Riguinnaj yödzö Babilonia
18
Gudödi naꞌ biléꞌedaꞌ-nëꞌ iaꞌtúëꞌ gubáz láꞌayi ruhuötjëꞌ rirúajëꞌ yehuaꞌ yubá,
en dë lu nëꞌë yöl-laꞌ unná bëꞌ zxön,
ateꞌ guyëpi yösa beníꞌ luyú niꞌa que yöl-laꞌ beníꞌ queëꞌ gubáz láꞌayi naꞌ.
2 Bëꞌë zidzaj didzaꞌ gubáz láꞌayi naꞌ,
gunnë́ꞌ:
¡Chibiguínnaj!
¡Chibiguínnaj Babilonia,
yödzö zxön naꞌ!
¡Chiböáca xilataj tuꞌ xihuiꞌ,
en xilátjagaca böꞌ xihuiꞌ tun ditaj bönachi!
¡Yuguꞌ biguínni xitsiníꞌ,
en yuguꞌ biguínni xihuiꞌ tuꞌzóabaꞌ xilátajgacabaꞌ niꞌ!
3 Caní guca que yödzö naꞌ niꞌa que le gulún bönachi nacuáꞌ niꞌ.
Gulunëꞌ ga gulún bönachi yúguꞌtë yödzö ca nácagaca le taꞌzësö ladxiꞌ le ruáꞌ döꞌ.
Nupa taꞌnná bëꞌ luyú yödzölió gulunlen légaquiëꞌ le ruáꞌ döꞌ,
ateꞌ gutaꞌ yöl-laꞌ tsahuiꞌ quégaquiëꞌ bönniꞌ toꞌo tutiꞌ nacuꞌë yödzölió
tuꞌ guyándaꞌ yuguꞌ le nazacaꞌ gulaꞌzë́ ladxiꞌ bönachi niꞌ.
4 Níꞌirö biyöndaꞌ ruíꞌi didzaꞌ iaꞌtú nu zoa yehuaꞌ yubá,
rnna:
Guliꞌrúaj lu yödzö naꞌ,
libíꞌiliꞌ néquiliꞌ quiaꞌ
para cabí gunliꞌ dul-laꞌ tsözxö́n len légaquiëꞌ,
en para cabí quíꞌi sácaꞌliꞌ le gaca quégaquiëꞌ.
5 Nayándaꞌ dul-laꞌ nabágaꞌgaquiëꞌ,
en chinayasa nadxín caz lúzxiba,
pero Dios röjnenëꞌ le ruáꞌ döꞌ núngaquiëꞌ.
6 Buliꞌbíꞌi quégaquiëꞌ ca naꞌ gulunëꞌ queë́liꞌ.
Buliꞌbíꞌi quégaquiëꞌ chopa cöꞌ tsca le gulunëꞌ.
Buliꞌbíꞌi quégaquiëꞌ chopa cöꞌ tsca le naca xihuiꞌ gulunëꞌ queë́liꞌ.
7 Guliꞌgún ga ilaꞌguíꞌi ilaꞌzáquiëꞌ,
en ilaꞌbödxi yéchëꞌë
tsca guca yöl-laꞌ ba,
en yöl-laꞌ zxön guluíꞌi cuíngaquiëꞌ.
Taꞌzáꞌ ládxiꞌgaquiëꞌ,
taꞌnnë́ꞌ:
Rö́ꞌötuꞌ ni,
rinná bë́ꞌëtuꞌ.
Bitiꞌ nácatuꞌ uzëbi,
en catu caz cödxi yéchiꞌtuꞌ.
8 Que lë ni naꞌ,
tu dzasö ilaꞌdxín quégaquiëꞌ le ilaꞌguíꞌi ilaꞌzáquiëꞌ,
yöl-laꞌ guti,
en yöl-laꞌ ribödxi yechiꞌ,
en yöl-laꞌ ridún.
Iléguiëꞌ lu guíꞌ,
tuꞌ napa cazëꞌ yöl-laꞌ huáca zxön Xanruꞌ Dios.
Lë cazëꞌ usiúdxëꞌ quégaquiëꞌ.
