Chi gayuáꞌ iz
20
Gudödi lë ni biléꞌedaꞌ ruhuötjëꞌ tu gubáz láꞌayi,
zëꞌë yehuaꞌ yubá,
en zönëꞌ zxíꞌini guíë que lataj chul-la,
ateꞌ nuꞌë tu du guíë yödx.
2 Guzxönëꞌ-baꞌ bëla zxön xitsiníꞌ naꞌ,
nácabaꞌ bëla guzóabaꞌ dza niꞌte,
bëla naꞌ lëbaꞌ Tuꞌ Xihuiꞌ,
encaꞌ Satanás,
ateꞌ béguëꞌë-baꞌ,
en bucáꞌanëꞌ-baꞌ caní chi gayuáꞌ iz.
3 Yöjchúꞌunëꞌ-baꞌ lataj chul-la,
en busayjëꞌ lataj naꞌ,
ateꞌ budë́ꞌë tu le riguelaꞌ le rusayaj lataj naꞌ para cabirö siꞌ yéꞌebaꞌ bönachi yuguꞌ yödzö ga izáꞌarö chi gayuáꞌ iz naꞌ,
ateꞌ tödi niꞌ ral-laꞌ yédxibaꞌ tu chíꞌidoꞌ.
4 Níꞌirö biléꞌedaꞌ yuguꞌ lataj gapa taꞌbö́ꞌ nupa taꞌnná bëꞌ,
ateꞌ nupa bilaꞌdeliꞌ uluꞌchiꞌa uluꞌsörö́ le raca taꞌbö́ꞌ yuguꞌ lataj naꞌ.
Biléꞌedaꞌ caꞌ yuguꞌ böꞌ gulaca caz bönachi buluꞌrixëꞌ yénguequi yuguꞌ bönniꞌ bitiꞌ nácagaquiëꞌ tsahuiꞌ tuꞌ gulún ba nalí queëꞌ Jesús,
en tuꞌ gulún libán que xtídzëꞌë Dios.
Yuguꞌ bönachi ni bitiꞌ gulaꞌyéaj ládxiꞌgaca böaꞌ síniaꞌ naꞌ,
en budóꞌ queë́baꞌ,
en bitiꞌ guluíꞌi lataj nu uzúaj raꞌ xigáguequi,
o lu në́ꞌeguequi lë naꞌ naca bëꞌ nu daꞌ lëbaꞌ.
Buluꞌbán nupa ni lu yöl-laꞌ guti,
ateꞌ gulaꞌnná bë́ꞌlen Cristo chi gayuáꞌ iz,
5 pero iaꞌzícaꞌrö bönachi nátigaca bitiꞌ buluꞌbán.
Cateꞌ izáꞌarö chi gayuáꞌ iz naꞌ uluꞌbán.
Yöl-laꞌ rubán lu yöl-laꞌ guti guca ni naca le raca zíꞌalö.
6 ¡Bicaꞌ ba,
en bicaꞌ láꞌayi nupa taꞌdeliꞌ yöl-laꞌ rubán naꞌ raca zíꞌalö!
¡Yöl-laꞌ guti le raca burópilö bitiꞌ bi gaca gun quéguequi,
pero ilácagaca bixúz queëꞌ Dios,
encaꞌ queëꞌ Cristo,
ateꞌ ilaꞌnná bë́ꞌlen Lëꞌ chi gayuáꞌ iz naꞌ!
7 Cateꞌ izáꞌa chi gayuáꞌ iz naꞌ,
uluꞌsanëꞌ Satanás ga naꞌ nadzún.
8 Urúaj Satanás,
en tsöjzxíꞌ yeꞌe bönachi yuguꞌ yödzö nacuáꞌ idapa laꞌa yödzölió.
Siꞌ yeꞌe caꞌ bönachi yödzö Gog,
en yödzö Magog,
ateꞌ utubi léguequi lu gudil-la.
Tsca nácagaca nupa ni,
nácagaca ca naca yuzxi röꞌö tu raꞌ yegu zxön.
9 Guizxi yusö gulaꞌdödëꞌ idútë luyú,
ateꞌ gulaꞌcuꞌë lë́ꞌajlö lataj ga naꞌ nacuáꞌ bönachi néquiguequi queëꞌ Cristo,
le naca yödzö naꞌ nadxíꞌinëꞌ Dios.
Níꞌirö benëꞌ Dios ga böxaj guíꞌ le birúaj yehuaꞌ yubá,
le buzeguiꞌ légaquiëꞌ.
10 Tuꞌ xihuiꞌ naꞌ nazíꞌ yeꞌe légaquiëꞌ,
yöjchúꞌunagaquiëꞌ le ga röꞌö guíꞌ zxön que lë naꞌ ruzéguiꞌdaꞌ,
ga naꞌ chizóabaꞌ böaꞌ síniaꞌ naꞌ,
encaꞌ bönniꞌ naꞌ bëꞌë didzaꞌ uláz queë́baꞌ.
Ilaꞌguíꞌi ilaꞌzacaꞌ niꞌ rëla,
en te dza yúguꞌtë iz záꞌgaca.
Taꞌdxín bönachi lahuëꞌ Dios ga röꞌë ruchiꞌa rusörö́ëꞌ
11 Níꞌirö biléꞌedaꞌ tu lataj lo chiguichi,
en biléꞌedaꞌ caꞌ Nu röꞌö ruchiꞌa rusörö́ëꞌ lataj naꞌ.
Lahuiꞌ lo Nu ni gulaꞌnítitë yödzölió,
en lúzxiba,
ateꞌ bítiꞌrö budzöli xilátjaguequi.
12 Biléꞌedaꞌ caꞌ nupa chinátigaca,
nupa nácagaca lo,
en nupa nácagaca cáꞌasö,
zuíguequinëꞌ lahuëꞌ Dios.
Gulaꞌyálaj guichi,
en guyalaj caꞌ iaꞌtú guichi ga naꞌ nazúajgaca lágaca nupa nadéliꞌgaca yöl-laꞌ naꞌbán idú.
Buchiꞌa busörö́ëꞌ Dios nupa naꞌ chinátigaca tsca naca le nazúaj yuguꞌ lu guichi naꞌ,
lë naꞌ gulúngaca.
13 Lu nísadoꞌ buluꞌrúaj nupa chinátigaca,
nacuáꞌ lu nísadoꞌ.
Lu yöl-laꞌ guti,
en lu lataj chul-la buluꞌrúaj nupa chinátigaca,
gulaꞌcuáꞌ gapa niꞌ,
ateꞌ buchiꞌa busörö́ëꞌ Dios tu tu tsca naca le gulúngaca.
14 Níꞌirö yöjtsázagaca yöl-laꞌ guti,
en lataj chul-la ga niꞌ röꞌö guíꞌ zxön le naca lataj que yöl-laꞌ guti le raca burópilö.
15 Nupa bitiꞌ nazúajgaca lu guichi quégaca nupa nadéliꞌgaca yöl-laꞌ naꞌbán idú yöjtsázagaca lataj naꞌ.