22
Níꞌirö gubáz láꞌayi naꞌ buluíꞌinëꞌ nedaꞌ tu yegu yeníꞌidoꞌ,
le naca nisa yegu le runna yöl-laꞌ naꞌbán.
Rëpi yösa beníꞌ yegu naꞌ ca rëpi yösa beníꞌ guiö́j jara.
Rirúaj yegu naꞌ lu lataj lo ga röꞌë Dios,
en ga röꞌë caꞌ Bönniꞌ náquiëꞌ Böꞌcuꞌ Zxílaꞌdoꞌ.
2 Rizáꞌ yegu ni gatsaj láhuiꞌlö nöza lo que yödzö naꞌ.
Tsöláꞌa huéaj raꞌ yegu naꞌ röꞌö tu yaga le runna yöl-laꞌ naꞌbán,
ateꞌ taꞌbía chinnu luzuí tu iz.
Tu tu beoꞌ taꞌbía yaga naꞌ.
Xiláguiꞌgaca yaga naꞌ nácagaca le tuꞌún bönachi yuguꞌ yödzö.
3 Bitiꞌ soa niꞌ nitú le dxía döꞌ.
Soa lu yödzö naꞌ lataj lo ga röꞌë Dios,
encaꞌ ga röꞌë Bönniꞌ náquiëꞌ Böꞌcuꞌ Zxílaꞌdoꞌ,
ateꞌ yuguꞌ huen dxin queëꞌ ilaꞌyéaj ládxiꞌgaquiëꞌ Lëꞌ.
4 Ilaꞌléꞌenëꞌ lahuëꞌ Lëꞌ,
ateꞌ le nazíꞌi Lëꞌ nazúaj raꞌ xigágaquiëꞌ.
5 Bitiꞌ gaca rëla niꞌ,
ateꞌ nupa nacuáꞌ niꞌ bitiꞌ ilaꞌquínna tu le cuꞌu beníꞌ,
en calëga beníꞌ que gubidza,
tuꞌ gáquiëꞌ Xanruꞌ Dios beníꞌ quégaquiëꞌ.
Nupa nacuáꞌ niꞌ ilaꞌnná bë́ꞌticaꞌsö.
Chizóa huödëꞌ Cristo
6 Níꞌirö gubáz láꞌayi naꞌ gudxëꞌ nedaꞌ,
gunnë́ꞌ:
“Didzaꞌ ni naca idútë li,
en naca löza.
Xanruꞌ Dios,
Nu ruchiza Böꞌ Láꞌayi icja ládxiꞌdoꞌgaquiëꞌ yuguꞌ bönniꞌ tuꞌë didzaꞌ uláz queëꞌ,
chigusö́l-lëꞌë gubáz láꞌayi queëꞌ para uluíꞌinëꞌ yuguꞌ huen dxin queëꞌ le ral-laꞌ gácatë.
7 Caní rnnëꞌ Jesucristo:
¡Chizóa huödaꞌ!
¡Bicaꞌ ba nu run ca rnna didzaꞌ ruáꞌa uláz queëꞌ Dios,
le nazúaj lu guichi ni!”
8 Nedaꞌ,
Juan,
biyöndaꞌ,
en biléꞌedaꞌ yuguꞌ lë ni.
Gudödi biyöndaꞌ,
en biléꞌedaꞌ yuguꞌ lë ni,
buzóa zxibaꞌ xiniꞌë gubáz láꞌayi naꞌ buluíꞌinëꞌ nedaꞌ yuguꞌ lë ni para gunaꞌ lëꞌ zxön.
9 Níꞌirö lëꞌ gudxëꞌ nedaꞌ:
“Bitiꞌ gunuꞌ caní,
tuꞌ nacaꞌ nedaꞌ huen dxin queëꞌ Dios ca nacuꞌ liꞌ,
en ca nácagaquiëꞌ böchiꞌ luzóꞌo naꞌ tuꞌë didzaꞌ uláz queëꞌ Dios,
encaꞌ ca nácagaca yúguꞌtë nupa tun ca rnna le nazúaj lu guichi ni.
¡Ben zxön Dios!”
10 Gudxëꞌ caꞌ nedaꞌ:
“Bitiꞌ ucachuꞌu xtídzëꞌë Dios ni,
didzaꞌ ruáꞌa uláz queëꞌ,
en nazúaj lu guichi ni,
tuꞌ chizóa ilaca yuguꞌ lë ni.
