8
Cha Sol minyiao karoi taim ve kepyeiya Cha Stiven karai em,
ya keyarau veka ao en kepao poa ero,
koneman.
Cha Sol kayei kristen-a keviriviri ya karao ovu kevereko kenopi tintin
Umo ve kepyeiya Cha Stiven karai em,
ya kestat kepao poiy toro aro bombiam vou sios kekepi mataimon pako Jerusalem.
Ya aro mowmow ebilip ero kekwari tintin kenopi kekepi distrik Judia ta Samaria.
Ta yei aposel baunke kekepi Jerusalem.
2 Ya aro ovu inyia pa kepikeo pasin voro God-a karererow ero keko ya Cha Stiven kenopi kepere matmat ya aoro koka kero kekeiya.
3 Ta Cha Sol baunke inyia karao roiy toro aro bom awei aro biam vou sios minyiao.
Inyia kanoi rorore oꞌro moike moike yei ta karaipai kanoi karerei roki kekepi kalabus.
Cha Pilip kanoi Samaria ya awirai neman ya Yesus-a kairirai
4 Aro bombiam ve keturepi kenopi tintin boko mowmow,
awirai neman ya God-a kyirirai popore boko voro kekepi ero.
5 Cha Pilip kanoi mataimon raꞌa vou distrik Samaria ya awirai neman ya Krais-a kairirai roiy.
6 Taim aro bombiam koka awirai yaꞌa Cha Pilip kerivo ta mirakol ipipo kararerare kepirikeo,
ya teve ketete revo awirai yaꞌa.
7 Kepirikeiya Cha Pilip spirit taipo karirikeiki rei aro bombiam mowmow,
ta spirit taipo ve kyepi pako ya kere rerei.
Ya aro prumo kom-a erei taipo awei aro rika ereirai ero,
karaie keneman varu.
8 Ao en korao ta oꞌto pako akai-ya kuinyia mataimon vere.
9 Taim ve,
bio raꞌa kakei mataimon ve awoꞌo yaꞌa Cha Saimon.
Bia emo pasin marela kararao ven ato ta inyia kariritai veka kupuana kuinyia iya.
Karao aro mowmow vou distrik Samaria kepirikeo ta ova inyia kekinakinao pako ta awoꞌo yaꞌa veku kaireko veka ya bia beiy.
10 Aro koka,
ta yei aro awoꞌo ipipo keko awei aro bombiam kanapon,
teve keteteiya revo ta kyirai veka,
“Kupuana ya God ero,
keipinao veka Kupuana Pako,
kuinyia iya bia emo.”
11 Kekupuana po awirai yaꞌa nerivo,
ku vou korao veka,
ao maramara kararerare ven ato ya inyia kokai ta ova kekinakinao po kupuana yaꞌa.
12 Kopei taim Cha Pilip awirai neman vou kingdom yaꞌa God nau awoꞌo ya Yesus Krais-a kairirai,
aro bom awei aro biam koka kebilip ya baptais-a keko.
13 Ya Cha Saimon minyiao kabilip,
ya baptais-a kako.
Ya inyia kautute rorova Cha Pilip ya kapirikere mirakol ipipo Cha Pilip kararerare emo,
ya Cha Saimon ova kakinakinao pako rore.
14 Taim aposel-a kekepi mataimon pako Jerusalem awirai-ya kerivo veka aro Samaria awirai-ya God-a keko,
ya kyirai poa Cha Pita eri Cha Jon kerai nopi piy.
15 Ya taim kerairepiki Samaria,
ya kopei beten-a keraipao poiy ke Holi Spirit-a neko.
16 Ku vou korao veka,
Holi Spirit baunke via araro iꞌiy vai,
baptais po keko pow awoꞌo ya Biapako Yesus.
17 Ya Cha Pita eri Cha Jon beten-a keraipao ven ya kopei eno kerai peretai,
ya Holi Spirit-a keko.
18 Taim Cha Saimon kapirikei veka aposel riepin eno va kereperetai ya Holi Spirit-a keko,
ya ketao va kokakai karake naroiy aposel riepin.
19 Ya kairai roiy aposel riepin veka,
“Kupuana voro norupona minyiao,
ke bia nape eno naneretaka ya Holi Spirit-a nako.”
20 Ta Cha Pita kairai roa Cha Saimon veka,
“Ketao mema kuinyia iu nobagarap ima minyiao.
Mema kamitoro veka kamainyia miu ao en,
God-a veku karoiy aro bombiam kuinyia iu namako vai?
21 Mema via kuinyia iu nakemi rovo imi ke bo ya God-a nemao vai,
ku vou korao veka,
rimoꞌo mema via oniniu iu ine ya God vai.
