Cha Pita eri Cha Jon kerainopi kerairopipiy ine yei kansol
4
Taim Cha Pita eri Cha Jon baunke kerairopi a va inyia keraiyiraipoiy aro bombiam,
ya kopei pris awei kepten yei manro vou tempela ta ovu yei Sadyusi kekapepiy.
2 Keyarau ven veka Cha Pita eri Cha Jon skul-a kerepoiy aro bombiam veka,
Yesus-a karai ya kopei God-a karao kavariko varu.
Ta yei aro voro ebilip ta eviri ero,
yei minyiao God-a keta narao nevereko varu.
Awirai ve keraiyirai ta korao ova kereirororoiy.
3 Ya kyiavei Cha Pita eri Cha Jon kepake kot-a nepeipao.
Ta bo va kobaribariri ya kepereiroki kerai kepi kalabus konoi kurinaiy.
4 Ta aro bombiam prumo awirai ve kerivo ven,
ya kebilip poa Yesus.
Ta namba yei aro biam ebilip ero kekepiko veka 5,000.
Kekapepiy kansol ya kot-a kepeipao Cha Pita eri Cha Jon
5 Kopei uri,
aro beiy yei Juda,
awei hetman ta yei saveman vou lo kekape kyiopokeo minyiao mataimon pako Jerusalem.b
6 Aro ve minyiao kekape kyiopokeo piy.
Cha Anas yaꞌa hetpris vou tempel,
Cha Kaiapas,
Cha Jon ta Cha Aleksanda awei aro noꞌo ya hetpris vou tempel.
7 Ya keko ya Cha Pita eri Cha Jon keraikape kerai ropi piy ine yei ya ketere poiy veka,
“To kupuana voro korupuko bekaipe ta ao en inyia korupupao?
To ao en korupupao pow awoꞌo ya bia nape?”
8 Ya kopei Cha Pita ro va kare row Holi Spirit ya kairai roiy veka,
“Mopu aro hetman,
awepu aro beiy yei aro bombiam vou Israel,
9 mare kopake noputere popi ao en kepipao poa bia kom taipo raꞌa kaneman varu vai.
Era koputere popi veka,
bia kom taipo emo kaneman varu karao vekaipe?
10 Bo norao veka,
mopu aro beiy awepu aro bombiam mowmow yei Israel,
awirai ve nopurivo.
Awoꞌo nau kupuana ya Yesus Krais vou Nasaret unake,
ta bia emo mare karoi revo ine mopu ero kaneman varu.
Mopu Yesus-a kopututarinaka aꞌai tiriki ya karai,
kopei God-a karao kavariko varu.
11 Yesus,
yaꞌa kave topa vou oꞌro va noavo noroi kupuana,
ta mopu aro oꞌro opao ero kopitoro veka topa emo kotaipo ta konipu.
Ta mare topa emo koneman revo ke oꞌro va noavo noroi kupuana. c
12 Bia raꞌa via kuinyiaiu nako memi varu,
baun ben.
Awoꞌo ya Yesus unake po ta memi aro bombiam vou meꞌri ve kuinyiaiu nekemi revo toratora.
Yaꞌa unake God-a kamompe yaꞌa ke nako memi varu.”
13 Aro beiy ve keyarau ven veka Cha Pita eri Cha Jon yei aro kanapon-a,
via skul-a eraipao.
Ta kepirikei kerai ropi kupuana ta to va kerai irai ta via erai riri vai,
korao veka ta aro beiy-a keririko toro.
Ya keyarau veka,
tija kerai kepi piya minyiao Yesus.
14 Ya kopei kepirikeiya bia emo kom-a keiya neman varu ero,
karoi iꞌiy.
Korao veka ta awirai-ya kowaunkirei ta via kuinyiaiu a va raꞌa nyiraikipepoiy vai.
15 Ya kopei kansol-a kyirai poiy beiyo 3-pla ve oꞌro kansol-a kepepeo ya kenopi upuo,
ya yei kansol po kekepi a va kyirirai.
16 Kekepi ya veku aotere kepao veka,
“To memi keta arape nemao moiy bia riepin evo?
Aro bombiam mowmow kekepi Jerusalem kepirikeo ven mirakol en keraipao.
Ta memi via kuinyia iu nemirai veka ao en keraipao ero,
via awakai vai.
17 Memi via emeremow ke awirai ve noawetari nonoi rorore boko mowmow ke aro bombiam-a nerivo vai.
Korao veka ta memi keta awirai kupuana va nemirai moiy bia riepin ke awoꞌo ve via nyirai poiy aro bombiam-a nerivo vai.”
18 Ya kopei kipia Cha Pita eri Cha Jon kerai nopi piy aꞌari ya awirai kupuana va kyirai poiy veka,
“Mopu via ke awirai-ya norupirai o skul-a norupu poiy aro bombiam row awoꞌo ya Yesus vova vai.
Baun ben.”