11 Nu ruáꞌ döꞌ guáꞌticaꞌsö döꞌ.
Nu run le cabí naca tsahuiꞌ gúnticaꞌsö le cabí naca tsahuiꞌ.
Nu run dxiꞌa,
gúnticaꞌsö dxiꞌa,
ateꞌ nu nequi quez queëꞌ Dios,
guéquiticaꞌsö quez queëꞌ.”
12 Rnnëꞌ Jesús:
“¡Chizóa huödaꞌ!
Nuꞌa lu naꞌa le nadéliꞌgaca bönachi,
ateꞌ ubiꞌa que queë́guequi tsca naca le gulúngaca.
13 Nedaꞌ nacaꞌ Nu zoa zíꞌatëlö,
encaꞌ Nu röjsete,
ca naca le risí lo,
en le ruúdxitë.
Nacaꞌ caꞌ Nu run ga risí lo,
en Nu rusiúdxi.”
14 Níꞌirö gunnë́ꞌ:
“¡Bicaꞌ ba nupa nayari le nácugaca,
en tun le naca dxiꞌa!
¡Nazíꞌguequi lataj ilahuëꞌ le ribía yaga le runna yöl-laꞌ naꞌbán,
en gaca ilaꞌyaza gapa nu riyaza lu yödzö naꞌ!
15 Nupa nácagaca xihuiꞌ,
en nupa nácagaca udzáꞌ,
en nupa tun le ruáꞌ döꞌ,
en nupa tuti bönachi,
en nupa taꞌyéaj ládxiꞌgaca budóꞌ guiö́j budóꞌ yaga,
en nupa taꞌyaza ládxiꞌgaca taꞌzíꞌ yëꞌ ilaꞌcuáꞌ níꞌilö raꞌ yödzö naꞌ.
16 Nedaꞌ,
Jesús,
gusö́l-laꞌa gubáz láꞌayi quiaꞌ,
ateꞌ buluíꞌinëꞌ libíꞌiliꞌ yuguꞌ lë ni,
libíꞌiliꞌ naꞌ dzágaliꞌ yuguꞌ cöꞌ bönachi quiaꞌ.
Nedaꞌ nacaꞌ diꞌa dza queëꞌ David,
encaꞌ zxíꞌini xiꞌsóëꞌ.
Nacaꞌ caꞌ bölaj hui sila.”
17 Tuꞌë didzaꞌ Dios Böꞌ Láꞌayi,
encaꞌ biꞌi nigula utsaga náꞌalenbiꞌ-nëꞌ Bönniꞌ náquiëꞌ Böꞌcuꞌ Zxílaꞌdoꞌ,
taꞌnnë́ꞌ:
“¡Gudá!”
Nu riyöni didzaꞌ ni ral-laꞌ inná:
“¡Gudá!”
¡Nu ribidxi nisa,
en nu rizë́ ladxiꞌ le,
ral-laꞌ guídi,
en guíꞌaj nisa le runna yöl-laꞌ naꞌbán!
18 Nedaꞌ,
Juan,
ruzéajniꞌidaꞌ nupa taꞌyöni didzaꞌ ni ruáꞌa uláz queëꞌ Dios,
en nazúaj lu guichi ni,
rnníaꞌ:
Channö nu udáꞌ lëꞌe didzaꞌ ni,
Dios ubiꞌë que nu naꞌ.
Gunëꞌ lëꞌ xíguiaꞌ ca naca le nazúajgaca lu guichi ni.
19 Lëscaꞌ caní,
channö nu cúa bítiꞌtës didzaꞌ ni ruáꞌa uláz queëꞌ Dios,
en nazúaj lu guichi ni,
Dios ugǘëꞌ caꞌ xilataj nu naꞌ lu guichi ga nazúajgaca lágaca nupa nadéliꞌgaca yöl-laꞌ naꞌbán idú,
encaꞌ lu yödzö láꞌayi,
ca naꞌ nazúaj quéguequi lu guichi ni.
20 Xanruꞌ,
Nu run ba nalí quéguequi lë ni rnnëꞌ:
“¡Ön!
¡Huödateaꞌ!”
¡Caꞌ gaca!
¡Gudá,
Xantuꞌ Jesús!
21 Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ yúguꞌtëliꞌ.
¡Caꞌ gaca!