Chopëꞌ bönniꞌ tunëꞌ ba nalí
11
Níꞌirö bidxín nu benna tu gui quiaꞌ le naca ca tu yaga ribixi,
en gudxi nedaꞌ:
“Guyasa,
en burixi yudoꞌ queëꞌ Dios.
Burixi caꞌ bucugu láꞌayi que,
en bulaba nupa nacuáꞌ niꞌ taꞌyéaj ládxiꞌgaca Dios.
2 Bucáꞌana caꞌ löꞌa que yudoꞌ naꞌ dë níꞌilö,
en bitiꞌ urixuꞌ le,
tuꞌ nadödi lu náꞌagaca bönachi izáꞌa,
ateꞌ uluꞌlibi uluꞌléaj yödzö láꞌayi naꞌ idú ca chopa-un beoꞌ.”
3 Gudxëꞌ caꞌ nedaꞌ:
“Isö́l-laꞌa chopëꞌ bönniꞌ ilunëꞌ ba nalí quiaꞌ,
ateꞌ iluꞌë didzaꞌ uláz quiaꞌ idú ca chinnu gayuáꞌ yuꞌ tsónnalalaj dza,
nácugaquiëꞌ lariꞌ le naca bödzádzadoꞌ.”
4 Chopëꞌ bönniꞌ ni tunëꞌ ba nalí,
nácagaquiëꞌ chopa yaga olivo naꞌ nazúaj lu guichi láꞌayi ca naca quégaquiëꞌ,
en nácagaquiëꞌ caꞌ chopa le nuáꞌgaca guíꞌ naꞌ nacuáꞌ lahuëꞌ Dios,
Xani yödzölió.
5 Channö guë́ꞌëni nu guáꞌ döꞌ quégaquiëꞌ,
irúaj guíꞌ ruáꞌagaquiëꞌ le usuniti nu naꞌ rë́ꞌëni guáꞌ döꞌ quégaquiëꞌ,
en guti nu naꞌ,
encaꞌ nupa taꞌdáꞌbagaꞌ légaquiëꞌ.
6 Chopëꞌ ni dë lu náꞌagaquiëꞌ uluꞌzáguëꞌë xinöza nisa guiö́j lúzxiba,
para cabí galaj guiö́j tsca dza naꞌ ral-laꞌ iluꞌë didzaꞌ uláz queëꞌ Dios,
ateꞌ dë lu náꞌagaquiëꞌ caꞌ ilunëꞌ ga huöáca nisa rön,
en ilunëꞌ ga gatsaj yödzöhuë́ꞌ yödzölió.
Ilunëꞌ caní bálatiꞌtës luzuí ilë́ꞌënnëꞌ.
7 Cateꞌ údxi ilunëꞌ ba nalí,
irúajbaꞌ böaꞌ síniaꞌ lataj chul-la,
en tíl-lalenbaꞌ légaquiëꞌ,
en ucúl-labaꞌ légaquiëꞌ,
en gútibaꞌ légaquiëꞌ.
8 Le gulaca cazëꞌ ilaꞌtúlusö caꞌ laꞌ nöza lu yödzö zxön,
ga niꞌ gudë́ꞌë caꞌ Xanruꞌ lëꞌe yaga cruz,
en ca rucúdzuꞌruꞌ didzaꞌ,
nazíꞌi le caꞌ Sodoma,
encaꞌ Egipto.
9 Idú ca tsonna dza yuꞌ gatsaj bönachi yúguꞌtë yödzö,
en yúguꞌtë bönachi izáꞌa,
en bönachi tuíꞌi zián didzaꞌ yúbölö,
en bönachi yúguꞌtë luyú,
ilaꞌléꞌeni le gulaca cazëꞌ,
en bitiꞌ iluíꞌ lataj nu ucacheꞌ légaquiëꞌ yeru ba.
10 Uluꞌdzéjadeꞌe nupa nacuáꞌ yödzölió tuꞌ gulátiëꞌ,
ateꞌ lu yöl-laꞌ rudzeja quéguequi ilaꞌsö́l-laꞌ le uluꞌnödzaj quégaca luzë́ꞌeguequi,
tuꞌ buluꞌsacaꞌ ziꞌë chopëꞌ ni guluꞌë didzaꞌ uláz queëꞌ Dios bönachi nacuáꞌ yödzölió.
