9
Bucödxëꞌ gubáz láꞌayi guyuꞌ lúzubaꞌ böaꞌ bëdxi,
ateꞌ biléꞌedaꞌ nu naca ca tu bölaj lúzxiba böxaj luyú,
ateꞌ buluꞌnödzjëꞌ nu naꞌ zxíꞌini guíë que lataj chul-la.
2 Gusaljëꞌ lataj chul-la naꞌ,
ateꞌ gurén dzön que lataj chul-la,
le guca ca dzön rirúaj ga tuꞌzéguiꞌë buláꞌdoꞌ,
ateꞌ gulaꞌchul-la gubidza,
en lúzxiba niꞌa que dzön naꞌ.
3 Lu dzön naꞌ bilaꞌrúajbaꞌ bö́chiꞌzu,
yuguꞌ le gulaꞌzxóasibaꞌ luyú,
ateꞌ Dios bëꞌë légacabaꞌ lataj iláduꞌbaꞌ bönachi ca tunbaꞌ xöjnö́ꞌ dzö́ꞌöbaꞌ luyú.
4 Gunná béꞌenëꞌ légacabaꞌ bitiꞌ ilún dítjabaꞌ guixiꞌ röꞌö luyú,
en bitiꞌ ilún dítjabaꞌ yuguꞌ le naca yaꞌa,
en calëga yuguꞌ yaga,
pero gácasö iláduꞌbaꞌ bönachi naꞌ bitiꞌ daꞌ lë naꞌ naca bëꞌ nu nequi queëꞌ Dios raꞌ xigágaquiëꞌ.
5 Bitiꞌ bëꞌë légacabaꞌ lataj ilútibaꞌ légaquiëꞌ,
pero uluꞌsacaꞌ zíꞌisibaꞌ légaquiëꞌ idú ca gayuꞌ beoꞌ.
Riládaꞌ ga táduꞌbaꞌ ca naꞌ rilá ga ráduꞌbaꞌ xöjnö́ꞌ.
6 Yuguꞌ dza naꞌ ilë́ꞌënëꞌ yuguꞌ bönniꞌ iluti cuíngaquiëꞌ,
pero bitiꞌ ilaꞌzéquiꞌnëꞌ.
Ilë́ꞌëninëꞌ ilátiëꞌ,
pero ucuíta cuini yöl-laꞌ guti.
7 Naláꞌgacabaꞌ bö́chiꞌzu naꞌ ca nácagacabaꞌ böaꞌ nácugacabaꞌ le néquiguequini guíë,
para tsöjácabaꞌ gudil-la.
Dxíagaca ícjagacabaꞌ le nácagaca ca tu le néquini oro.
Naca lógacabaꞌ ca naca lógaca bönachi.
8 Naca guitsaꞌ ícjagacabaꞌ ca naca guitsaꞌ ícjanu nigula.
Nácagaca láyiꞌgacabaꞌ ca nácagaca láyiꞌbaꞌ bëdxi guixiꞌ.
9 Nácugaca luchúꞌugacabaꞌ le néquini guíë.
Taꞌgúꞌu bö xíligacabaꞌ ca naꞌ taꞌgúꞌu bö carreta náꞌayöjgacabaꞌ böaꞌ taꞌxítiꞌbaꞌ lu gudil-la.
10 Nácagaca xibángacabaꞌ ca naca xibángacabaꞌ xöjnö́ꞌ,
zoa líꞌigacabaꞌ.
Lu xibángacabaꞌ naꞌ zoa le tuꞌdíꞌinibaꞌ,
para ilunbaꞌ ziꞌ bönachi idú ca gayuꞌ beoꞌ.
11 Zoa nu rinná beꞌe légacabaꞌ,
nu naꞌ naca gubáz xihuiꞌ que lataj chul-la.
Gubáz ni nazíꞌi le lu didzaꞌ hebreo:
Abadón,
le rnna lu didzaꞌ griego:
Apolión,
en lu didzaꞌ xidzaꞌ:
Nu Rusuniti.
