Gubáz láꞌayi, nuáꞌ lu nëꞌë tu guíchidoꞌ
10
Níꞌirö biléꞌedaꞌ-nëꞌ iaꞌtúëꞌ gubáz láꞌayi nál-la,
bötjëꞌ birúajëꞌ yehuaꞌ yubá,
nácuëꞌ böaj lúzxiba,
en zoa ca tu biguitaꞌ ícjalëꞌ.
Rëpi yösa beníꞌ lahuëꞌ ca run gubidza,
ateꞌ nácagaca niꞌë ca yaꞌzxö́n taꞌyegui.
2 Zoa lu nëꞌë tu guíchidoꞌ nayalaj,
ateꞌ tu niꞌë ibëla nulibëꞌ lu nísadoꞌ,
en iaꞌtú niꞌë yö́göla nulibëꞌ luyú bidxi.
3 Níꞌirö bëꞌë zidzaj didzaꞌ,
ateꞌ biyö́n chiꞌë ca riyö́n cateꞌ ribö́dxiꞌabaꞌ bëdxi guixiꞌ,
en cateꞌ budxi bëꞌë zidzaj didzaꞌ naꞌ,
bilaꞌyöni chíꞌigaca gadxi guziúꞌ.
4 Cateꞌ budxi bilaꞌyöni chíꞌigaca guziúꞌ naꞌ,
nedaꞌ siꞌ uzúajaꞌ lu guichi,
pero biyöndaꞌ nu ruíꞌi didzaꞌ yehuaꞌ yubá,
rë nedaꞌ:
“Bucáchiꞌsö didzaꞌ ni guluíꞌi gadxi guziúꞌ naꞌ.
Bitiꞌ uzúajuꞌ didzaꞌ naꞌ lu guichi.”
5 Níꞌirö gubáz láꞌayi naꞌ biléꞌedaꞌ-nëꞌ zuínëꞌ lu nísadoꞌ,
en luyú bidxi,
guchisa nëꞌë ibëla zacaꞌ lúzxibalö,
6 ateꞌ ben tsutsu xtídzëꞌë niꞌa que Nu naꞌ zoa caz,
Nu naꞌ ben yehuaꞌ yubá,
en le nacuáꞌ niꞌ,
encaꞌ yödzölió,
en le nacuáꞌ niꞌ,
encaꞌ nísadoꞌ,
en le nacuáꞌ niꞌ,
ateꞌ gunnë́ꞌ:
“¡Bítiꞌrö tse!
7 Cateꞌ ucödxëꞌ gubáz láꞌayi igadxi lúzubaꞌ böaꞌ bëdxi,
usudxinëꞌ Dios le nagachiꞌ queëꞌ,
lë naꞌ buluíꞌinëꞌ yuguꞌ huen dxin queëꞌ,
bönniꞌ niꞌ guluꞌë didzaꞌ uláz queëꞌ.”
8 Níꞌirö chiꞌi naꞌ biyöndaꞌ rirúaj yehuaꞌ yubá bë́ꞌlen nedaꞌ didzaꞌ leyúbölö.
Gunná:
“Guyéaj,
yöjxíꞌ guíchidoꞌ nayalaj naꞌ zönëꞌ gubáz láꞌayi naꞌ nulibëꞌ lu nísadoꞌ,
en luyú bidxi.”
9 Guyijaꞌ ga naꞌ zoëꞌ gubáz láꞌayi naꞌ,
en gunábidaꞌ-nëꞌ gunnëꞌ guíchidoꞌ naꞌ quiaꞌ.
Gubáz láꞌayi naꞌ gudxëꞌ nedaꞌ,
gunnë́ꞌ:
“¡Guzxíꞌ,
gudagu!
Lu ruꞌu gaca zxixi ca naca bidxínaꞌdoꞌ queë́baꞌ buz,
pero lëꞌu huöáca siláꞌ.”
10 Guzxiꞌa guíchidoꞌ naꞌ zönëꞌ,
en gudahuaꞌ le.
Lu ruáꞌa guca zxixi ca naca bidxínaꞌdoꞌ naꞌ,
pero cateꞌ budxi gudahuaꞌ le,
böáca siláꞌ lëꞌa.
11 Níꞌirö gudxëꞌ nedaꞌ:
“Ral-laꞌ guꞌu didzaꞌ leyúbölö uláz queëꞌ Dios lógaca zián cöꞌ bönachi izáꞌa,
en gapa nacuáꞌ yúguꞌtë yödzö,
en gapa tuíꞌi zián didzaꞌ yúbölö,
en lógaca zián bönniꞌ unná bëꞌ.”