2 —Ndlat lazo'n ngwin re men re',

tak ndala son wiz nzinon xa' nde na'ngenotra xa' jwan' wa xa',

3 tez tata tera wa xa' goned na xa' liz xa',

nax ke' mbiy yek xa' ned,

tak nzo xa' xija nde tij.

4 Le' re xa nak xin' te'd Jesús nchab:

—¿Plo ya xin' jwan' wa reta men re',

tak nche' ngenta kwan nak nde tij nzi re yez?

5 Zya mnabdi's Jesús lo xa':

—¿Pla pan ngeno go'?

Le' xa' mkab:

—Gaza.

6 Zyasa mnabe' Jesús tyob reta men;

mxen Jesús re gaz pan nde mda' Xa' dyux lo Dios,

mblirol Xa'y nde mda' Xa'y lo re xin' te'd Xa',

sa ya thid xa'y lo reta men;

tamod mbli xa'.

7 Noga ngeno xa' pla mbel tya;

taga mda' Xa' dyux lo Dios nde mnabe' Jesús ya thid xa'y lo reta men.

8 Nde mda men axta kebe' mze len' men;

ngolo mne mda reta men,

zyasa mthop xa' reta jwan' mbroxob nde mkata tib gaz chokwida.

9 Lo reta men jwan' nzi tya,

nzi ti thap mil xa',

zyasa mcha's Jesús reta men.

10 Nde ngwap Jesús lo bark kon re xin' te'd Xa' nde nda xa' ten' nak lo xyon Dalmanuta.

11 Tya mzin pla xa' fariseo,

tolo chepa mbrez xa' lo Jesús,

mnab xa' tib yalnaro jwan' nde lo be',

sa libe' xa' nyen' cho liga Dios mtel' Jesús.

12 Zyasa axta mti' lazo' Jesús nde nchab Xa':

—¿Cho kwan ndliy re men nzi naya nchola's xa' lin yalnaro lo xa'?

Nipa na,

ke nek tib yalnaro nalot na lo xa'.

13 Zya mbla' Jesús re men ya nde ngwap xa' lo bark tedib gob,

nda xa' tedib lad ro nitto'.

14 Le' re xin' te'd Jesús mbyaj yek xa' ngwe' xa' jwan' wa xa' lo bark,

ben'ta tipta pan ndano xa'.

15 Zya mnabe' Jesús lo xa',

nchab Jesús:

—Pto nza go' jwan' nin,

nda wi' toz go' kon lebadur chan' re xa' fariseo nde kon lebadur chan' Herodes.

16 Zyasa tolo mdobte xa' nchab xa' lo ta xa':

—Tak nandenod na' pan jwan' nasa ta ne Xa' lon'.

17 Le' Jesús mnela ta nzi bez xa',

zya nchab Jesús lo xa':

—¿Cho tak na'ndenod go' pan jwan' nasa ta nzi bez go'?

¿Cho na'nchonta go' di's,

neka tera yen go'?

¿Cho taja ne yek go'?

18 ¡Ndob ngud lo go' nde nangwid go',

ndob nza go' nde nanchonta go' di's!

¿Cho nek tib go' na'ntela'sta?

19 Sen' lo mdid na re gay' pan lo tib gay' mil mbi',

¿pla chokwid pan jwan' mbroxob mthop go'?

Le' xa' mkab:

—Tib sen na.

20 Nde sen' lo mdid na re gaz pan lo tib tap mil men,

¿pla chokwid pan mbroxob mthop go' sa?

Le' xa' mkab:

—Gaza.

21 Zyasa nchab Jesús lo xa':

—¿Cho kwan ndliy tera yen go' sa?

22 Zyasa mzin Jesús yez Betsaida;

tya mbro' pla men ndeno xa' tib xa' bi' na'akta wi' nde mnab xa' lo Jesús,

xob ya' Jesús xis ngud lo men ta nayiza.