9 Níꞌirö gunnë́ꞌ:
“Ilaꞌbödxi nupa taꞌnná bëꞌ luyú yödzölió,
en gulún le ruáꞌ döꞌ tsözxö́n len légaquiëꞌ,
en buluꞌzíꞌ xibé le nequi quégaquiëꞌ.
Ilaꞌbödxëꞌ,
en ilaꞌbödxi yéchëꞌë cateꞌ ilaꞌléꞌenëꞌ dzön que yödzö zxön naꞌ régui.
10 Ziꞌtuꞌ zíꞌtuꞌsö ilaꞌcuꞌë tuꞌ iládxinëꞌ ca gaca xíguiaꞌ le gaca que yödzö naꞌ,
ateꞌ ilaꞌnnë́ꞌ:
¡Bicaꞌ bayechiꞌ Babilonia,
yödzö zxön ni,
le gúcadaꞌ lo!
¡Tu dzasö guca xíguiaꞌ que!”
11 Níꞌirö gunnë́ꞌ:
“Ilaꞌbödxëꞌ caꞌ bönniꞌ toꞌo tutiꞌ nacuꞌë yödzölió,
en ilaꞌbödxi yéchëꞌë niꞌa que yödzö naꞌ tuꞌ cabirö soa nu gaꞌu bi ilútiꞌë niꞌ.”
12 Cúnturö nu gaꞌu niꞌ:
Le néquiguequini oro,
en plata,
en yuguꞌ guiö́j zacaꞌ,
en yuguꞌ bugá,
en yuguꞌ lariꞌ nazácaꞌdaꞌ,
en lariꞌ xiná chul-la,
en lariꞌ dxíꞌadoꞌ,
en lariꞌ xiná guíꞌidoꞌos,
en yuguꞌ yaga riláꞌ zxixi,
en le néquiguequini dxita nazácaꞌdaꞌ,
en le néquiguequini yaga nazácaꞌdaꞌ,
en le néquiguequini guíë cobre,
en le néquiguequini guíë,
en le néquiguequini guiö́j jara.
13 Cúnturö nu gaꞌu niꞌ:
Canel,
en yuguꞌ le riláꞌ zxixi,
en yalaj,
en le riláꞌ zxixi que mirra,
en que yöj olíbano,
en xisi uva nál-la,
en le naca za,
en yiözja dxíꞌadoꞌ,
en zxoaꞌ xtila,
en yuguꞌ búrrodoꞌ,
en yuguꞌ böꞌcuꞌ zxilaꞌ,
en yuguꞌ böaꞌ,
en yuguꞌ carreta,
en yuguꞌ bönniꞌ huen dxin,
en iaꞌbal-la bönachi.
14 Nupa naꞌ toꞌo tutiꞌ ilë́ légaquiëꞌ,
ilaꞌnná:
Nadúagaca le guzë́ ládxiꞌliꞌ.
Chigudödi quégaca yöl-laꞌ tsahuiꞌ,
en le nácagaca lachi queë́liꞌ,
ateꞌ bítiꞌrö idzö́liliꞌ léguequi.
15 Níꞌirö gunnë́ꞌ:
“Ilaꞌbödxëꞌ bönniꞌ toꞌo tutiꞌ naꞌ,
tuꞌ gutaꞌ quégaquiëꞌ yöl-laꞌ tsahuiꞌ tuꞌ gulútiꞌë lu yödzö naꞌ,
ateꞌ ilaꞌcuꞌë ziꞌtuꞌ zíꞌtuꞌsö tuꞌ iládxinëꞌ ca gaca xíguiaꞌ le gaca que yödzö naꞌ,
en ilaꞌbödxi yéchëꞌë.”
16 Ilaꞌnnë́ꞌ:
¡Bicaꞌ bayechiꞌ yödzö ni guca zxön!
Guca ca tu nigula nácunu lariꞌ nazácaꞌdaꞌ,
en lariꞌ xiná chul-la,
en lariꞌ xiná guíꞌidoꞌos,
en nazíꞌi biquitaj queë́nu le néquiguequini oro
en le néquiguequini guiö́j zacaꞌ,
en yuguꞌ bugá.
