Yuguꞌ gubáz láꞌayi nuáꞌgaquiëꞌ gadxi yödzöhuë́ꞌ
15
Biléꞌedaꞌ iaꞌtú le nácadaꞌ bëꞌ yehuaꞌ yubá,
le run ga nu rubani.
Bilaꞌrúajëꞌ gadxi gubáz láꞌayi,
nuáꞌagaquiëꞌ gadxi yödzöhuë́ꞌ röjsétegaca,
le ugunëꞌ dxin Dios,
údxi gunëꞌ xíguiaꞌ bönachi yödzölió.
2 Biléꞌedaꞌ caꞌ tu le naca ca tu nísadoꞌ le rëpi yösa beníꞌ ca guiö́j jara le nutsíꞌi guíꞌ.
Nupa naꞌ buluꞌxicja lu böaꞌ síniaꞌ naꞌ,
en lu budóꞌ queë́baꞌ,
en lu labaꞌ,
zuígaca lu lë naꞌ naca ca tu nísadoꞌ,
en nuáꞌagaquiëꞌ le tul-la,
yuguꞌ le bëꞌë Dios quégaquiëꞌ.
3 Tul-lëꞌ le rul-la naꞌ bil-lëꞌ Moisés,
bönniꞌ huen dxin queëꞌ Dios.
Naca tu le rul-la queëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ.
Taꞌnnë́ꞌ:
¡Liꞌ,
Xantuꞌ Dios,
zxö́ntërö nacuꞌ Liꞌ!
¡Zxö́ntërö naca yúguꞌtë le benuꞌ,
le tun ga rubánituꞌ!
¡Liꞌ rinná béꞌenuꞌ yuguꞌ yödzö!
¡Idú dxíꞌadoꞌ,
en idú tsahuiꞌ naca ca bi runuꞌ!
4 ¿Nuzxi caz cabí gadxi Liꞌ,
Xantuꞌ?
¿Nuzxi caz cabí cuꞌu Liꞌ yöl-laꞌ ba?
¡Tuzuꞌ Liꞌ nacuꞌ láꞌayi!
¡Ilaꞌdxín bönachi yúguꞌtë yödzö,
en ilaꞌyéaj ládxiꞌguequi Liꞌ
tuꞌ taꞌléꞌe naca tsahuiꞌ yúguꞌtë le runuꞌ!
5 Gudödi guca lë ni,
buyúaꞌ,
en biléꞌedaꞌ guyalaj yudoꞌ yehuaꞌ yubá ga niꞌ dë lataj láꞌayi que le naca bëꞌ zóalenëꞌ Dios bönachi queëꞌ.
6 Bilaꞌrúajëꞌ gadxi gubáz láꞌayi lu lataj láꞌayi naꞌ,
nuáꞌagaquiëꞌ gadxi yödzöhuë́ꞌ naꞌ.
Nácugaquiëꞌ lariꞌ nazácaꞌdaꞌ le rëpi yösa beníꞌ,
en núgaꞌgaca luchúꞌugaquiëꞌ le néquiguequini oro.
7 Níꞌirö tu nu nutsaꞌ ladaj idapa nupa naꞌ nabángaca,
bëꞌ que queë́gaquiëꞌ gadxi gubáz láꞌayi naꞌ gadxi zxígaꞌdoꞌ néquiguequini oro,
en yúdzugaca le ruluíꞌi yöl-laꞌ rilé queëꞌ Dios,
Bönniꞌ zoa cazëꞌ.
8 Lu lataj láꞌayi naꞌ bidzáꞌa dzön,
tuꞌ zoa niꞌ yöl-laꞌ beníꞌ,
en yöl-laꞌ huáca zxön queëꞌ Dios.
Cuntu nu sequiꞌ tsaza lu lataj láꞌayi naꞌ cateꞌ gátsjarö gadxi yödzöhuë́ꞌ naꞌ nuáꞌagaquiëꞌ gadxi gubáz láꞌayi naꞌ.