Chópabaꞌ böaꞌ síniaꞌ
13
Guzuídaꞌ lu yuzxi raꞌ nísadoꞌ,
en biléꞌedaꞌ ribenbaꞌ rirúajbaꞌ lu nísadoꞌ tubaꞌ böaꞌ síniaꞌ dxíagaca gadxi ícjabaꞌ,
en chi lúzubaꞌ.
Dxíagaca lúzubaꞌ chi le néquini oro,
ateꞌ láhuigaca ícjabaꞌ daꞌ tu la le naca xihuiꞌ le cabí riléꞌe Dios dxiꞌa.
2 Böaꞌ síniaꞌ naꞌ biléꞌedaꞌ-baꞌ rináꞌabaꞌ ca nácabaꞌ tu bë́dxitoꞌ,
nacuáꞌ níꞌabaꞌ ca nácagaca níꞌabaꞌ oso,
ateꞌ ruáꞌabaꞌ naca ca naca ruáꞌabaꞌ bëdxi guixiꞌ.
Bëla zxön xitsiníꞌ naꞌ budö́dibaꞌ lu naꞌabaꞌ böaꞌ síniaꞌ ni yöl-laꞌ huáca queë́baꞌ,
encaꞌ xilátjabaꞌ ga rinná bë́ꞌëbaꞌ,
en yöl-laꞌ unná bëꞌ zxön queë́baꞌ.
3 Dxía huëꞌ tu ícjabaꞌ böaꞌ síniaꞌ naꞌ,
le naca le guti lëbaꞌ,
pero buniti huëꞌ naꞌ,
ateꞌ buluꞌbani yúguꞌtë bönachi yödzölió,
en yöjdáꞌgaca böaꞌ síniaꞌ naꞌ.
4 Gulaꞌyéaj ládxiꞌgaquiëꞌ-baꞌ bëla zxön xitsiníꞌ naꞌ,
tuꞌ budö́dibaꞌ yöl-laꞌ unná bëꞌ queë́baꞌ lu náꞌabaꞌ böaꞌ síniaꞌ naꞌ.
Gulaꞌyéaj ládxiꞌgaquiëꞌ-baꞌ böaꞌ síniaꞌ naꞌ,
en gulaꞌnnë́ꞌ:
“¿Nuzxi caz naca zxön ca naca zxön böaꞌ síniaꞌ naꞌ,
en nuzxi caz sequiꞌ tíl-lalen lëbaꞌ?”
5 Gutaꞌ lu náꞌabaꞌ böaꞌ síniaꞌ naꞌ bë́ꞌëbaꞌ didzaꞌ ba zxön,
en didzaꞌ xihuiꞌ le rinnëbaꞌ queëꞌ Dios.
Idú ca chopa-un beoꞌ gutaꞌ lu náꞌabaꞌ yöl-laꞌ unná bëꞌ.
6 Gusí lobaꞌ rinnëbaꞌ queëꞌ Dios,
en rinnë́ xíhuiꞌbaꞌ que Lëꞌ Dios,
en que lataj láꞌayi queëꞌ,
en quégaca nupa nacuáꞌ yehuaꞌ yubá.
7 Gutaꞌ lu náꞌabaꞌ gudíl-lalenbaꞌ nupa néquiguequi quez queëꞌ Dios,
en bucúl-labaꞌ légaquiëꞌ.
Gutaꞌ caꞌ lu náꞌabaꞌ gunná béꞌebaꞌ yúguꞌtë bönachi izáꞌa,
bönachi yúguꞌtë yödzö,
en bönachi tuíꞌi yúguꞌtë didzaꞌ yúbölö,
en bönachi idútë yödzölió.
8 Yúguꞌtë bönachi nacuáꞌ yödzölió gulaꞌyéaj ládxiꞌgaca böaꞌ síniaꞌ naꞌ,
nupa naꞌ bitiꞌ nazúajgaca láguequi lu guichi que yöl-laꞌ naꞌbán,
guichi naꞌ buzúajëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ queëꞌ Dios cateꞌ siꞌ gutaꞌ yödzölió.
Buzóa cazëꞌ Dios gútiëꞌ Bönniꞌ naꞌ niꞌa quégaca bönachi queëꞌ.
9 Channö nu riyöni,
ral-laꞌ uzë́ nagui.
