Beiyo 7-pla kemompe yei ke nelpim yei aposel
6
Taim ve,
disaipel-a yauke keprumoa ta namba yei kokoi kopako.
Ta yei Juda ovu inyia poko Grik-a kyirai ero,
ketovei Juda ovu inyia poko Aram-a kyirai ero.b
Ku vou korao veka,
taim vou aokorom-a newani,
aro bombiam voro inyia aokorom-a ewani ero kepao aro bom poko Grik-a kerirai ero ta am-a keviripere ven ero,
aokorom-a kowaun rere.
2 Ya kopei aposel 12-pla keipiy disaipel mowmow kekape ya kyirai poiy veka,
“Via oneman vai,
bo oreva nemow bo ya God ya bo vou aokorom-a nemiwani po nemavo.
3 Aro raꞌai,
noporenai beiyo 7-pla romopu ro va kepe pow Holi Spirit ta awoꞌo yei koneman romoiy aro bombiam,
ta ruru neman-a kuinyia iꞌiy.
Ya bo ve kuinyia iu nemoiy.
4 Memi keta beten-a inyia nemamao ya awirai ya God-a nemirirai nonoi roiy aro bombiam.”
5 Awirai ve korao aro bombiam mowmow va ova koroꞌoi.
Ya kemompe ya Cha Stiven,
bia emo bilip kupuana kuinyia iya ta ro va kare row Holi Spirit.
Ya beiyo ve kemompe yei;
Cha Pilip,
Cha Prokorus,
Cha Nikanor,
Cha Timon,
Cha Parmenas ta Cha Nikolas.
Cha Nikolas yaꞌa Antiok,
yaꞌa via Juda vai.
Pa va ta karikei po lotu yei.
6 Ya beiyo 7-pla ve kepereiki poiy eno peꞌe yei aposel ya beten-a kepao poiy ya eno keperetai ke bo ve nepao.
7 Ya awirai ya God-a konoi rorore boko mowmow.
Ta namba yei disaipel yei mataimon pako Jerusalem inyia kokoi kopako vova ke.
Kopei yei pris minyiao awirai ya God-a kerivo,
ya mowmow yei kebilip ya pa va kepikeo awirai ya God.
Juda kot-a kepiapao Cha Stiven
8 Ya Cha Stiven God-a blesin pako va kaoroa nau kupuana ya mirakol ipipo maramara va kararerare romoiy aro bombiam.
9 Kopei beiyo ovu yei mataimon Sairini,
Aleksandria,
provins Silisia ta ovu yei provins Esia,
kevereko ketove warapoa Cha Stiven.
Aro ve yei aro oꞌro lotu raꞌa yei aro Juda,
keipinao veka,
Oꞌro Lotu yei Aro Ekepi Fri.c
10 Ya Holi Spirit-a ruru neman-a kaoroa Cha Stiven ke a va nairai roiy,
ta via kuinyia iu awirai yaꞌa nepyevope vai.
11 Korao veka ta,
kekepi rokipe ya ruru kepoiy aro ovu ke awirai-ya neropopei veka,
“Kemirivo Cha Stiven a va kavoroa Cha Moses eri God.”
Kyiaivia Cha Stiven
12 Pasin ve kepao ta aro bombiam awei saveman vou lo ta yei hetman riꞌi va kokokorenai.
Ya kopei kevereko kenopi Cha Stiven kyiaivia kyiaororova ya keko yaꞌa kenopi piy kansol yei Juda.
13 Ya kemompe yei aro ovu ke neropopei kansol,
ya kekape keropopei veka,
“Umumoka,
bia emo inyia a va kavo row bo holi ya God nau lo ya Cha Moses.
14 Kemirivo bia emo kairai veka,
Yesus vou Nasaret keta tempel em napereu ya pasin ve tija Cha Moses karomi ero keta narovoru.”
15 Kopei aro mowmow kekepi bo yei kansol ero,
ine ketoropu keiya Cha Stiven,
ya kepirike ine yaꞌa korao veka ensel raꞌa.