Le tul-lëꞌ tu gayuáꞌ yuꞌ tapa-un milëꞌ bönniꞌ
14
Gudödi niꞌ buyúaꞌ,
en biléꞌedaꞌ-nëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ zuínëꞌ lu guíꞌadoꞌ nazíꞌi le Sión.
Nacuáꞌlenëꞌ Lëꞌ tu gayuáꞌ yuꞌ tapa-un milëꞌ bönniꞌ,
daꞌ raꞌ xigágaquiëꞌ Lëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ,
encaꞌ Lëꞌ Xuzëꞌ.
2 Níꞌirö biyöndaꞌ tu le rigúꞌu bö yehuaꞌ yubá,
le rinnë́ zidzaj ca rinnë́ tu yegu zxön,
en ca rinnë́ guziúꞌ.
Biyöndaꞌ le riyö́n cateꞌ taꞌguínniëꞌ lëꞌe tu le rul-la zë zián du que.
3 Tul-lëꞌ tu le rul-la cubi,
nacuꞌë ca dö́dilö lahui lataj lo niꞌ,
encaꞌ ca dö́dilö lahui ga naꞌ nacuáꞌ idapa nupa naꞌ nabángaca len yuguꞌ bönniꞌ gula naꞌ.
Cúnturö nu gaca gul-la le rul-la ni,
pero légacasëꞌ tu gayuáꞌ yuꞌ tapa-un milëꞌ bönniꞌ ni,
bönniꞌ naꞌ böáꞌuëꞌ Cristo légaquiëꞌ ladaj bönachi yödzölió.
4 Nácagaquiëꞌ bönniꞌ ni idú ladxiꞌ.
Bitiꞌ gulaꞌcuáꞌlenëꞌ nigula,
tuꞌ nácagaquiëꞌ idú bönniꞌ raꞌbán.
Söjácalenëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ gátiꞌtës ga saꞌyéajëꞌ.
Cristo caz böáꞌuëꞌ légaquiëꞌ ládjagaca bönachi,
ateꞌ nácagaca nupa buluꞌdödi cuíngaquiëꞌ zíꞌalö queëꞌ Dios,
encaꞌ queëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ.
5 Catu caz gulaꞌzíꞌ yëꞌë,
ateꞌ cuntu nu gaca bi innë́ quégaquiëꞌ ga naꞌ nacuꞌë ca dö́dilö lahui lataj lo ga röꞌë Dios.
Didzaꞌ röjuáꞌgaquiëꞌ tsonna gubáz láꞌayi
6 Níꞌirö biléꞌedaꞌ iaꞌtúëꞌ gubáz láꞌayi,
ridödëꞌ lu böꞌös lúzxiba,
en röjuꞌë didzaꞌ dxiꞌa zóaticaꞌsö para gunëꞌ libán que lógaca nupa nacuáꞌ yödzölió,
bönachi idútë luyú,
yúguꞌtë bönachi izáꞌa,
en bönachi tuíꞌi yúguꞌtë didzaꞌ izáꞌa,
en bönachi yúguꞌtë yödzö.
7 Ruꞌë zidzaj didzaꞌ,
rnnëꞌ:
“¡Gulíꞌgádxi Dios,
en guliꞌcuꞌë yöl-laꞌ ba tuꞌ chizóa uchiꞌa usörö́ëꞌ bönachi!
¡Guliꞌtséaj ládxëꞌë Dios,
nunëꞌ lúzxiba,
en luyú,
en nísadoꞌ,
en gapa ralaj nisa!”
8 Iaꞌtúëꞌ gubáz láꞌayi söjnáhuëꞌ gubáz láꞌayi ni,
en rnnëꞌ:
“¡Chibudxi que yödzö Babilonia!
¡Chibudxi que yödzö zxön naꞌ!
Caní guca que,
tuꞌ gulún nupa nacuáꞌ niꞌ ga gulaꞌzíꞌ lu náꞌagaquiëꞌ bönniꞌ yúguꞌtë yödzö ilunëꞌ ca nácagaca le taꞌzë́ ládxiꞌgaquiëꞌ le ruáꞌ döꞌ.”
9 Iaꞌtúëꞌ gubáz láꞌayi söjnáhuëꞌ gubáz láꞌayi buropi ni ,
en ruꞌë zidzaj didzaꞌ,
rnnëꞌ:
“¡Channö nu tseaj ladxiꞌ-baꞌ böaꞌ síniaꞌ naꞌ,
encaꞌ budóꞌ queë́baꞌ,
en güíꞌi lataj taꞌ raꞌ xigué o lu nëꞌe le naca bëꞌ daꞌ lëbaꞌ,
10 gunëꞌ Dios nu ni xíguiaꞌ lu yöl-laꞌ rilé queëꞌ!
