19
Gudödi lë ni biyöndaꞌ tuíꞌi zidzaj didzaꞌ bönachi zián nacuáꞌ yehuaꞌ yubá,
taꞌnná:
¡Yöl-laꞌ ba Dios!
¡Yöl-laꞌ rusölá runëꞌ,
ateꞌ yöl-laꞌ zxön,
en yöl-laꞌ unná bëꞌ napëꞌ Dios queë́ruꞌ!
2 ¡Naca idútë li,
en tsahuiꞌ ca rusiúdxëꞌ!
¡Guchúguiëꞌ que yödzö naꞌ naca ca tu nigula udá dzaga,
en quégaca bönachi lu yödzö naꞌ ilaꞌniti tsaz!
¡Gulún ditaj bönachi yödzölió tuꞌ nözi le ruáꞌ döꞌ gulunëꞌ!
¡Dios buzíꞌ lëbëꞌ légaquiëꞌ
tuꞌ gulútiëꞌ yuguꞌ huen dxin queëꞌ!
3 Leyúbölö gulaꞌnnë́ꞌ:
“¡Yöl-laꞌ ba Dios!
¡Cuénticaꞌsö dzön ga régui yödzö naꞌ!”
4 Idapa uruꞌë bönniꞌ gula niꞌ buluꞌtsaga lógaquiëꞌ lu yu tsözxö́n len idapa nupa niꞌ nabángaca,
en taꞌyéaj ládxiꞌgaquiëꞌ Dios,
Bönniꞌ röꞌë lataj lo queëꞌ.
Gulaꞌnnë́ꞌ:
“¡Caꞌ gaca!
¡Yöl-laꞌ ba Dios!”
5 Níꞌirö biyöndaꞌ ruíꞌi didzaꞌ tu nu zoa lataj lo naꞌ,
rnna:
¡Guliꞌcuꞌë Dios queë́ruꞌ yöl-laꞌ ba
yúguꞌtëliꞌ runliꞌ xichinëꞌ,
libíꞌiliꞌ naꞌ rádxiliꞌ Lëꞌ,
nácaliꞌ bönachi cáꞌasö,
en bönachi lo!
Laní que yöl-laꞌ rutsaga naꞌ queëꞌ Bönniꞌ náquiëꞌ Böꞌcuꞌ Zxílaꞌdoꞌ
6 Biyöndaꞌ caꞌ nu ruíꞌi zidzaj didzaꞌ,
le biyö́n ca riyö́n cateꞌ tuíꞌi didzaꞌ bönachi zián,
en biyö́n caꞌ ca riyö́n ga ridödi tu yegu zxön,
o ca riyö́n cateꞌ rinnë́ guziúꞌ,
ateꞌ rnna:
¡Yöl-laꞌ ba Dios tuꞌ risí lahuëꞌ rinná bëꞌë!
¡Napa cazëꞌ yöl-laꞌ huáca!
7 ¡Ral-laꞌ udzeja ládxiꞌruꞌ,
en uzíꞌiruꞌ xibë́ꞌ,
en cúꞌuruꞌ-nëꞌ yöl-laꞌ ba
tuꞌ chibidxín dza laní que yöl-laꞌ rutsaga naꞌ
queëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ!
¡Siꞌ lu nëꞌë Cristo nupa néquiguequi queëꞌ!
¡Chinabáꞌa queë́biꞌ biꞌi utsaga náꞌalenbiꞌ Lëꞌ!
¡Nácabiꞌ le ruluíꞌi nupa naꞌ néquiguequi queëꞌ!
8 ¡Dios ruꞌë-biꞌ lataj gácubiꞌ lariꞌ nazácaꞌdaꞌ
le naca idú,
en rëpi yösa beníꞌ!
Lariꞌ nazácaꞌdaꞌ naꞌ ruluíꞌi le naca tsahuiꞌ núngaca nupa néquiguequi queëꞌ Dios.
9 Níꞌirö gubáz láꞌayi naꞌ gudxëꞌ nedaꞌ,
gunnë́ꞌ:
“Buzúaj lu guichi didzaꞌ ni:
¡Bicaꞌ bágaca nupa naꞌ nulidzëꞌ Dios légaquiëꞌ para ilaꞌcuꞌë laní que yöl-laꞌ rutsaga naꞌ queëꞌ Bönniꞌ náquiëꞌ Böꞌcuꞌ Zxílaꞌdoꞌ!”
Gudxëꞌ caꞌ nedaꞌ:
“¡Yuguꞌ didzaꞌ idútë li ni ruꞌë didzaꞌ Dios caz!”
10 Buzóa zxibaꞌ xiniꞌë gubáz láꞌayi naꞌ para tseaj ládxaꞌa lëꞌ,
pero gudxëꞌ nedaꞌ:
“¡Bitiꞌ gunuꞌ caní!
Nedaꞌ caꞌ nacaꞌ huen dxin queëꞌ Dios ca nacuꞌ liꞌ,
en ca nácagaquiëꞌ böchiꞌ luzóꞌo nazíꞌ lu náꞌagaquiëꞌ le naca idútë li ca naca queëꞌ Jesús.
¡Guyéaj ládxëꞌë Dios!”
Nupa tuíꞌi didzaꞌ uláz queëꞌ Dios,
tuíꞌi didzaꞌ le naca idútë li ca naca queëꞌ Jesús.