10 Nupa nucuꞌë Dios idzúngaca,
ral-laꞌ idzúngaca,
ateꞌ nupa nucuꞌë Dios para nu guti léguequi len guíë tuchiꞌ,
len guíë tuchiꞌ ilátigaca.
Que lë ni naꞌ,
ral-laꞌ ilaꞌböza zxön ladxiꞌ nupa néquiguequi queëꞌ Dios,
en taꞌyéajlëꞌ Lëꞌ.
11 Gudödi naꞌ biléꞌedaꞌ-baꞌ iaꞌtubaꞌ böaꞌ síniaꞌ gurenbaꞌ birúajbaꞌ lu yu.
Dxíagaca chopa lúzubaꞌ ca naca lúzubaꞌ böꞌcuꞌ zxilaꞌ,
en ruíꞌibaꞌ didzaꞌ ca naꞌ ruíꞌibaꞌ didzaꞌ bëla zxön xitsiníꞌ naꞌ.
12 Dë lu náꞌabaꞌ böaꞌ síniaꞌ ni yúguꞌtë yöl-laꞌ unná bëꞌ queë́baꞌ böaꞌ síniaꞌ bidxinbaꞌ zíꞌalö,
cateꞌ dzágabaꞌ lëbaꞌ.
Runbaꞌ böaꞌ síniaꞌ buropi ni ga taꞌyéaj ládxiꞌgaca yúguꞌtë bönachi nacuáꞌ yödzölió böaꞌ síniaꞌ zíꞌalö naꞌ,
böaꞌ naꞌ buniti huëꞌ le guti lëbaꞌ.
13 Böaꞌ buropi naꞌ runbaꞌ caꞌ le nácagaca bëꞌ ga ridxintë runbaꞌ ga ruhuö́xaj guíꞌ le zaꞌ lúzxiba,
en ruhuö́xaj luyú lógaca yúguꞌtë bönachi.
14 Rizíꞌ yéꞌebaꞌ bönachi nacuáꞌ yödzölió len le nácagaca bëꞌ dë lu náꞌabaꞌ runbaꞌ lobaꞌ böaꞌ síniaꞌ zíꞌalö naꞌ.
Rinná béꞌebaꞌ bönachi nacuáꞌ yödzölió ilunëꞌ tu budóꞌ ca nácabaꞌ böaꞌ síniaꞌ naꞌ gúcabaꞌ huëꞌ que guíë tuchiꞌ,
ateꞌ nabanbaꞌ.
15 Dë lu náꞌabaꞌ runbaꞌ ga soa ibán budóꞌ naꞌ naca ca nácabaꞌ böaꞌ síniaꞌ zíꞌalö naꞌ,
en güíꞌi didzaꞌ budóꞌ ni,
en gun ga nu guti yúguꞌtë nupa bitiꞌ ilaꞌyéaj ládxiꞌgaca le.
16 Benbaꞌ ga gudáꞌ yúguꞌtë bönachi tu le naca bëꞌ dáꞌgaca lëbaꞌ,
nupa nácagaca cáꞌasö,
en nupa nácagaca lo,
nupa taꞌléꞌe yöl-laꞌ tsahuiꞌ,
en nupa nácagaca yechiꞌ,
nupa bitiꞌ nadóꞌogaca,
en nupa nadóꞌogaca.
Budáꞌabaꞌ le lu náꞌagaca ibëla o raꞌ xigágaca bönachi naꞌ.
17 Cuntu nu gaca bi gaꞌu o bi gutiꞌ channö cabí daꞌ nu naꞌ lë naꞌ naca bëꞌ,
o channö cabí daꞌ nu naꞌ labaꞌ böaꞌ síniaꞌ naꞌ,
o le nabábabaꞌ nuáꞌabaꞌ.
18 Naꞌa riquínnuꞌ yöl-laꞌ réajniꞌi.
Nu napa yöl-laꞌ réajniꞌi ral-laꞌ ulábatëz tsca le nabábabaꞌ nuáꞌabaꞌ böaꞌ síniaꞌ naꞌ,
le naca ca le nababëꞌ tu bönniꞌ,
ateꞌ le nabábabaꞌ naꞌ naca xopa gayuáꞌ yuꞌ tsónnalalaj yuꞌ xopa.