¡Quiꞌi sacaꞌ nu naꞌ lu guíꞌ,
en lu lë naꞌ ruzéguiꞌdaꞌ,
lógaca gubáz láꞌayi,
en lahuëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ!
11 Cuénticaꞌsö dzön que guíꞌ ga niꞌ quíꞌi sacaꞌ nu naꞌ.
Rëla,
en te dza quiꞌi sacaꞌ,
ateꞌ catu caz gataꞌ lataj uluꞌzíꞌ ládxiꞌgaca nupa ilaꞌyéaj ládxiꞌgaca-baꞌ böaꞌ síniaꞌ naꞌ,
en budóꞌ queë́baꞌ.
Bitiꞌ uluꞌzíꞌ ládxiꞌgaca nupa iluíꞌi lataj taꞌ labaꞌ léguequi.
12 Que lë ni naꞌ nupa naꞌ néquiguequi queëꞌ Dios,
en tun ca rnna le gunná bëꞌë,
en taꞌyéajlëꞌ Jesús,
ral-laꞌ ilaꞌböza zxön ladxiꞌ.”
13 Níꞌirö biyöndaꞌ chiꞌi nu ruíꞌi didzaꞌ yehuaꞌ yubá,
en rë nedaꞌ:
“Buzúaj lu guichi lë ni:
¡Bicaꞌ bágaca nupa ilátigaca naꞌa si lo,
nupa naꞌ taꞌyéajlëꞌ Xanruꞌ!”
Dios Böꞌ Láꞌayi rnnëꞌ:
“¡Caꞌ gaca!
¡Uluꞌzíꞌ ládxiꞌgaquiëꞌ lu dxin gulunëꞌ,
en uluꞌziꞌë xibé ca saꞌyéaj le gulunëꞌ!”
Tuꞌziꞌë le ruláꞌ luyú
14 Níꞌirö buyúaꞌ,
en biléꞌedaꞌ tu böaj lúzxiba chiguíchidoꞌos,
ateꞌ lu böaj naꞌ röꞌë tu bönniꞌ náquiëꞌ ca náquiëꞌ Bönniꞌ Guljëꞌ Bönachi,
ateꞌ dxía icjëꞌ tu le néquini oro,
ateꞌ zönëꞌ tu guíë tuchiꞌ lu nëꞌë.
15 Birúajëꞌ tuëꞌ gubáz láꞌayi lu yudoꞌ röꞌö yehuaꞌ yubá,
ateꞌ bëꞌë zidzaj didzaꞌ,
en gudxëꞌ Nu naꞌ röꞌö lu böaj naꞌ,
gunnë́ꞌ:
“¡Bugún dxin guíë tuchiꞌ quiuꞌ,
en guchugu zxoaꞌ xtila,
tuꞌ chibidxín dza nu uzíꞌ le!
¡Chinabídx do que le dë yödzölió!”
16 Níꞌirö Nu naꞌ röꞌö lu böaj naꞌ bugún dxin guíë tuchiꞌ idútë yödzölió,
ateꞌ buziꞌë le ruláꞌ luyú.
17 Níꞌirö birúajëꞌ tu gubáz láꞌayi lu yudoꞌ zoa yehuaꞌ yubá.
Nuꞌë caꞌ tu guíë tuchiꞌ.
18 Birúajëꞌ iaꞌtúëꞌ gubáz láꞌayi raꞌ bucugu niꞌ,
dë lu nëꞌë inná béꞌenëꞌ guíꞌ,
ateꞌ bëꞌë zidzaj didzaꞌ,
en bulidzëꞌ gubáz láꞌayi zíꞌalö naꞌ nuꞌë guíë tuchiꞌ,
gunnë́ꞌ:
“¡Bugún dxin guíë tuchiꞌ quiuꞌ,
en butubi tuꞌxóa huéaj le taꞌbía lubá uva rö́ꞌgaca yödzölió,
tuꞌ chiná le taꞌbía lubá uva!”
19 Níꞌirö gubáz láꞌayi ni bugunëꞌ dxin guíë tuchiꞌ idútë yödzölió,
en butubëꞌ le taꞌbía lubá uva rö́ꞌgaca luyú,
ateꞌ yöjchúꞌunëꞌ le taꞌbía lubá uva naꞌ lu yeru zxön ga izí xisi.
Yuguꞌ lë ni ruluíꞌi ca gunëꞌ Dios,
gunëꞌ xíguiaꞌ bönachi nacuáꞌ yödzölió.
20 Buluꞌlibëꞌ le taꞌbía lubá uva naꞌ lu lerui zoa níꞌilö raꞌ yödzö,
ateꞌ lu lerui naꞌ birúaj rön,
en gurén ga bidxintë ruáꞌagacabaꞌ böaꞌ,
en gudödi rön naꞌ idú tsca gaca sáꞌaruꞌ idú chinnu dza.