Tu lúzxiba cubi, en tu luyú cubi
21
Gudödi naꞌ biléꞌedaꞌ tu lúzxiba cubi,
en tu luyú cubi,
tuꞌ chigudödi quégaca lúzxiba naꞌ,
en luyú naꞌ gulaꞌcuáꞌ zíꞌalö.
Bítiꞌrö dë nísadoꞌ.
2 Nedaꞌ,
Juan,
biléꞌedaꞌ yödzö láꞌayi naꞌ,
le naca Jerusalén cubi,
ruhuötaj,
rirúaj yehuaꞌ yubá ga zoëꞌ Dios,
en chinabáꞌa que ca nabáꞌa queë́biꞌ biꞌi nigula chizóa utsaga náꞌalenbiꞌ tu bönniꞌ.
3 Biyöndaꞌ ruíꞌi didzaꞌ nu rnna yehuaꞌ yubá:
“¡Buliꞌyútsöcaꞌ!
¡Ga zoëꞌ Dios zóalen bönachi!
¡Sóalenëꞌ léguequi,
ateꞌ léguequi ilácagaca bönachi queëꞌ!
¡Dios caz sóalenëꞌ léguequi,
en gáquiëꞌ Dios quéguequi!
4 Dios uzxíëꞌ nisa ribödxi zoa guiö́j lóguequi.
Cúnturö nu gati,
en cúnturö nu cödxi,
en cúnturö nu cödxi yechiꞌ,
en cúnturö nu quiꞌi sacaꞌ,
tuꞌ chigudödi quégaca lë naꞌ gulaca zíꞌalö.”
5 Níꞌirö Nu naꞌ röꞌö lataj lo niꞌ gunná:
“¡Buyútsöcaꞌ!
¡Yúguꞌtë ruúnaꞌ cubi!”
Gudxi caꞌ nedaꞌ:
“¡Buzúaj lu guichi lë ni,
tuꞌ naca idútë li didzaꞌ ni,
en naca löza!”
6 Níꞌirö gudxi nedaꞌ:
“¡Chinaca caz!
¡Nedaꞌ nacaꞌ Nu zoa zíꞌatëlö,
encaꞌ Nu röjsete ca naca le risí lo,
en le ruúdxitë!
¡Nu ribidxi nisa,
nedaꞌ gunaꞌ ga guíꞌaj nisa naꞌ runna yöl-laꞌ naꞌbán!
7 Nupa ilaꞌdeliꞌ lu le raca yödzölió,
gaca quéguequi yúguꞌtë lë ni.
Nedaꞌ gacaꞌ Dios quéguequi,
ateꞌ léguequi ilácagaca zxíꞌini cazaꞌ,
8 pero nupa tadxi,
en nupa bitiꞌ taꞌyéajlëꞌ nedaꞌ,
en nupa nácagaca xihuiꞌ,
en nupa tuti bönachi,
en nupa tun le bitiꞌ naca tsahuiꞌ,
en nupa nácagaca udzáꞌ,
en nupa taꞌyéaj ládxiꞌgaca budóꞌ guiö́j budóꞌ yaga,
en yúguꞌtë nupa taꞌzíꞌ yëꞌ,
chizóa riböza xilátjaguequi lu guíꞌ,
ga niꞌ röꞌö guíꞌ zxön que lë naꞌ ruzéguiꞌdaꞌ,
lë naꞌ naca yöl-laꞌ guti le raca burópilö.”
Yödzö Jerusalén le naca cubi
9 Níꞌirö tuëꞌ gubáz láꞌayi nababëꞌ gadxëꞌ gubáz láꞌayi niꞌ gulaꞌzönëꞌ gadxi zxígaꞌdoꞌ yúdxugaca gadxi yödzöhuë́ꞌ yöjsétegaca,
bidëꞌ ga zoaꞌ.
Gudxëꞌ nedaꞌ:
“¡Gudá ni!
¡Uluíꞌidaꞌ liꞌ biꞌi nigula naꞌ siꞌ utsaga náꞌalenbiꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ!”
10 Guzóalenëꞌ Dios Böꞌ Láꞌayi nedaꞌ,
ateꞌ guchë́ꞌë gubáz láꞌayi naꞌ nedaꞌ tu lu guíꞌa sibi,
en buluíꞌinëꞌ nedaꞌ yödzö láꞌayi Jerusalén,
ruhuötaj,
rirúaj yehuaꞌ yubá ga zoëꞌ Dios.
11 Yödzö ni rëpi yösa beníꞌ tuꞌ zóalen le yöl-laꞌ beníꞌ queëꞌ Dios.
Rëpi yösa beníꞌ ca rëpi yösa beníꞌ tu guiö́j nazácaꞌdaꞌ ca naca guiö́j guíꞌdoꞌos nazíꞌi le jaspe.
Naca yödzö naꞌ yeníꞌidoꞌ ca naca guiö́j jara.
12 Zoa tu zöꞌö zxön,
en sibi idú gásibiꞌilö yödzö naꞌ.
Lëꞌe zöꞌö naꞌ nacuáꞌ chinnu gapa nu riyaza.
Raꞌ gapa nu riyaza naꞌ nacuꞌë chínnuëꞌ gubáz láꞌayi tapa chiꞌë.
Tu tu ga nu riyaza naꞌ nazúaj tu tu lágaca idxinnu cöꞌ diꞌa dza zxíꞌini xiꞌsóëꞌ Israel.
