Cha Ananaias eri Kwa Safaira
5
Bia raꞌa awoꞌo yaꞌa Cha Ananaias eri om yaꞌa Kwa Safaira,
meꞌri koraꞌa yei keresalim poa bia raꞌa kako.
2 Ya Cha Ananaias ketao koraꞌa kareroki varu ke nuinyia roa yaꞌa veku,
ya koraꞌa po kako kanoi karoiy aposel.
Om yaꞌa ao en karao koyarau iya ven.
3 Ya kopei Cha Pita kairai roa veka,
“Ma Ananaias,
to korao vekaipe ta,
kamin Satan-a karikorow rimoꞌo kuro mema ta ruru kerema rovoru ta kama ropomeiya Holi Spirit?
Mema ketao koraꞌa vou meꞌri kamako kamereroki.
4 Tija meꞌri ve kuinyia eno peꞌe mema,
ya kopei bio raꞌa kako.
Ya ketao vou kamako,
ao ero ao moma kuinyia iu arape mema veku namao mow.
To korao vekaipe ta ruru taipo em kamako?
Mema via amaropomei beiyo,
mema kama ropomeiya God.”
5 Kopei taim Cha Ananaias awirai em karivo,
rarokarei yaꞌa karai.
Ya aro bombiam mowmow awirai em kerivo,
keriri toro.
6 Ta yei aro biam yangpla kekape aꞌari ya no va keroronaka,
ya kyiaivia kenopi upuo ya kamo kyiupi ya kepere.
7 Kopei aua 3-pla konoiki ven om yaꞌa kokai aꞌari,
ta ao voro okamap roa am vou via oyarau.
8 Ya kopei Cha Pita katere row veka,
“Nomirai mona,
era ketao vou yauke voro eripu Cha Ananaias korupuko pow meꞌri mopu vai?”
Ya Kwa Safaira kuirai roa veka,
“Aꞌo,
ketao vou yauke.”
9 Ya kopei Cha Pita kairairow veka,
“To korao vekaipe ta eripu am-a awirai-ya korupirai minyiao,
ta korupu ropopeiya Spirit ya Biapako?
Nonrivo,
aro biam voro kenopi am momu kepere,
kekape keropi kamo vou oꞌro,
keta momu minyiao nyiavemu nenopi upuo.”
10 Ya bererenki po bia bom ve rarokorei kakuke iu kom ya Cha Pita ya korai.
Ya aro biam yangpla kekape aꞌari ya kepirikeo veka korai ven.
Ya keko vou kenopi upuo ya kamo kyiupi kepere kuinyia kororova am vou.
11 Yei aro bombiam vou sios awei aro bombiam koka,
ta aro nape awirai vou ao en kerivo,
keriritoro.
Aposel-a kepaie aro a oraie ero keneman varu
12 Aposel-a mirakol maramara keparepare romoiy aro bombiam row kupuana ya God.
Ya aro ebilip pova Biapako kekepi rimoꞌo moikera ya kenopi reiy aꞌari kuro vou tempel ya kyiopokeo bo ve keipinao veka veranda ya Cha Solomon.
13 Aro bombiam via eroropoi,
awoꞌo yei aro voro inyia ebilip kyiavoko nake.
Ta inyia keriri via nenopi poiy vai.
14 Ta rere aro bom awei aro biam mowmow ebilip pova Biapako kekepi veka aro bombiam yaꞌa,
ta namba yei kokoi kopako.
15 Ta yei aro bombiam-a kepirikere mirakol aposel-a keparepare emo,
ta yei aro a va oraie ero keko yei kenopi kepererei kinyiatao bet-a nau mat row rara ika.
Kepererei kinyia pow rara ika ke Cha Pita naute nakai ya avava yaꞌa noririy ke neneman varu.a
16 Ta aro bombiam mowmow kekape popore mataimon ovu kerinyia kakuke iu mataimon pako Jerusalem.
Keko yei aro a oraie ero awei aro spirit taipetaipe obagarapim yei ero minyiao keko yei kekape.
Ya aro mowmow em kepaie keneman nau varu.
Ensel-a kalpim yei Aposel
17 Ya hetpris vou tempel awei aro bo epao minyiao,
ta aro yei Sadyusi kepirikei aro bombiam-a kenopi poiy aposel ta riꞌi kotaipo naiy revo.
18 Ya kopei kyiavei aposel ya kepererei roki oꞌro kalabus.
19 Kopei roro,
ensel ya Biapako kararo kamo vou oꞌro kalabus-a karuriki roiy ya kako yei kekape upuo.
Ya ensel-a kairai roiy veka,
20 “Norupu nopi norupu ropi tempel aꞌari ya norupirai poiy beiyo row awirai vou laip tare.”
21 Ya aposel-a awirai ve kerivo ya pa va kepikeo.
Kopei roronai ke kyiute kenopi tempel skul-a kepoiy aro bombiam.
Ya kopei hetpris vou tempel awei aro bo epao minyiao keipiy kansol awei hetman yei Israel-a kekape ya kyiopokeo minyiao.
Ya manro vou tempel awirai ve keko minyiao kenopi oꞌro kalabus ke neko yei aposel-a nekape.
22 Ya taim manro kenopi oꞌro kalabus,
kepirikeo veka aposel-a via ekepi oꞌro kalabus.