Bönniꞌ dxíëꞌ-baꞌ böaꞌ chiguichi
11 Níꞌirö biléꞌedaꞌ nayalaj lúzxiba,
ateꞌ buluíꞌi lobaꞌ tubaꞌ böaꞌ chiguichi,
ateꞌ lëꞌ Bönniꞌ dxíëꞌ-baꞌ,
Nu Run Ca Rnna,
encaꞌ Nu Ruíꞌi Didzaꞌ Le Nácatë.
Caní lëꞌ tuꞌ ruchiꞌa rusörö́ëꞌ ca naca le naca idútë li,
encaꞌ caní tsejëꞌ gudil-la.
12 Rëpi yösa beníꞌ guiö́j lahuëꞌ,
le nácagaca ca guíꞌ,
en dxíagaca icjëꞌ zián le néquiguequini oro.
Nazúaj lahuëꞌ tu le lëꞌ,
le cuntu nu nözi,
pero tuzëꞌ Lëꞌ nö́zinëꞌ.
13 Nácuëꞌ tu lariꞌ nëꞌaj rön,
en lëꞌ caꞌ “Nu Naca Xtídzëꞌë Dios.”
14 Röjnógaquiëꞌ Lëꞌ niꞌa nëꞌë guizxi yu nacuꞌë yehuaꞌ yubá,
dxíagaquiëꞌ-baꞌ böaꞌ chiguichi,
en nácugaquiëꞌ lariꞌ nazácaꞌdaꞌ,
le naca chiguíchidoꞌos,
en bitiꞌ naca bösaj.
15 Rirúaj ruꞌë le naca ca tu guíë tuchiꞌ le gúninëꞌ ziꞌ bönachi yuguꞌ yödzö.
Inná béꞌenëꞌ légaquiëꞌ len tu xiyaga guíë,
en gunëꞌ légaquiëꞌ xíguiaꞌ,
le gaca quégaquiëꞌ ca raca que le ribía lubá uva,
zoa nu rulibi léguequi,
tuꞌ rilédeꞌenëꞌ Dios,
Bönniꞌ napa cazëꞌ yöl-laꞌ unná bëꞌ.
16 Nazúaj lu lariꞌ nácuëꞌ,
encaꞌ lu xigatsjëꞌ ca lëꞌ,
“Bönniꞌ Rinná Béꞌenëꞌ Nupa Taꞌnná Bëꞌ”,
encaꞌ “Bönniꞌ Náquiëꞌ Xángaca Nupa Nácagaca Xan.”
17 Níꞌirö biléꞌedaꞌ-nëꞌ tuëꞌ gubáz láꞌayi zuínëꞌ lu gubidza,
ateꞌ bëꞌë zidzaj didzaꞌ,
en gudxëꞌ-baꞌ böaꞌ taꞌdabaꞌ lúzxiba,
rnnëꞌ:
“¡Guliꞌdá,
buliꞌdubi ga ni gáguliꞌ laní zxön queëꞌ Dios!
18 Gáguliꞌ xipë́laꞌgaca nupa taꞌnná bëꞌ,
en xipë́laꞌgaca nupa taꞌnná beꞌe bönniꞌ röjáquiëꞌ gudil-la,
en xipë́laꞌgaca nupa nál-lagaca,
en xipë́laꞌgacabaꞌ böaꞌ,
en xipë́laꞌgaca nupa taꞌbía légacabaꞌ,
en xipë́laꞌgaca yúguꞌtë bönachi,
nupa bitiꞌ nadóꞌogaca,
en nupa nadóꞌogaca,
nupa nácagaca cáꞌasö,
en nupa nácagaca lo.”
19 Níꞌirö biléꞌedaꞌ-baꞌ böaꞌ síniaꞌ naꞌ,
encaꞌ yuguꞌ bönniꞌ taꞌnná bëꞌë yödzölió,
en bönniꞌ röjáquiëꞌ gudil-la guizxi yu quégaquiëꞌ,
nudúbigaquiëꞌ para ilúnlenëꞌ gudil-la Bönniꞌ dxíëꞌ-baꞌ böaꞌ chiguichi,
dzágagaca Lëꞌ niꞌa nëꞌë guizxi yu.
20 Bidzunbaꞌ böaꞌ síniaꞌ naꞌ,
encaꞌ bönniꞌ naꞌ bëꞌë didzaꞌ uláz queë́baꞌ,
bönniꞌ naꞌ benëꞌ yuguꞌ le nácadaꞌ bëꞌ lobaꞌ,
en guzxíꞌ yéꞌenëꞌ nupa niꞌ guluíꞌi lataj nu uzúaj láhuiguequi lë naꞌ naca bëꞌ dáꞌgaca lëbaꞌ,
en gulaꞌyéaj ládxiꞌgaca budóꞌ queë́baꞌ.
Böaꞌ síniaꞌ naꞌ,
encaꞌ bönniꞌ naꞌ bëꞌë didzaꞌ uláz queë́baꞌ,
gulaꞌrúꞌunëꞌ léguequi nabángacasö caꞌ ga röꞌö guíꞌ zxön le réguilen lë naꞌ ruzéguiꞌdaꞌ.
21 Bönniꞌ naꞌ dxíëꞌ-baꞌ böaꞌ chiguích bë́tiëꞌ yúguꞌtë nupa naꞌ gudáꞌgaca léguequi len guíë tuchiꞌ naꞌ rirúaj ruꞌë,
ateꞌ buluꞌhuö́ljabaꞌ yúguꞌtëbaꞌ böaꞌ naꞌ taꞌdabaꞌ lúzxiba,
tuꞌ gulágubaꞌ xipë́laꞌguequi.