17 Tu dzasö guniti yöl-laꞌ tsahuiꞌ que yödzö ni.
Níꞌirö gunnë́ꞌ:
“Yúguꞌtë bönniꞌ xan barco,
en nupa nacuáꞌ lë́ꞌegaca barco naꞌ,
en nupa tuꞌsáꞌ yuguꞌ barco naꞌ,
en nupa tun dxin lu nísadoꞌ,
ilaꞌcuꞌë ziꞌtuꞌ zíꞌtuꞌsö.”
18 Cateꞌ ilaꞌléꞌenëꞌ dzön que yödzö naꞌ régui,
ilaꞌbödxëꞌ,
en ilaꞌnnë́ꞌ:
“¿Bízxilö yödzö guca zxön ca naca yödzö ni?”
19 Níꞌirö gunnë́ꞌ:
Uluꞌdxíëꞌ bëchtö ícjagaquiëꞌ.
Ilaꞌbödxëꞌ,
en ilaꞌbödxi yechë́ꞌë,
ilaꞌnnë́ꞌ.
¡Bicaꞌ bayechiꞌ yödzö ni guca zxön!
Yöl-laꞌ tsahuiꞌ que yödzö ni ben ga gutaꞌ yöl-laꞌ tsahuiꞌ
quégaca yúguꞌtë nupa nácagaca xan barco lu nísadoꞌ.
Tu dzasö guniti yödzö ni.
20 Buliꞌdzeja ca gaca que yödzö ni,
libíꞌiliꞌ zóaliꞌ yehuaꞌ yubá,
encaꞌ libíꞌiliꞌ néquiliꞌ queëꞌ Dios,
libíꞌiliꞌ,
bönniꞌ gubáz queëꞌ,
en libíꞌiliꞌ,
bönniꞌ ruíꞌiliꞌ didzaꞌ uláz queëꞌ.
Buliꞌdzeja,
tuꞌ chiguchúguiëꞌ Dios que yödzö ni
niꞌa que bi gulún queë́liꞌ nupa nacuáꞌ lu yödzö ni.
21 Níꞌirö tuëꞌ gubáz láꞌayi nál-la buchisëꞌ tu guiö́j zxön le naca ca tu guichi riyëtu,
ateꞌ gurúꞌunëꞌ le lu nísadoꞌ,
gunnë́ꞌ:
Laꞌ canísö gaca que yödzö Babilonia,
tuꞌ iguínnaj yödzö naꞌ guca lo,
ateꞌ bítiꞌrö nu udzöli le.
22 Bítiꞌrö nu yöni lu yödzö naꞌ nupa taꞌguínni lëꞌe le rul-la,
en calëga nupa tuꞌcödxi gui
en calëga nupa tuꞌcödxi lúzubaꞌ böaꞌ bëdxi.
Bítiꞌrö udzöli bönniꞌ huen dxin niꞌ,
en bítiꞌrö yöni bö rigúꞌu le rutu niꞌ.
23 Bítiꞌrö uzeníꞌ nitú guíꞌ lu yödzö naꞌ,
en bitiꞌ yöni chiꞌë bönniꞌ rutsaga nëꞌë niꞌ,
en calëga chíꞌibiꞌ biꞌi nigula rutsaga náꞌabiꞌ.
Caní gaca sal-laꞌ nácaliꞌ lo,
libíꞌiliꞌ ráꞌuliꞌ,
en rútiꞌliꞌ lu yödzö ni,
en guzxíꞌ yéꞌeliꞌ bönachi idútë yödzölió len yöl-laꞌ gudzáꞌ queë́liꞌ.
24 Lu yödzö ni gulaj xichö́ngaquiëꞌ bönniꞌ guluꞌë didzaꞌ uláz queëꞌ Dios,
en xichö́ngaca nupa néquiguequi queëꞌ Dios,
encaꞌ xichö́ngaca yúguꞌtë bönachi yödzölió,
tuꞌ bë́tigaca nupa nacuáꞌ yödzö ni léguequi.