Dios richúguiëꞌ queë́nu nigula udá dzaga
17
Níꞌirö bidxinëꞌ tuëꞌ gubáz láꞌayi ga zoaꞌ,
nababëꞌ gadxi gubáz láꞌayi naꞌ gulaꞌzönëꞌ gadxi zxígaꞌdoꞌ naꞌ néquiguequini oro.
Bë́ꞌlenëꞌ nedaꞌ didzaꞌ,
gunnë́ꞌ:
“Gudá ni,
ateꞌ uluíꞌidaꞌ liꞌ ca gunëꞌ Dios,
gunëꞌ-nu xíguiaꞌ nigula udá dzaga naꞌ,
rö́ꞌönu lu nísadoꞌ zián.
2 Gulaꞌcuaꞌlen lënu nupa taꞌnná bëꞌ luyú yödzölió,
en gulún le ruáꞌ döꞌ,
ateꞌ gulaꞌzudxi nupa nacuáꞌ yödzölió ni,
tuꞌ gulunlen lënu le bitiꞌ naca dxiꞌa.”
3 Dios Böꞌ Láꞌayi guzóalenëꞌ nedaꞌ,
ateꞌ gubáz láꞌayi naꞌ guchë́ꞌë nedaꞌ tu lu lataj cáꞌasö,
ateꞌ biléꞌedaꞌ-nu tu nigula niꞌ dxíanu cúdzuꞌbaꞌ tubaꞌ böaꞌ síniaꞌ,
nácabaꞌ xiná guíꞌidoꞌos.
Dxíagaca gadxi ícjabaꞌ,
en chi lúzubaꞌ,
en dáꞌgaca caꞌ lëbaꞌ le taꞌnnë́ xihuiꞌ queëꞌ Dios.
4 Nigula naꞌ dxíanu lëbaꞌ nácunu lariꞌ xiná chul-la,
en lariꞌ xiná guíꞌidoꞌos.
Nazíꞌi biquitaj queë́nu le néquiguequini oro,
en yuguꞌ guiö́j nazacaꞌ,
en yuguꞌ bugá.
Lu náꞌanu röꞌö tu zxígaꞌdoꞌ néquini oro,
en yudzu le nácagaca xihuiꞌ,
en le ruáꞌ döꞌ runnu.
5 Raꞌ xigánu dáꞌgaca ca lënu,
le tuꞌluíꞌi tu le nagachiꞌ,
en taꞌnná caní:
“Yödzö Babilonia Le Naca Lo”,
en “Xináꞌagacanu Nigula Udá Dzaga”,
en “Xináꞌagaca Le Xihuiꞌ Dzöꞌö Yödzölió.”
6 Gúquibeꞌedaꞌ nazúdxinu nigula naꞌ tuꞌ bennu ga gulaj rön quégaca nupa néquiguequi queëꞌ Dios,
en quégaca nupa naꞌ zoa nu bëti léguequi tuꞌ gulún ba nalí queëꞌ Jesús.
Cateꞌ biléꞌedaꞌ-nu,
bubánideꞌedaꞌ.
7 Gudxëꞌ gubáz láꞌayi naꞌ nedaꞌ,
gunnë́ꞌ:
“¿Bizx que rubáninuꞌ?
Uzéajniꞌidaꞌ liꞌ lë naꞌ nagachiꞌ,
le ruluíꞌi ca naca nigula ni,
encaꞌ le ruluíꞌi ca naca böaꞌ síniaꞌ naꞌ dxíanu-baꞌ,
böaꞌ naꞌ dxíagaca gadxi ícjabaꞌ,
en chi lúzubaꞌ.
8 Böaꞌ síniaꞌ naꞌ biléꞌenuꞌ guzóabaꞌ zíꞌalö,
pero bitiꞌ zóabaꞌ naꞌa.
Böaꞌ ni chizóa irúajbaꞌ lataj chul-la,
ateꞌ tséajbaꞌ ga nítibaꞌ tsaz.
Uluꞌbánideꞌe nupa nacuáꞌ luyú cabí nazúajgaca láguequi lu guichi que yöl-laꞌ naꞌbán,
le buzúajëꞌ Dios dza niꞌte quez cateꞌ siꞌ gataꞌ yödzölió.
Cateꞌ ilaꞌléꞌeni böaꞌ síniaꞌ naꞌ guzóabaꞌ zíꞌatëlö,
pero bitiꞌ zóabaꞌ naꞌa,
uluꞌbani tuꞌ nubanbaꞌ.