Yauke,
kenopi varu ya kyirai poiy veka,
23 “Taim kenomi oꞌro kalabus,
kemi pirike veka bokamo va ketipe revo kupuana ta manro va kyiorepapire.
Ya kamo va kemuriki,
bia raꞌa via emi pirikeiya akei aꞌari vai.”
24 Ya taim bikpris vou tempel awei kepten yei manro vou tempel awirai ve kerivo,
ova inyia kekinakinao pako awarape keta nokamap vova.
25 Ya bia raꞌa kakai aꞌari kairai roiy veka,
“Nopurivo,
aro voro kopererei kalabus aꞌari ero,
mare keropi tempel skul-a kepoiy aro bombiam.
26 Korao veka ta kepten yei manro awei manro ovu kenopi keko yei aposel-a kekape varu.
Ta kepten awei manro via epao poiy toro aposel vai,
ku vou korao veka keriri,
bo nepao poiy toro aposel,
awenari aro bombiam keta topa nepurupi nepyei neviri.”
Aposel-a via eriri row awirai-ya nyirirai poiy kansol vai
27 Manro keko yei kekape ya keropi iꞌiy ine yei kansol ke hetpris vou tempel-a aotere narao roiy.
28 Ya hetpris-a kairai roiy veka,
“Awirai kupuana kemirai mopu ven veka via skul-a nopoiy aro bombiam row awoꞌo ya bia emo vai.
Ta mopu baunke skul-a inyia kopoiy aro bombiam ta awirai ve inyia kopirirai konoi ta boko mowmow erinyia Jerusalem awirai ve kerivo ven.
Ta kopao ke aro mowmow nevitikemi veka memi bia emo kemyeiya karai.”
29 Kopei Cha Pita awei aposel ovu kyiraikipe poiy veka,
“Awirai ya God unake po pa nemikeo.
Kopei awirai yei beiyo kanapon via pa nemikeo.
30 Mopu Yesus-a kopu tutari naka aꞌai raꞌab ya karai,
ya kopei God yei apo memi karaonaka kavariko varu.
31 God-a kako yaꞌa kakoi kakei iu eno awakai yaꞌa,c
ta namba pako va kaoroa.
Ya God-a karaonaka kave bia vou rara nariritami,
bia ya nako memi varu ta bia ya naraonami aro Israel-a riꞌi va nemirovoru ya sin memi keta napereo.
Kakei veka bia ya sin-a napereo.
32 Ao en kemipirikere God-a kararerare ta inyia awirai-ya kemi irirai more.
Ya Holi Spirit minyiao awirai-ya kairirairore ao en.
God-a inyia Holi Spirit-a karoiy aro bombiam pa va inyia epikeo awirai yaꞌa.”
Cha Gamaliel kairai kansol-a nemariro poiy aposel
33 Taim kansol-a awirai em kerivo,
ova kereiroro ya ketove kepake nepyeiya Cha Pita awei aposel-a neviri.
34 Ta kansol raꞌa karoi,
yaꞌa Farisi,
awoꞌo ya Cha Gamaliel,
yaꞌa raꞌa yei tikse vou lo.
Bia emo aro bombiam mowmow ta awoꞌo yaꞌa kyiavoko nake.
Kavariko ya kairairoiy aposel-a nenopi nekepiki upuo mentan mentan vo.
35 Taim aposel-a kenopiki ven upuo,
ya kairai roiy kansol-a veka,
“Mopu aro Israel,
bo kopake ao arape nopao poiy aro emo,
keta ova nopukinao revo voꞌo.
36 Nopupirike,
kovevenki ven,
Cha Teudas karoi kairai veka yaꞌa bia beiy namba kuinyia iya.
Ya 400 beiyo pa kepekeiya.
Ta gavman-a kepyeiya karai ya beiyo pa epekeiya ero,
kepepe tintin ya bo yaꞌa koreiyoro kanapon.
37 Ya kopei Cha Judas yei Galili kavariko kakai taim gavman-a awoꞌo va kekonanai aro bombiam.
Ya aro bombiam ovu ruru kareirovoru ya kenopipova roma kepao wararoa gavman.
Ta kepyeiya karai ya aro inyia pa epekeiya ero,
keturepi tintin.
38 Korao veka ta mare kanairainopu,
via ke ao va raꞌa nopaopoiy vai.
Nopin nenopi.
Bo,
bo ve epao emo,
nokai iꞌiy ruru yei beiyo kanapon,
bo ve keta noreiyo.
39 Kopei bo God-a ao en veku narao eno peꞌe yaꞌa,
via kuinyia iu nopaopariy,
baun ben.
Bo nopao veka,
keta nopu yarau veka mopu veku inyia roma kopao warapoa God.”
40 Ya keipiy aposel-a kekape vova aꞌari,
ya wip-a kepyei.
Ya awirai kupuana kyiraipoiy ke via nenopi awirai-ya nyiriraipoiy row awoꞌo ya Yesus vova vai.
Ya kerokoperiki kenopi.
41 Taim aposel-a oꞌro yei kansol-a kepepeo,
ova koroꞌoi revo.
Ku vou korao veka,
God-a kapirikeo veka bilip yei kokupuana ta kuinyia iu beiyo va nepao reka noyoe row awoꞌo ya Yesus.
42 Umumoka,
inyia kenopi tempel ta oꞌro moike moike skul-a kepoiy ya awirai ya Yesus-a inyia kyirirai konoi roiy aro bombiam veka Yesus yaꞌa Krais.