13 Lëꞌe zöꞌö le ruyú sacaꞌ ga rilén gubidza nacuáꞌ tsonna gapa nu riyaza,
en sacaꞌ ga zaꞌ böꞌ ziaga nacuáꞌ tsonna gapa nu riyaza,
en sacaꞌ tsöláꞌa ga ridödi gubidza beoꞌ ziaga nacuáꞌ tsonna gapa nu riyaza,
en sacaꞌ ga ribía gubidza nacuáꞌ caꞌ tsonna gapa nu riyaza.
14 Zxan zöꞌö que yödzö naꞌ nacuáꞌ chinnu xilibi zöꞌö,
ateꞌ lë́ꞌegaca xilibi zöꞌö naꞌ nazúajgaca lágaquiëꞌ idxínnutëꞌ bönniꞌ gubáz queëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ.
15 Gubáz láꞌayi naꞌ ruíꞌilenëꞌ nedaꞌ didzaꞌ zönëꞌ tu yaga urixi le néquini oro para urixëꞌ tsca naca yödzö naꞌ,
en tsca nácagaca gapa nu riyaza,
en tsca naca zöꞌö que.
16 Yödzö naꞌ,
lédiꞌi nácagaca idapa laꞌa.
Lédiꞌi naca yöl-laꞌ tunna que,
en yöl-laꞌ blagaꞌ que.
Len yaga naꞌ burixëꞌ tsca naca yödzö naꞌ,
naca idú tsca gaca nu saꞌ idú chinnu dza,
ateꞌ lédiꞌi naca yöl-laꞌ tunna que,
en yöl-laꞌ xitsáꞌ que,
en yöl-laꞌ bölágaꞌ que.
17 Burixëꞌ caꞌ yöl-laꞌ yödx que zöꞌö naꞌ,
naca tu gayuáꞌ yuꞌ tapa-un dxita,
tsca naca dxita que naꞌ bönachi,
lë naꞌ ruríxinëꞌ gubáz láꞌayi naꞌ.
18 Zöꞌö naꞌ néquini guiö́j jaspe,
ateꞌ yödzö naꞌ néquini órotëz,
le naca yeníꞌidoꞌ ca naca guiö́j jara.
19 Yuguꞌ xilibi zöꞌö que yödzö naꞌ nazíꞌgaca biquitaj guiö́j nazácaꞌdaꞌgaca.
Xilibi zöꞌö zíꞌalö néquini guiö́j jaspe.
Le buropi néquini guiö́j zafiro.
Le bunni néquini guiö́j ágata.
Le budapi néquini guiö́j esmeralda.
20 Le guyuꞌ néquini guiö́j ónice.
Le buzxopi néquini guiö́j cornalina.
Le igadxi néquini guiö́j crisólito.
Le izxunuꞌ néquini guiö́j berilo.
Le igá néquini guiö́j topacio.
Le idxí néquini guiö́j crisoprasa.
Le idxinéaj néquini guiö́j jacinto.
Le idxinnu néquini guiö́j amatista.
21 Chinnu gapa nu riyaza naꞌ taꞌyáyjani chinnu bugá.
Tu tu ga nu riyaza naꞌ riyáyjani tuz bugá.
Luyú laꞌ nöza lo que yödzö naꞌ néquini órotëz,
le naca yeníꞌidoꞌ ca naca guiö́j jara.
22 Bitiꞌ biléꞌedaꞌ tu yudoꞌ lu yödzö naꞌ,
tuꞌ náquiëꞌ Xanruꞌ Dios yudoꞌ que,
napa cazëꞌ idútë yöl-laꞌ unná bëꞌ,
en lëscaꞌ caní náquiëꞌ Bönniꞌ náquiëꞌ Böꞌcuꞌ Zxílaꞌdoꞌ,
náquiëꞌ yudoꞌ que yödzö naꞌ.
23 Bitiꞌ run bayudxi tseníꞌgaca gubidza,
en beoꞌ lu yödzö naꞌ,
tuꞌ uzeníꞌ yöl-laꞌ beníꞌ queëꞌ Dios lu yödzö naꞌ,
ateꞌ lëscaꞌ Bönniꞌ náquiëꞌ Böꞌcuꞌ Zxílaꞌdoꞌ náquiëꞌ le uzeníꞌ niꞌ.
24 Bönachi yuguꞌ yödzö,
nupa nulágaca,
ilaꞌdá lu beníꞌ que yödzö naꞌ,
ateꞌ yuguꞌ bönniꞌ taꞌnná bëꞌë yödzölió idiguáꞌagaquiëꞌ yöl-laꞌ tsahuiꞌ quégaquiëꞌ lu yödzö naꞌ.
25 Catu caz tsáyajgaca gapa nu riyaza lu yödzö naꞌ lahuiꞌ dza,
ateꞌ lataj naꞌ catu caz gaca rëla.
26 Bönachi yuguꞌ yödzö idiguáꞌagaquiëꞌ niꞌ le nácagaca lesacaꞌ,
en yöl-laꞌ tsahuiꞌ quéguequi.
27 Tu le ruáꞌ döꞌ bitiꞌ caꞌ tsaza niꞌ,
en calëga tu le naca xihuiꞌ,
en calëga nu rizíꞌ yëꞌ,
pero tsázagacasö niꞌ nupa nazúajgaca láguequi lu guichi queëꞌ Bönniꞌ náquiëꞌ Böꞌcuꞌ Zxílaꞌdoꞌ,
ga naꞌ nazúajgaca lágaca nupa nadéliꞌgaca yöl-laꞌ naꞌbán.