11 Níꞌirö cateꞌ chibizáꞌa tsonna dza yuꞌ gatsaj naꞌ,
Dios busubanëꞌ légaquiëꞌ,
ateꞌ gulaꞌyasëꞌ gulazuínëꞌ,
ateꞌ guladxi gulaꞌdzöbi yúguꞌtë nupa bilaꞌléꞌe légaquiëꞌ.
12 Níꞌirö bëꞌ zidzaj didzaꞌ tu chiꞌi yehuaꞌ yubá,
en gudxi légaquiëꞌ:
“Guliꞌcuén ni.”
Gulaꞌbenëꞌ lu böaj lúzxiba zacaꞌ yehuaꞌ yubálö,
ateꞌ nupa naꞌ gulaꞌdáꞌbagaꞌ légaquiëꞌ bilaꞌléꞌe légaquiëꞌ.
13 Laꞌ níꞌisö gudö́didaꞌ budóꞌ zxuꞌ,
ateꞌ biguinnaj tu cöꞌ tsa tu chi cöꞌ yuguꞌ yuꞌu dzöꞌö lu yödzö naꞌ,
ateꞌ lu budóꞌ zxuꞌ naꞌ,
gulati tsónnalalaj yuꞌ chi gayuáꞌ bönachi.
Guladxi gulaꞌdzöbi nupa niꞌ nagáꞌanagaca,
ateꞌ gulaꞌgúꞌu yöl-laꞌ ba Dios zoëꞌ yehuaꞌ yubá.
14 Chigudödi le buropi le rusuniti bönachi,
ateꞌ chizóa idxín le bunni le usuniti léguequi.
Rucödxëꞌ gubáz láꞌayi igadxi lúzubaꞌ böaꞌ bëdxi
15 Bucödxëꞌ gubáz láꞌayi igadxi lúzubaꞌ böaꞌ bëdxi,
ateꞌ guluíꞌi zidzaj didzaꞌ yuguꞌ chiꞌi yehuaꞌ yubá,
taꞌnná:
Gapa taꞌnná bëꞌ bönachi yödzölió
nadö́digaca lu nëꞌë Xanruꞌ Dios,
en lu nëꞌë Cristo.
Lëꞌ inná bë́ꞌticaꞌsëꞌ.
16 Níꞌirö idapa uruꞌë bönniꞌ gula naꞌ rö́ꞌögaquiëꞌ gapa naꞌ taꞌnná bëꞌë lahuëꞌ Dios,
buluꞌtsaga lógaquiëꞌ lu yu,
en taꞌyéaj ládxiꞌgaquiëꞌ Dios.
17 Taꞌnnë́ꞌ:
¡Xantuꞌ Dios,
napa cazuꞌ yöl-laꞌ huáca!
¡Guzóa cazuꞌ,
en zoa cazuꞌ,
en ral-laꞌ guída cazuꞌ!
¡Xclenuꞌ,
tuꞌ chibugunuꞌ dxin yöl-laꞌ huáca zxön quiuꞌ,
en risí loꞌ rinná bëꞌu!
18 ¡Gulaꞌlé bönachi yuguꞌ yödzö
pero chibidxín dza gunuꞌ léguequi xíguiaꞌ!
¡Naca dza uchiꞌa usörö́uꞌ nupa chinátigaca!
¡Ubiꞌu quégaquiëꞌ huen dxin quiuꞌ,
yuguꞌ bönniꞌ guluꞌë didzaꞌ uláz quiuꞌ,
nupa néquiguequi quez quiuꞌ,
en gulún bal Loꞌ,
nupa nácagaca cáꞌasö,
en nupa nácagaca lo!
¡Chibidxín dza usunítiuꞌ nupa buluꞌsuniti yödzölió!
19 Níꞌirö guyalaj yudoꞌ queëꞌ Dios röꞌö yehuaꞌ yubá,
ateꞌ biláꞌ lahui guíꞌina láꞌayi ga yuꞌu didzaꞌ rucáꞌana tsahuiꞌ le nunëꞌ Dios.
Guyëpi yösa,
en gulúꞌu bö zidzaj,
en gunnë́ guziúꞌ luyú.
Gudödi budóꞌ zxuꞌ,
en gurö́ꞌö guiö́j böguiꞌ yöla sunna.