22 Riꞌi va nama rovoru ya pasin taipetaipe namemere.
Ya beten-a namao ya namatere moa Biapako ke naokoku roma ya ruru taipo voro uinyia rimoꞌo mema napereoki.
23 Kanapirikema kamaririke mow ao neman,
God-a karake naroiy aro bombiam kamake namako.
Ta kopei pasin ve kamaririke mow ao neman ero,
korao ruru mema kotaipo ya kakemi veka kalabus vou sin.”
24 Ya kopei Cha Saimon kairai roiy bia riepin veka,
“Beten-a norupao poa Biapako ke riꞌi mariri narona ya ao voro orupirai ero,
via kuinyia iu nokai ina.”
25 Ya aposel riepin ve,
awirai-ya kerai irai poiy aro bombiam row awirai ya Biapako nau awirai vou ao voro Biapako kararerare roiy.
Ya kopei kerai ute kerai nopi varu Jerusalem.
Taim inyia kerai ute kerai nopi,
awirai neman ya God-a inyia kerai irai kerai nopi popore boko mowmow vou Samaria.
Cha Pilip awirai neman ya God-a kairirai roa bia Itiopia
26 Ya ensel raꞌa ya Biapako kairai roa Cha Pilip veka,
“Nama variko nanomi saut,
rara koraro Jerusalem ya konoi iu mataimon Gasa.”
Rara evo kuinyia bo ramata kanapon beiyo va via ekepi.
27 Ya Cha Pilip kavariko ya kanoi.
Taim kaute kanoi,
kavakakeiya bia raꞌa vou meꞌri koraꞌa keipinao Itiopia.a
Bia emo bo pako va kako ta inyia kaorerariu revo ao neman neman vou kwin vou Itiopia,
awoꞌo vou Kwa Kandasi.
Bia emo kanoi mataimon pako Jerusalem ke lotu narao.
28 Ya kopei taim kanoi varu oꞌro yaꞌa,
kakeitaw karisb yaꞌa,
ta inyia buk ya profet Aisaia karitim kanoi.
29 Ya kopei Holi Spirit-a kairairoa Cha Pilip veka,
“Namaute nanomi kakuke iu karis.”
30 Ya Cha Pilip kaparara kakoi kakuke iu karis em ya karivo bia emo buk ya profet Aisaia karitim.
Ta Cha Pilip katere roa veka,
“Era ku vou awirai voro kama ritim kama yarau o bauni?”
31 Ta bia emo kairai roa veka,
“To ku vou nana save nanaka ro?
Bo bia raꞌa nariritana,
keta nana yarau.”
Korao veka ta kairia Cha Pilip kakoi kakeitaw iya karis.
32 Bia emo awirai koraꞌa ya profet Aisaia karitim kuirai veka,
“Keko yaꞌa kenopi veka sipsip raꞌa kepake nepyeiya narai,
ta roꞌo va kaito karoi veka sipsip ma raꞌa
kepake peꞌe nepiaoro.
33 Kerovoria ta a va kyiavo poa minyiao.
Ya kopei kot-a kepiapao,
ta via kot-a erivopoa revo vai.
Ya kopei karai,
Korao veka aro meꞌe yaꞌa via ekepi,
ke beiyo va nyirai poiy.
Laip yaꞌa kekiyoki ven,
ta via akei vova meꞌri vai.”c
34 Ya kopei bia emo awirai-ya karitim ero katere roa Cha Pilip veka,
“Namairai mona revo,
profet voro kairai rova bia nape,
yaꞌa veku o bia raꞌa tirin?”
35 Kopei Cha Pilip kairai roa bia emo.
Tija akai,
ku vou awirai ya profet Aisaia kairai roa,
awirai ve kuirai rova Yesus.
Ta awirai neman ya Yesus Krais ovu minyiao kairirai roa.
36-37 Taim inyia kerai parara kerai nopi pow rara,
kerai nopi ya kerepiki iu pii u raꞌa,
ya bia emo kairai roa Cha Pilip veka,
“Nama pirikeo,
pii va kuinyia evo.
Era ao raꞌa kotiriki rarina ta via kuinyia iu baptais-a nanako vai?”d
38 Kopei kairairoa draiva karao hos-a kere riraki nau karis.
Ya Cha Pilip eri bia emo keraiparo kerairopi iu pii ya Cha Pilip kabaptaisim yaꞌa.
39 Kopei taim pii va keraipepeo kerai kope nake,
bererenki po Holi Spirit-a kararo kako yaꞌa Cha Pilip.
Ya bia emo via apirikeiya Cha Pilip vova vai.
Ta bia emo,
ova korova ya kanoi kakeitaw karis ya parara kanoi.
40 Kopei Cha Pilip kayarau veka kakei mataimon Asdot,
ya awirai neman ya Yesus-a kairirai kanoi rorore mataimon ya kareiki iꞌiy mataimon Sisaria.