Cha Stiven awirai-ya kairai roiy kansol
7
Ya kopei hetpris-a katere roa Cha Stiven veka,
“Awirai ve kevitikema ero,
era awakai,
vai?”
2 Kopei Cha Stiven kairai roiy veka,
“Aro raꞌai awepu aro aka nena Israel,
nopurivo pona!
Taim apo memi Cha Abraham kakei Mesopotemia,
baunke via anoi mataimon Haran ta God vou heven,
kupuana kuinyia iya kakamap iya.
3 Ya God-a kairai roa veka,
‘Meꞌri ve namemeo awei aro raꞌai mema,
ya namaute namomi boko raꞌa keta naniritama.’a
4 “Yauke Cha Abraham meꞌri yei Kaldia karereo ya kaute kanoi kakei Haran.
Kopei taim aka yaꞌa karai ven,
ya kopei God-a kairai roa kakai kakei meꞌri ve mare okape okepi em.
5 Kopei taim ve,
God-a via meꞌri koraꞌa mentanaka aoroa Cha Abraham awei aro yaꞌa vai,
ke nyiave aka vou.
Kopei po God-a promis-a karao roa Cha Abraham veka,
kokai paire meꞌri ve keta naoroa nuinyia eno peꞌe yaꞌa awei aro apo yaꞌa ekape paire ya nyiave aka vou meꞌri em.
Kopei taim ve Cha Abraham via meꞌe va aru vai.
6 Ya God-a kairai roa veka,
‘Aro apo mema keta nenopi nekepi kantri rura.
Ya aro mowmow vou kantri ve keta nepao poiy toro,
ya nepaonai nyiave wokboi kanapob nonoi nuinyia iu 400 anini.
7 Ta nena keta kot-a naneinao aro ve pasin voro kepaopoiy aro apo mema ero.
Ya kopei aro apo mema keta kantri voro nepepeo,
ya nekape varu meꞌri ve ya lotu nepaopona.’c
8 Kopei God-a kairai roa Cha Abraham veka keta tao va naoro ke noriritao veka God-a kontrak ve kaoroa.
Ya kopei Cha Abraham ma biam raꞌa kareriao,
ya awoꞌo kairinaka Cha Aisak.
Ya kopei umo 8-pla konoiki ven taim umo ve moꞌo va koaivia ero,
ya Cha Abraham tao va keiyaoro.
Ya kopei Cha Aisak kave aka ya Cha Jekop,
kopei Cha Jekop kave aka yei aro apo 12-pla memi.
9 “Cha Yosep,
aka yaꞌa ta karererova revo,
ta yei aro apo ovu kekunakuna naka,
aro em yei aro raꞌai yaꞌa veku.
Ya kesalim poiy Isip-a keko yaꞌa kave wokboi yei.
Ta yaꞌa God-a baunke kakei iya kakuke,
10 ya kalpim yaꞌa nai koka em apoi ero kapereuki reiya.
Ya ruru neman-a God-a kaoroa ta karao king yei Isip-a karererova revo.
Yauke king-a karaonaka Cha Yosep kave namba wan gavman yei kantri Isip ta kaorerariu ao mowmow ya king em.
11 “Ya kopei taim vou aokorom-a kowaunki rei pako korereka iꞌiy kantri Isip awei Kenan.
Taim ve,
ero taim taipo akai,
ta aro apo memi via kuinyia iu aokorom-a raꞌa neko nepa vai.
12 Kopei taim Cha Jekop karivo veka wit-a kuinyia Isip,
ya kairai roiy aro apo memi kenopi ke aokorom ipin-a neko.
Evo tare mare yei kenopi kantri Isip.
13 Kopei tare kyiute kenopi vova ya Cha Yosep kairairoiy aro raꞌai yaꞌa veka,
‘Nena Cha Yosep.’
Ya kopei king ve minyiao kasave yei aro yaꞌa Cha Yosep.
14 Ya kopei Cha Yosep kairai roiy aro raꞌai yaꞌa kenopi kyirai poa aka yaꞌa,
Cha Jekop awei aro yaꞌa nekape piya Isip.
Aro ve namba yei kinyiapi veka 75.
15 Ya Cha Jekop awei aro apo memi kenopi kekepi Isip konoi ya yei minyiao keviri vere.
16 Ya kopei rika yei aro eviri ven ero keko kenopi varu kepere kinyia matmat ve kuinyia mataimon Sekem.
Cha Abraham matmat em kako iꞌiy mevova ya Cha Hamor.
17 “Kopei taim ya God-a kamompe ke promis tija karao iya Cha Abraham noraonao ero ya kokai kakuke,
ta yei aro memi Israel kekepi Isip namba kekepiko revo.
18 Kopei konoi ya bia raꞌa vova kave king yei Isip.
Bia emo via asave ya Cha Yosep vai.
