2 Guyijëꞌ gubáz láꞌayi zíꞌalö,

en yöjlaljëꞌ le yudzu zxígaꞌdoꞌ naꞌ zönëꞌ lu yödzölió.

Lë naꞌ yudzu zxígaꞌdoꞌ naꞌ ben ga gutsaj yudzuꞌ yaꞌa le riládaꞌ idútë le naca caz nupa naꞌ daꞌ léguequi le naca bëꞌ dáꞌgaca böaꞌ síniaꞌ naꞌ,

encaꞌ nupa naꞌ taꞌyéaj ládxiꞌgaca budóꞌ queë́baꞌ.

3 Níꞌirö guyijëꞌ gubáz láꞌayi buropi,

en yöjlaljëꞌ le yudzu zxígaꞌdoꞌ naꞌ zönëꞌ lu nísadoꞌ,

ateꞌ nisa naꞌ böáca rön ca naca rön queëꞌ tu bönniꞌ nati,

ateꞌ gulati yúguꞌtë nupa nabángaca nacuáꞌ lu nísadoꞌ naꞌ.

4 Guyijëꞌ gubáz láꞌayi bunni,

en yöjlaljëꞌ le yudzu zxígaꞌdoꞌ naꞌ zönëꞌ gapa dë yegu,

en gapa ralaj nisa,

ateꞌ gapa dë nisa naꞌ buluꞌhuöáca rön.

5 Níꞌirö biyöndaꞌ ruꞌë didzaꞌ gubáz láꞌayi naꞌ dë lu nëꞌë rinná béꞌenëꞌ nisa naꞌ,

rnnëꞌ:

“¡Xantuꞌ Dios Láꞌayi!

¡Zoa cazuꞌ,

en guzóa cazuꞌ!

¡Tsahuiꞌ nacuꞌ tuꞌ richuguꞌ caní quégaca bönachi

6 tuꞌ buluꞌlaljëꞌ rön quégaca nupa néquiguequi quez quiuꞌ,

en quégaca nupa guluíꞌi didzaꞌ uláz quiuꞌ!

¡Naꞌa,

Liꞌ runuꞌ ga ilë́ꞌajëꞌ rön,

tuꞌ caní ral-laꞌ gaca quégaquiëꞌ!”

7 Níꞌirö biyöndaꞌ ruíꞌi didzaꞌ tu nu zoa raꞌ bucugu yehuaꞌ yubá niꞌ,

rnna:

“¡Caꞌ gaca,

Xantuꞌ Dios,

napa cazuꞌ yöl-laꞌ unná bëꞌ!

¡Idútë li,

en tsahuiꞌ naca ca richuguꞌ quégaca bönachi!”

8 Guyijëꞌ gubáz láꞌayi budapi naꞌ,

en yöjlaljëꞌ le yudzu zxígaꞌdoꞌ naꞌ zönëꞌ lu gubidza,

ateꞌ gubidza naꞌ,

bëꞌë Dios le lataj uzéguiꞌdaꞌ bönachi len guíꞌ que.

9 Gulaꞌyéguiꞌdaꞌ yúguꞌtë bönachi tu ruzéguiꞌdaꞌ gubidza,

pero bitiꞌ buluꞌbíꞌi ládxiꞌgaca,

en bitiꞌ gulaꞌgúꞌu Dios yöl-laꞌ ba.

Gulaꞌnnë́ ziꞌi queëꞌ Dios,

Bönniꞌ dë lu nëꞌë inná béꞌenëꞌ yuguꞌ lë ni tuꞌsacaꞌ ziꞌ bönachi.

10 Guyijëꞌ gubáz láꞌayi guyuꞌ naꞌ,

en yöjlaljëꞌ le yudzu zxígaꞌdoꞌ zönëꞌ lu xilataj böaꞌ síniaꞌ ga naꞌ rinná bë́ꞌëbaꞌ,

ateꞌ gurö́ꞌö chul-la gapa rinná bë́ꞌëbaꞌ.

Níꞌirö,

tuꞌ gulaꞌguíꞌi gulaꞌzacaꞌ bönachi,

guláguyaꞌa lúdxiꞌguequi,

11 pero bitiꞌ buluꞌbíꞌi ládxiꞌgaca para cabirö ilúngaca le ruáꞌ döꞌ tunëꞌ.

Gulaꞌnnë́ ziꞌi queëꞌ Dios zoëꞌ yehuaꞌ yubá tuꞌ taꞌguíꞌi taꞌzacaꞌ,

en tuꞌ dxíagaca yudzuꞌ yaꞌa naꞌ.

