kebilip pova Biapako.
43 Cha Pita baunke kakei mataimon Jopa umo kere mowmow naka.
Kakei iya bia raꞌa awoꞌo yaꞌa Cha Saimon.
Bia emo,
tao rere bulmakau ta kaririru ya kaorerarire kerinyia revo,
ke beiyo va neko piya ya ao maramara neparepare.