Cha Pita karao bia kom taipo raꞌa kaneman varu
3
Rora,
umo karoiki veka 3 kilok bariri,
ya Cha Pita eri Cha Jon keraikope tempel.
Taim ve,
yei Juda beten-a ta inyia kepao.
2 Ya taim ve kerai ute kerai kope,
ya kerai pirikeiya bia kom taipo raꞌa aro ovu kepoinaka kekape.
Kom-a keiyataipo ven ato,
taim baunke karukei rimoꞌo kuro vou moꞌo yaꞌa.
Umumoka beiyo ovu inyia kyiaivia kekape keperia kakei kamo roꞌo vou tempel,
awoꞌo vou keipinao veka “Kamo Neman” ke natere roiy beiyo inyia enopi tempel aꞌari ke ketao va neupoa.
3 Ya kopei taim kapirikeiya Cha Pita eri Cha Jon keraipake nerai nopi tempel aꞌari,
ya katere roiy ke ketao ovu va nerepoa.
4 Ya Cha Pita eri Cha Jon kerai toropukeiya konoi ya Cha Pita kairai roa veka,
“Nama pirikepi vo!”
5 Ya bia emo a va karivo roiy ta karitoro veka ao ovu va nerepoa.
6 Ya kopei Cha Pita kairai roa vova veka,
“Ketao va kowaun rena.
Ta ao en mare kanake nanoma,
row awoꞌo ya Yesus Krais vou Nasaret,
kanairai nama variko ya namaute varu.”
7 Ya Cha Pita kavo iya eno para awakai ya kaiviako ke naroi.
Ya bererenki boratapo nau kapopou va keiya kupuanaki varu.
8 Ya kaopuko karoi nake ya inyia kautute.
Ya kanoi roiy tempel aꞌari ya kaute kaopukaopuko awoꞌo yaꞌa God-a kavoko.
9 Ya kopei taim aro bombiam koka kepirikeiya kaute kanoi awoꞌo ya God-a kavoko,
10 ya keyarau ven veka,
bia ere ta kakeikei tempel kamo roꞌo keipinao Kamo Neman,
ta inyia kaiyro roiy beiyo row ketao.
Ao en korao ta keririko toro ya ova kekinakinao pako.
Cha Pita a va kairirai tempel aꞌari ta aro bombiam-a keririko toro
11 Taim evo bia emo eno va keiyavo Cha Pita eri Cha Jon ya karoi iꞌiy veranda vou tempel keipinao veka,
“Veranda ya Cha Solomon.”
Aro bombiam koka keririko toro row ao en ya praprara kekape bereren ke bia emo nepirikeiya.
12 Kopei taim Cha Pita kapirikei ya kairai roiy veka,
“Mopu aro Israel,
to korao vekaipe ta ao en korao kopu ririko?
To korao vekaipe ta inyia kopu toropu kemi?
Era mopu kopitoro veka memi veku kupuana kuinyia imi o memi kemi neman revo iu ine ya God ta bia emo kemao kaneman ya kaute varu vai?
Bauni ben!
13 God ya Cha Abraham,
Cha Aisak,
Cha Jekop awei aro apo memi,
awoꞌo pako akai-ya kaoroa wokman yaꞌa Yesus.a
Bia emo tija via opu save yaꞌa vai,
ta koperiakipe poiy eno peꞌe yei beiyo taipo ya kepyeiya karai.
Ya kopei taim Pailat-a kairai karake narokoreria Yesus-a nakai upuo,
mopu oreva kopoa ta via operepova Yesus-a nakai upuo vai.b
14 Mopu via operepova revo bia niniu ta bia holi vai.
Ta koputere poa Pailat ke bia voro beiyo va inyia ayei eviri ero narokoreria nakai ropu upuo.
15 Yesus ya bia ku vou naraonami aro bombiam-a nemute mow rara vou laip.
Kopyeiya karai,
ya kopei God-a karao kavariko varu ya laip-a kako varu.
Ya ao en kepi pirikere tapara ve kepirai pore em.
16 Mepi kepi bilip pova Yesus,
ta awoꞌo yaꞌa Yesus-a unake po korao bia emo mare inyia opupirikeiya ero,
kakuprapana varu.
Ku vou korao veka,
mepi kepi bilip pova Yesus tapara yaꞌa veku karao bilip mepi kokupuana.
Ya bilip emo korao ta bia emo kakuprapana varu,
veka mare kopu pirikeiya ine mopu.
17 “Aꞌo,
aro raꞌai,
kana yarau veka mopu awepu aro hetman mopu via opu yarau revo ta ao en kopao poa Yesus.
18 Tija God-a awirai emo kairai row roꞌo yei profet mowmow veka Krais keta nai-ya nako,
ta mare akai-ya koraonao ven.
19 Korao veka ta riꞌi va nopurovoru ya ao taipetaipe nopepereki,
ya nokapepiya God,
ya God-a keta sin mopu napereoki.
20 Bo ao en nopao keta Biapako kupuana tare naropu.
Keta nairairoa bia voro yaꞌa veku kamompe ke nako yei varu aro bombiam yaꞌa,
nararo ipu,
yaꞌa Krais Yesus.
21 Mare keta nakei heven nakeikeo taim voro God-a kamompe ke ao mowmow tare nararerare varu.
Ao en God-a kairai ven tija,
kairai row roꞌo yei holi profet yaꞌa.
22 Ticha Cha Moses kairai veka,
‘God,
Biapako mopu keta nairairoa beiyo raꞌa mopu veku keta bo profet-a narao veka nena veku.
Awirai mowmow nairairopu keta nopurivopoa.
23 Ya beiyo mowmow awirai ya profet ve via eperepow nerivo ero,
God-a keta nayei neviri.
Ta via kuinyia iu nekepi veka aro bombiam yei Israel vai.’ c
24 “Profet Samuel awei profet mowmow ovu kekape pova pa,
awirai ya God-a kyirirai ta awirai vou taim ve minyiao,
ya mare kokai ven.
25 Mopu kokepi veka aro mevova yei profet ta kokepi rovo minyiao kontrak God-a karao iꞌiy aro apo mopu.
Kairai roa Cha Abraham veka,
‘Apo ti mema unake po,
ta aro bombiam mowmow vou meꞌri ve,
keta blesin-a nanoiy.’ d
26 Ya taim God-a wokman yaꞌa karao kavariko,
tija kasalim yaꞌa kakai ipu aro Juda,
ke blesin-a naropu ya narao moike moike mopu ao taipo inyia opao ero nopepere.”