Tunu nigula, en tubaꞌ bëla zxön xitsiníꞌ
12
Níꞌirö biláꞌ lahui yehuaꞌ yubá tu le naca bëꞌdaꞌ,
buluíꞌi lonu tu nigula nácunu le naca ca gubidza,
en zoa zxan níꞌanu beoꞌ.
Dxía ícjanu tu le néquini oro ga dxíagacabaꞌ chinnu bölaj beníꞌ.
2 Nigula ni chizóa soa bíꞌidoꞌ queë́nu,
en ribö́dxinu tuꞌ rúdiaꞌ lë́ꞌënu.
Riguíꞌi rizácaꞌnu ruzóanu bíꞌidoꞌ queë́nu.
3 Níꞌirö iaꞌtú le naca bëꞌ biláꞌ lahui yehuaꞌ yubá.
Buluíꞌi lobaꞌ tubaꞌ bëla zxön xitsiníꞌ.
Nácabaꞌ xiná guiꞌis,
ateꞌ dxíagaca gadxi ícjabaꞌ,
en chi lúzubaꞌ,
ateꞌ dxía tu le néquini oro tu tu ícjabaꞌ naꞌ.
4 Len xibanbaꞌ gúꞌuyöjbaꞌ tu cöꞌ tsa tu tsonna cöꞌ bölaj lúzxiba,
en gurúꞌunabaꞌ légacabaꞌ luyú.
Guzuíbaꞌ bëla zxön xitsiníꞌ naꞌ lonu nigula naꞌ chizóa sóabiꞌ bíꞌidoꞌ queë́nu.
Zóabaꞌ sinaꞌ gágubaꞌ-biꞌ bíꞌidoꞌ queë́nu naꞌ ca gáljabiꞌ naꞌ.
5 Buzóanu-biꞌ tubiꞌ biꞌi bö́nniꞌdoꞌ ral-laꞌ inná béꞌebiꞌ yúguꞌtë yödzö len tu xiyaga guíë.
Laꞌ bucuítatëꞌë-biꞌ Dios bíꞌidoꞌ queë́nu naꞌ,
en buchisëꞌ-biꞌ ga niꞌ zoa cazëꞌ Lëꞌ,
röꞌë lataj lo ga naꞌ rinná bëꞌë.
6 Buzxúnnajnu nigula naꞌ,
zéajnu lu lataj cáꞌasö,
ga niꞌ chinupë́ꞌë Dios lataj queë́nu.
Uluꞌgahuëꞌ-nu niꞌ idú ca chinnu gayuáꞌ yuꞌ tsónnalalaj dza.
7 Gudödi gulaca lë ni,
gúcadaꞌ gudil-la yehuaꞌ yubá.
Gubáz láꞌayi lo lëꞌ Miguel,
en yuguꞌ gubáz láꞌayi dáꞌgaquiëꞌ lëꞌ gulaꞌdíl-lalenëꞌ-baꞌ bëla zxön xitsiníꞌ naꞌ.
Gulaꞌdil-la bëla zxön naꞌ,
en yuguꞌ gubáz xihuiꞌ dáꞌgaca lëbaꞌ
8 pero bitiꞌ bilaꞌdeliꞌ lu gudil-la naꞌ.
Que lë ni naꞌ bítiꞌrö bidzöli xilátjagaca yehuaꞌ yubá.
9 Caní guca,
gulaꞌrúꞌunëꞌ-baꞌ bëla zxön xitsiníꞌ naꞌ níꞌilö.
Nácabaꞌ bëla naꞌ zóabaꞌ dza niꞌte,
lëbaꞌ tuꞌ xihuiꞌ.
Gulaꞌrúꞌunëꞌ tuꞌ xihuiꞌ yödzölió,
dzágagaca le gubáz xihuiꞌ naꞌ dáꞌgaca le.
10 Níꞌirö biyöndaꞌ tu chiꞌi ruíꞌi zidzaj didzaꞌ yehuaꞌ yubá,
rnna:
“Naꞌa chibidxín dza nuluꞌë lahui yöl-laꞌ rusölá nunëꞌ Dios,
en yöl-laꞌ huáca queëꞌ,
en le rinná bëꞌë,
encaꞌ le rinná bëꞌë Cristo,
tuꞌ chigulaꞌrúꞌunëꞌ níꞌilö nu naꞌ buzegui yuguꞌ böchiꞌ luzáꞌaruꞌ didzaꞌ.
Rëla,
en të dza buzegui légaquiëꞌ didzaꞌ lahuëꞌ Dios queë́ruꞌ.
11 Yuguꞌ böchiꞌ luzáꞌaruꞌ ni buluꞌcul-lëꞌ nu naꞌ,
tuꞌ buluꞌgunëꞌ dxin xichönëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ queëꞌ Dios,
en tuꞌ buluꞌgunëꞌ dxin didzaꞌ naꞌ gulunëꞌ ba nalí queëꞌ.
Bitiꞌ guluíꞌi ládxiꞌgaquiëꞌ yöl-laꞌ naꞌbán quégaquiëꞌ,
pero gulátiëꞌ.
12 Que lë ni naꞌ gaca yöl-laꞌ rudzeja yehuaꞌ yubá.
¡Buliꞌdzeja libíꞌiliꞌ,
zóaliꞌ niꞌ!
¡Bicaꞌ bayechiꞌ libíꞌiliꞌ zóaliꞌ yödzölió,
en lu nísadoꞌ,
tuꞌ chibötaj tuꞌ xihuiꞌ,
en bidxín ga zóaliꞌ!
Rilédeꞌe tuꞌ xihuiꞌ naꞌ tuꞌ chiréquibeꞌe iaꞌtú chíꞌisö dë lataj que.”
13 Cateꞌ gúquibeꞌebaꞌ bëla zxön xitsiníꞌ naꞌ chigulaꞌrúꞌunëꞌ-baꞌ luyú,
níꞌirö yöjsóa réguꞌbaꞌ-nu nigula naꞌ buzóanu biꞌi bö́nniꞌdoꞌ naꞌ queë́nu.
14 Níꞌirö Dios bëꞌë-nu nigula naꞌ chopa xílibaꞌ bisiáꞌ nácagaca zxön para gaca sunu,
en icuítanu ga naꞌ zóabaꞌ bëla zxön xitsiníꞌ naꞌ,
en idxinnu xilátjanu lu lataj cáꞌasö.
Niꞌ uluꞌgahuëꞌ-nu idú tsonna iz yuꞌ gatsaj.
15 Bëla zxön xitsiníꞌ naꞌ gúbabaꞌ nisa zile zacaꞌ cúdzuꞌlönu,
le guca ca tu nisa yegu,
en gúꞌunibaꞌ guaꞌtë nigula naꞌ.
16 Níꞌirö luyú gúcalen nigula naꞌ.
Guyalaj luyú naꞌ,
en güíꞌi nisa yegu naꞌ gúbabaꞌ bëla zxön xitsiníꞌ naꞌ.
17 Níꞌirö bëla zxön xitsiníꞌ naꞌ gulédeꞌebaꞌ-nu nigula naꞌ,
ateꞌ guyéajbaꞌ yöjtíl-lalenbaꞌ nupa nagáꞌanagaca queë́nu diꞌa dza queë́nu,
nupa naꞌ tun ca rnna le gunná bëꞌë Dios,
en nazíꞌ lu në́ꞌeguequi le nunëꞌ Jesucristo ba nalí.