9 ’Lë ni naca tu le uzéajniꞌi nu gaca tséajniꞌi:
Gadxi ícjabaꞌ naꞌ tuꞌluíꞌi gadxi guíꞌadoꞌ gapa rö́ꞌönu nigula naꞌ.
10 Lëscaꞌ caní gadxi ícjabaꞌ naꞌ tuꞌluíꞌi gadxëꞌ bönniꞌ taꞌnná bëꞌë.
Gáyuꞌë bönniꞌ ni chigudödi quégaquiëꞌ.
Tuëꞌ bönniꞌ ni rinná bëꞌë naꞌa,
ateꞌ iaꞌtúëꞌ bitiꞌ ridxíninëꞌ,
pero cateꞌ guídëꞌ,
inná bëꞌë tu chíꞌidoꞌosö.
11 Böaꞌ síniaꞌ naꞌ guzóabaꞌ,
pero bitiꞌ zóabaꞌ naꞌa,
ruluíꞌi tu bönniꞌ izxunuꞌ,
inná bëꞌë.
Nunëꞌ tsözxö́n bönniꞌ gadxi naꞌ,
ateꞌ tödi ni nítiëꞌ tsaz.
12 ’Chi lúzubaꞌ naꞌ biléꞌenuꞌ tuꞌluíꞌi chiëꞌ bönniꞌ ilaꞌnná bëꞌë.
Bitiꞌ taꞌzíꞌininëꞌ yöl-laꞌ unná bëꞌ,
pero ilaꞌziꞌë yöl-laꞌ unná bëꞌ tu chíꞌidoꞌosö,
en ilaꞌnná bëꞌë tsözxö́n len böaꞌ síniaꞌ naꞌ.
13 Chiëꞌ bönniꞌ ni,
lë́bisö nácagaquiëꞌ,
ateꞌ uluꞌdödëꞌ yöl-laꞌ unná bëꞌ quégaquiëꞌ,
en le nazíꞌ lu náꞌagaquiëꞌ lu náꞌabaꞌ böaꞌ síniaꞌ naꞌ.
14 Ilaꞌdíl-lalenëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ,
pero Lëꞌ ucul-lëꞌ légaquiëꞌ,
tuꞌ náquiëꞌ Xángaca yúguꞌtë nupa nácagaca xan,
en náquiëꞌ Bönniꞌ rinná béꞌenëꞌ yúguꞌtë nupa taꞌnná bëꞌ.
Nupa nacuáꞌlen Lëꞌ,
bulidzëꞌ Dios léguequi,
en gurö́ëꞌ léguequi,
ateꞌ tsaz dáꞌgaca Lëꞌ.”
15 Gubáz láꞌayi naꞌ gudxëꞌ caꞌ nedaꞌ,
gunnë́ꞌ:
“Yuguꞌ nísadoꞌ naꞌ biléꞌenuꞌ gapa niꞌ rö́ꞌönu nigula udá dzaga naꞌ,
tuꞌluíꞌi bönachi yuguꞌ yödzö,
en yuguꞌ bönachi izáꞌa,
en bönachi tuíꞌi yuguꞌ didzaꞌ yúbölö,
en bönachi yuguꞌ luyú.
16 Chi lúzubaꞌ böaꞌ síniaꞌ naꞌ biléꞌenuꞌ,
en tuꞌluíꞌi chiëꞌ bönniꞌ,
bitiꞌ ilaꞌléꞌenëꞌ-nu nigula udá dzaga naꞌ dxiꞌa,
ateꞌ uluꞌcáꞌanëꞌ-nu cáꞌasö,
en xiguídisö.
Ilahuëꞌ xipë́laꞌnu,
en uluꞌzéguiꞌë-nu len guíꞌ.
17 Dios uchíziëꞌ icja ládxiꞌdoꞌgaquiëꞌ chiëꞌ bönniꞌ naꞌ le gun ga ilunëꞌ ca rë́ꞌëni quézinëꞌ Lëꞌ,
ateꞌ ilácagaquiëꞌ tuz,
en uluꞌdödëꞌ yöl-laꞌ unná bëꞌ quégaquiëꞌ lu náꞌabaꞌ böaꞌ síniaꞌ naꞌ para gaca ca rnna xtídzëꞌë.
18 Nigula naꞌ biléꞌenuꞌ-nu ruluíꞌi yödzö zxön naꞌ rinná beꞌe nupa taꞌnná bëꞌ yödzölió ni.”