19 Kopei Cha Pita eri Cha Jon keraiyiraikipe poiy veka,
“Keta ova nopukinao revo vo,
era koneman iu ine ya God,
taim pa nepikeo awirai mopu o pa nepikeo awirai ya God?
20 Ta mepi viake awirai ve roꞌo va nepi pikim vai.
Mepi keta ao mowmow epipirikere ta epirivo ero keta nepipirai.”
21 Ya kopei kansol-a awirai kupuana ovu vova kyirai poiy ke via ao en neraipao vova vai.
Ya kerokoperiyki kerai nopi.
Ku vou korao veka,
keriri poiy aro bombiam.
Aro bombiam koka ova kekinao pow ao en God-a karao ven ero,
ta inyia awoꞌo yaꞌa kyiavoko nake.
22 Bia emo Cha Pita eri Cha Jon keraiterepoa Biapako ta karao kaneman varu ero,
ainini yaꞌa kotawo ven 40.
Aro kebilip beten-a kepao
23 Ya kopei kerokoperia Cha Pita eri Cha Jon ya kerai nopi piy varu aro yei.
Ya ao mowmow hetpris awei hetman-a kyirai poiy ero kyirai poiy aro yei.
24 Taim aro yei awirai ve kerivo,
ya kekepi rimoꞌo moikera ya beten-a kepao poa God.
Beten-a kepao veka,
“Biapako,
mema uteno kamao,
meꞌri,
nao ta ao prumo kamao kerinyia ero.
25 Tija kamao Holi Spirit-a a va kairai row roꞌo ya apo memi Cha Devit,
bia bo arao roma.
Kairai veka,
‘Aro via yiave Juda,
ova koreiroro revo row arape?
To korao vekaipe ta aro bombiam-a awirai-ya inyia kyirai minyiao ta akai vou kowaun?
26 King mowmow vou meꞌri evo,
kekepi ova kekinao po roma nepao.
Ta yei hetman-a kyiopokeo minyiao ta awirai-ya kyirai minyiao ke roma va nepao warapoa Biapako eri Krais,
bia voro God-a kamompe ke nako yei varu aro bombiam yaꞌa.d’
27 Awirai emo awakai-ya koraonao.
Cha Herot eri Cha Pontius Pailat awei aro via yiave Juda ta yei Israel kekape kyiopokeo minyiao mataimon ve,
ya awirai-ya kyirai minyiao ke Yesus-a nepao poa toro,
bia emo Yesus yaꞌa bia holi bo arao roma ero.
Bia voro mema veku kama mompe yaꞌa ke bo mema narao.
28 Taim ao en kepao,
pa va kepikeo kupuana nau ruru mema ta kameremow norao veka.
Kupuana mema,
ticha mema veku kamairai mow ke ao en keta noraonao.
29 Biapako,
mare keta ova namakinao more awirai ve kyirai em,
kepao kemiriri moiy.
Mema keta nama elpim memi aro bo emao moma ke awirai mema nemirirai nau kupuana mema ta via kuinyia iu nemiriri moiy vai.
30 Ya kopei eno mema nameretai aro a oraie ero ke neneman varu.
Mirakol maramara keta namaremare mow awoꞌo ya Yesus,
bia holi wokman mema.”
31 Kopei taim beten-a kepao ven,
ta oꞌro ve kekepi ero koirereki ya ro va kepe pow Holi Spirit ya kupuana va karoiy.
Ta awirai ya God-a kyirirai ta via eriri.
Aro bombiam kebilip ao yei kewani
32 Aro bombiam mowmow kebilip pova Yesus kekepi rimoꞌo moikera nau ruru moikera po.
Bia raꞌa via kuinyia iu nairai veka ao ya ero,
ero ao ya unake vai.
Baun ben.
Ao voro kerinyia iya disaipel moikera ero,
ero ao yei disaipel mowmow minyiao.
33 Holi Spirit-a kupuana karoiy aposel,
ta awirai kupuana kyirirai veka Biapako Yesus karai ya kopei kavariko varu.
Ya God-a karaoroiy revo aro bombiam mowmow ebilip pova Yesus.
34 Korao veka ta raꞌa yei via ao va owaun reiya vai.
Ku vou korao veka,
aro ve ao ovu yei veka meꞌri,
oꞌro ta ao ovu vova kepoiy aro ovu keko ya kopei ketao va inyia keko kekape poiy varu aposel,
35 ya kopei aposel-a inyia kewani konoi roiy aro bombiam ao va owaun rei ero.
36 Bia raꞌa awoꞌo ya Cha Yosep,
yaꞌa raꞌa yei Livai,
bia em yaꞌa ailan Saiprus.
Aposel-a inyia keipinaka Cha Barnabas.
Awoꞌo ve Barnabas,
korao veka,
bia ya ao neman-a kararao ta awirai neman-a kairirai ke kupuana noroiy aro ovu.e
37 Meꞌri koraꞌa yaꞌa kasalim roa bia raꞌa kako,
ya ketao ve kako ero,
kako kakai karoiy aposel.