19 King evo karoporei aro apo memi Israel ta via pasin neman-a arao roiy vai.
Ya karao meꞌe biam moꞌo va ereave ero,
nere rerei upuo ke neviri.
20 “Kopei taim ve,
Cha Moses moꞌo va koaivia.
Bia mentanaka evo kaneman ta God-a karererova revo.d
Ya kererin kainyia oꞌro aꞌari ya aka yaꞌa ta inyia kereyorerariya konoi kuinyia iu veka ura 3-pla.
21 Ya kopei keperiaki kainyia upuo,
ya ma bom ya king-a kopirikeiya ya koaivia korerariya veka ma vou.
22 Cha Moses save neman neman yei Isip-a kako,
ta kainyia iu awirai kupuana nairai ta bo pako maramara va nararerare.
23 “Taim ainini ya Cha Moses kuinyiaiu veka 40,
ya ova kakinaoko varu veka karake nanoi napirikei aro raꞌai yaꞌa,
Israel.
24 Kapirikeiya Isip raꞌa karao roa toro bia raꞌa yei Israel,
ya kopei kanoi kalpim yaꞌa bia Israel em kayeiya Isip ve karai.
25 Cha Moses karitoro aro raꞌai yaꞌa keta neyarau veka God-a kasalim yaꞌa ke naelpim yei aro ya veku Israel,
ta yei via eyarau.
26 Kopei umo raꞌa,
Cha Moses kapirikei Israel riepin roma keraipao ta kakai karake naveiki ya nairai roiy veka,
‘Ei!
Mopu raꞌai veku ro.
To korao vekaipe ta roma korupupao?’
27 “Ta bia emo inyia ayeiya raꞌa evo,
katuraka Cha Moses ya kairai roa veka,
‘Bia nape karaonama kamave hetman ta jas memi?
28 Era kamake naimyena narani vai,
veka bariri Isip raꞌa kaimyeiya karai ero vai?’e
29 Ya taim Cha Moses awirai ve karivo,
kariri ya kanoi kakei Midian veka bia vou kantri raꞌa.
Ya kopei bom boko ve kako ya meꞌe biam riepin-a karereiyo.
30 “Kopei ainini 40-pla konoiki ven,
ensel raꞌa kakamap iya Cha Moses veka aiyerao,
ta koviriri taw aꞌai mentanaka raꞌa.
Aꞌai mentanaka evo koroi bo ramata kanapon beiyo ewaun kakuke iu tou Sainai.
31 Ya kopei taim ao en kapirikeo kaririko toro.
Ya kanoi kakuke iu,
karake napirikeo revo,
ya karivo Biapako kairai roa veka,
32 ‘Nena God yei aro apo mema.
Nena God ya Cha Abraham,
Cha Aisak ta Cha Jekop.’f
33 “Kopei Biapako kairai roa vova veka,
‘Kanro mema nama taimu,
bo voro mare arom taw ero,
ero bo nena,
ta koholi.
34 Kana yarau ven pasin taipo maramara inyia kepao poiy aro bombiam nena kekepi Isip ero.
Kanarivo ven kero ta awoꞌo keipinana,
ya mare kanaro niy nanako yei varu eno peꞌe yei Isip.
Ya mare nakame,
kanerenoma nanomi varu Isip.’ ”g
35 Cha Stiven baunke a va inyia kairirai.
Kairai veka,
“Bia emo Cha Moses evo,
tija,
Israel-a kyioniy pova ta via a va erivopoa vai,
ta kyirai poa veka,
‘To bia nape karaonama ta kamave hetman memi ta jas vou kot-a namarivo momi?’
God-a yaꞌa veku kairai roa bia emo Cha Moses kave hetman ta bia ya nako yei varu aro bombiam.
Taim ve ensel-a kakamap iya veka aiyerao ta koviriri taw aꞌai mentanaka,
ya God-a kupuana kaoroa.
36 Ya kopei Cha Moses kako yei ta kantri Isip-a kepepeo ya kenopi.
Ta mirakol maramara kararerare Isip,
Nao viriri ta bo ramata kanapo beiyo ewaun konoi kuinyia iu 40-pla ainini.
37 “Cha Moses kairairoiy Israel-a veka,
‘God-a keta beiyo raꞌa mopu veku namompe yaꞌa nave profet veka nena veku.’h
38 Kopei aro apo memi kenopi kekepi bo ramata kanapon beiyo ewaun,
ta Cha Moses karerei kekepi ya kakoi tou Sainai.
Ya ensel raꞌa awirai ya God laip-a kuinyia iu kaoroa,
keta nairai romi.
39 “Ta yei aro apo memi ero,
kyioniy ta via awirai yaꞌa Cha Moses erivo vai.