12 Guyijëꞌ gubáz láꞌayi buzxopi naꞌ,

en yöjlaljëꞌ le yudzu zxígaꞌdoꞌ naꞌ zönëꞌ lu yegu zxön nazíꞌi le Eufrates,

ateꞌ gubidxi nisa yegu naꞌ para ibáꞌa nöza ga ilaꞌdödi nupa taꞌnná bëꞌ,

nupa ilaꞌrúaj zacaꞌ ga rilén gubidza.

13 Níꞌirö biléꞌedaꞌ bëla zxön xitsiníꞌ naꞌ,

en böaꞌ síniaꞌ naꞌ,

en bönniꞌ ruꞌë didzaꞌ uláz quégacabaꞌ.

Bilaꞌrúaj tsonna böꞌ xihuiꞌ tun ditaj bönachi lu ruáꞌagaca nupa naꞌ.

Naláꞌgaca ca naláꞌgacabaꞌ buludzu.

14 Nácagaca yonna böꞌ ni böꞌ que tuꞌ xihuiꞌ,

böꞌ naꞌ tun le nácagaca bëꞌ le ilún ga uluꞌbani bönachi.

Yöjaca böꞌ xihuiꞌ naꞌ idú yödzölió,

en yöjtúbigaca nupa taꞌnná bëꞌ,

para tsöjáquiëꞌ lu gudil-la naꞌ gaca lu dza zxön queëꞌ Dios,

Bönniꞌ napa cazëꞌ yöl-laꞌ unná bëꞌ.

15 Caní rnnëꞌ Dios:

“¡Buliꞌyútsöcaꞌ!

Guídaꞌ tsálidoꞌos ca ridxinëꞌ tu bönniꞌ gubán.

Bicaꞌ ba nu zoa ban ladxiꞌ,

en run chiꞌi le nacu nu naꞌ,

en rúnticaꞌsö dxiꞌa,

para cabí gun bayudxi ta xiguídisö,

en para cabí utuíꞌi nu naꞌ lahuiꞌ lógaca bönachi.”

16 Yuguꞌ böꞌ xihuiꞌ naꞌ buluꞌtubi yuguꞌ bönniꞌ taꞌnná bëꞌë,

ateꞌ buluꞌdubëꞌ tu lataj nazíꞌi le lu didzaꞌ hebreo:

Armagedón.

17 Guyijëꞌ gubáz láꞌayi igadxi naꞌ,

en yöjlaljëꞌ le yudzu zxígaꞌdoꞌ naꞌ zönëꞌ lu böꞌös,

ateꞌ bëꞌ zidzaj didzaꞌ tu nu zoa lu lataj láꞌayi zoa yehuaꞌ yubá ga dë lataj lo naꞌ,

rnna:

“Chinaca.”

18 Níꞌirö guyëpi yösa,

en gurö́ꞌödaꞌ bö,

en gunnë́ guziúꞌ.

Gudö́didaꞌ budóꞌ zxuꞌ,

le gudö́didaꞌrö ca gudödi tsanni ni nacuáꞌ bönachi yödzölió.

19 Birúaj tsonna cö́ꞌölö yödzö zxön naꞌ,

ateꞌ gulaꞌguínnaj yödzö nacuáꞌ yödzölió.

Yöjnenëꞌ Dios le naca xihuiꞌ gulún bönachi yödzö zxön naꞌ nazíꞌi le Babilonia,

ateꞌ lu yöl-laꞌ rilé queëꞌ benëꞌ xíguiaꞌ nupa nacuáꞌ niꞌ.

20 Bilaꞌgachiꞌ yuguꞌ luyú bidxi dzöꞌö lu nísadoꞌ,

ateꞌ bítiꞌrö gulaꞌláꞌ yuguꞌ guíꞌadoꞌ.

21 Böxaj caꞌ guiö́j böguiꞌ yöla sunna,

le zaꞌ lúzxiba,

en yöjsóa ícjagaca bönachi,

ateꞌ nál-liꞌ tu tu guiö́j böguiꞌ naꞌ ca tu gayuáꞌ guíë,

ateꞌ yúguꞌtë bönachi gulaꞌnnë́ xihuiꞌ queëꞌ Dios tuꞌ nözi guiö́j böguiꞌ naꞌ tuꞌ buluꞌsácaꞌdaꞌ ziꞌi léguequi.