23 Zya mxen Jesús ya' mbi' ta nayiz ngud lon' ya nde mbe' Jesús xa' tib lad ro yez;

tya sa,

mzuk Jesús ngud lo xa' nde mbwal Jesús ngud lo xa' nde mnabdi's Jesús lo xa':

—¿Cho ndoyonila lud loa?

24 Le' mena mbwi' nde mkab xa':

—Toyal wi'n,

per xanya ya,

nya re men ndye xa'.

25 Zyasa bere mbwal Jesús ngud lo xa' nde mbli Jesús mxyal' la.

Tamod mtoxkwa'y,

nawe nambi ngoni lo xa' nde mxyal' ngud lo xa'.

26 Zya mbloned Jesús xa' liz xa' nde nchab Jesús lo xa':

—Na'yad la len' yez nde nagapta luy nek tib lo men nzo tya.

27 Ngolo jwan' na,

Jesús mbro' kon re xin' te'd Xa',

nda xa' re yez jwan' nzi lo xyon Cesarea-Filipo.

Sen' lo ndo xa' ned,

zya mnabdi's Jesús lo re xin' te'd Xa',

nchab Jesús lo xa':

—¿Cho nak na mbez men?

28 Le' xin' te'd Xa' nchab:

—Nzo xa' mbez lu nak Juan Bautist,

nzo xa' mbez lu nak Elías^a nde nzo xa' mbez nak la tiba xa' jwan' mbye'd ta' xki's Dios pola.^b

29 Zyasa nchab Jesús lo xa':

—Mbay go',

¿cho nak na ndli go' xgab?

Le' Pey nchab:

—Lu nak Crist,

Xa' Mtel' Dios.

30 Nde mnabe' Jesús lo xa',

nchab Jesús:

—Nek tib lo men natejta go' jwan' re'.

31 Nde mdobte Jesús mda' xa' kwent,

nchab xa':

—Na Xin' Mbi' mbye'd lo izyo re',

nakin' rid na yalti toz nde kotal xa' na,

re xa' nak sin' lo men Israel,

re ngwley' jwan' nyebe' nde re xa' nak maestr ndlo' ley xki's Dios.

Re xa' ya kuj xa' na,

per yoxob mbyon wiz ryoxban na.

32 Gal' mdej Jesús ke le' Xa' gaj.

Zyasa mbe' Pey Jesús tib lad nde mbrez Pey yek Xa'.

33 Le' Jesús mbyek,

mbwi' Xa' lo re xin' te'd Xa' nde mbrez Xa' yek Pey,

nchab Xa':

—¡Bike lon tak xaja nak Maxu' nak la!

Nandlid la xgab chan' Dios,

le' xgab la nak xaja nak xgab re men lo izyo re'.

34 Zya mbrez Jesús re xin' te'd Xa' kon reta men nzi tya nde nchab Xa':

—Tez nzo go' nchola's tyonke xis na,

bta' go' di's ke Dios nyebe' len' lazo' go',

be' go' kruz go' nde ptonke go' xis na.

35 Tak re men jwan' nchola's tola' yalnaban chan' xa' lo izyo re',

xa' ya ta'b yalnaban adi' jwan' nda' Dios;

nde re men jwan' ta'b yalnaban chan' xa' lo izyo re' por ndli lazo' xa' na nde di's wen chan' Dios,

xa' ya ligan yalnaban adi' jwan' nda' Dios.

36 Tak,

¿cho sin' liy lo men keno men reta jwan' nzo lo izyo re' nde tab men yalnaban adi' nda' Dios?

37 Ngenta cho men li gan kix par lya' xbin men.

38 Nde tez nzo xa' ndyola's gab,

ke ndli lazo' xa' na nde natejta xa' xki's na lo re men jwan' nzob xken',

xa' jwan' mbla' xki's Dios ta nzi naya,

no na,

Xin' Mbi' mbye'd lo izyo re' tola's na nyen men ya sen' lo yal na kon yalne nde xni chan' Xud na Dios nde kon re áng Nayon.