Awirai yaꞌa kyioniy ta riꞌi yei keperepow revo nenopi varu kantri Isip.
40 Kyirai poa Cha Aron veka,
‘Ao arape mare okamap roa Cha Moses memi via emi save revo vai,
bia ero kako memi kememeo Isip ero.
Cha Moses ao en karao ta mare keta god ovu memi namaremare ke nenopi pomi cha.’i
41 Taim ve,
god giaman raꞌa kepaonao korao veka bulmakau ma raꞌa,
ya ofa kepao pow god giaman ve.
Ya ova koroꞌoi rore bo voro inyia eparepare eno peꞌe yei veku.
42 Ao en kepao veka ta God-a oreva karoiy ya karin lotu inyia kepao pore ao veka umo,
ura awere kaumo,
veka awirai-ya kuinyia buk yei profet,
‘Mopu aro Israel!
Taim kokepi bo ramata kanapon konoi kuinyia iu ainini 40-pla,
bulmakau awere sipsip-a kopyere ya ofa kopao,
era ofa voro kopao pona vai?
Baun ben.
43 Mopu oꞌro sel pako kopao ta kopu poi ke inyia lotu nopao pow god Molek ta kaumo vou god mopu Refan.
Avava yei god roporere kopaonai ta lotu inyia kopao poiy.
Ao en kopao keta nanariri kepu nopepeo kantri mopu ya nonopi nokepi para yei kantri Babilon.’ j
44 “Taim aro apo memi kekepi bo ramata kanapon beiyo ewaun,
ya oꞌro sel ya God-a kerira.
Oꞌro sel em,
God-a inyia awirai akai yaꞌa kairirai roiy,
ta ao mowmow kepao veka God-a kairai roa Cha Moses.
Oꞌro em kerira korao iu minyiao veka avava vou Cha Moses apirikeo ero.
45 Kopei taim Cha Josua kanoi roiy cha,
oꞌro sel em keko kyiute nau ke meꞌri yei aro ovu neko.
God-a kalpim yei aro apo memi ta karirikei aro vou meꞌri en ya kekwari.
Ya oꞌro sel em baunke kyiavo kupuana kokai kuinyia iu revo taim ya Cha Devit.
46 Bia emo,
God-a karererova revo.
Ya kopei Cha Devit katere roa narin oꞌro neman raꞌa narira roiy aro apo yaꞌa Cha Jekop ke lotu nepao poa.
47 Ya kopei Cha Solomon oꞌro em karira roa.
48 “Kopei yaꞌa God Bia Nake,
via akei oꞌro yei beiyo epao ero vai,
veka profet-a kairai ero.
49 “ ‘Biapako kairai veka,
“Heven,
ero sia king nena,
kopei meꞌri ero,
bo vou kom-a nanere taw.
To kopake oꞌro bekaipe nopu rira pona?
To bo bekaipe keta noave bo malolo nena?
50 Nena veku ao mowmow en kanarenare. ” ’ ”k
51 Ya Cha Stiven kairai roiy veka,
“Mopu aro bikhet,
riꞌi va nau ruru mopu kokupuana veka aro haiden.
Teve kokaipurapu ta via awirai ya God-a opurivo vai.
Umumoka awirai ya Holi Spirit via opurivo poa vai,
kopao piy veka aro apo mopu tija inyia epao ero.
52 Aro apo mopu nai pako kepoiy profet mowmow.
Kepao poiy toro aro tija ekape ta awirai ya Bia vou Pasin Niniu kyirirai veka keta nararo.
Ta mare bia emo kakai ven ta koperiakipe poiy eno yei aro taipo ta kopyeiya karai.
53 Ensel ya God-a lo em kepoiy aro apo mopu,
ta via pa va opikeo vai.”
Topa kepyeiya Cha Stiven ya karai
54 Taim kansol-a awirai ya Cha Stiven kerivo,
ova koreiroro revo ta eu va keikiperi.
55 Ta Cha Stiven ro va kare row Holi Spirit,
ya ine kaoreko heven.
Ya kapirikeo lait pako ya God,
koviriri ya kapirikeiya Yesus-a karoi iu eno awakai yaꞌa.
56 Ya kopei kairai roiy veka,
“Noporeko nake.
Kana pirikeo heven-a koruruki ta Ma ya Bio karoi iu eno awakai ya God.”
57 Taim awirai em kerivo,
eno kepopopapiu teve yei ya poko kepurupari pakoki,
yauke kevereko minyiao ya kepraprara kenopi piya Cha Stiven.
58 Ya kyiaivia kerin kenopi mataimon upuo,
ya topa kepurupi taka ke narai.
Taim ve aro tija evitikeiya ero,
noreka ririva yei ketaitai ya kepere kakuke iu kom ya bia yangpla raꞌa,
awoꞌo yaꞌa Cha Sol.