12 Chigudödi tu le rusuniti bönachi,
le zaꞌ zíꞌalö,
pero záꞌgaca iaꞌchopa le uluꞌsuniti bönachi.
13 Bucödxëꞌ gubáz láꞌayi buzxopi lúzubaꞌ böaꞌ bëdxi,
ateꞌ biyöndaꞌ tu chiꞌi ruíꞌi didzaꞌ gatsaj láhuiꞌlö tapa le nácagaca ca lúzubaꞌ bëdxi dáꞌgaca tapa squin bucugu naꞌ néquini oro,
le röꞌ lahuëꞌ Dios.
14 Chiꞌi ni ruíꞌilen didzaꞌ gubáz láꞌayi buzxopi naꞌ siꞌ bucödxëꞌ lúzubaꞌ böaꞌ bëdxi,
en rnna:
“Busedxi idápatëꞌ gubáz xihuiꞌ naꞌ nágaꞌgaca raꞌ yegu Eufrates.”
15 Níꞌirö buluꞌsedxëꞌ tapa gubáz xihuiꞌ naꞌ,
chinucözëꞌ Dios léguequi para laꞌ náꞌasö,
le naca dza naꞌ,
en beoꞌ naꞌ,
en izi naꞌ,
para ilútigaca tu cöꞌ tsa tu tsonna cöꞌ bönachi nacuáꞌ yödzölió.
16 Biyöndaꞌ tsca nácagaquiëꞌ bönniꞌ röjáquiëꞌ gudil-la dxíagaquiëꞌ-baꞌ böaꞌ,
en dzágagaquiëꞌ tapa gubáz xihuiꞌ naꞌ.
Nácagaquiëꞌ idú chopa gayuáꞌ mil milëꞌ.
17 Biléꞌegacadaꞌ-baꞌ böaꞌ naꞌ ca tu lu bixín,
ateꞌ nupa taꞌbía légacabaꞌ nacu luchúꞌuguequi le naca guiꞌdoꞌos,
en yaꞌa ca lúzxiba,
en gulaj.
Nácagaca ícjagacabaꞌ böaꞌ naꞌ ca ícjabaꞌ bëdxi guixiꞌ,
ateꞌ lu ruáꞌagacabaꞌ taꞌrúaj guíꞌ,
en dzön,
en tu le ruzéguiꞌdaꞌ,
nazíꞌi le azufre.
18 Yuguꞌ lë naꞌ taꞌrúaj ruáꞌagacabaꞌ bë́tigaca tu cöꞌ tsa tu tsonna cöꞌ bönachi nacuáꞌ luyú,
lë naꞌ nácagaca guíꞌ,
en dzön,
en lë naꞌ ruzéguiꞌdaꞌ.
19 Yuguꞌ le tuꞌdíꞌinibaꞌ böaꞌ naꞌ taꞌrúaj ruáꞌagacabaꞌ,
en dzöꞌö lu xibángacabaꞌ,
tuꞌ nácagaca xibángacabaꞌ ca yuguꞌ bëla zoa ícjagacabaꞌ le tuꞌdíꞌinibaꞌ.
20 Iaꞌzícaꞌrö bönachi,
nupa bitiꞌ gulati lu chopa ni tuꞌsuniti,
bitiꞌ buluꞌbíꞌi ládxiꞌguequi para cabirö ilúngaca ca naꞌ túngaca,
en bitiꞌ buluꞌsán taꞌyéaj ládxiꞌguequi yuguꞌ böꞌ xihuiꞌ,
en yuguꞌ budóꞌ guiö́j budóꞌ yaga,
yuguꞌ budóꞌ naꞌ bitiꞌ taꞌléꞌe,
en bitiꞌ taꞌyöni,
en bitiꞌ gaca sáꞌgaca.
21 Bitiꞌ buluꞌbíꞌi ládxiꞌguequi para cabirö iluti bönachi,
en calëga para cabirö ilúngaca yöl-laꞌ gudzáꞌ quéguequi,
en le ruáꞌ döꞌ túngaca,
en yöl-laꞌ ribán quéguequi.