Le igadxi le naguelaꞌ guichi
8
Cateꞌ buládzuꞌë le igadxi le naguelaꞌ guichi naꞌ,
gurö́ꞌö dxi yehuaꞌ yubá idú gatsaj hora.
2 Níꞌirö biléꞌegacadaꞌ-nëꞌ gadxi gubáz láꞌayi naꞌ zuíguequinëꞌ lahuëꞌ Dios,
ateꞌ buluꞌdödëꞌ lu náꞌagaquiëꞌ gadxi lúzubaꞌ böaꞌ bëdxi.
3 Níꞌirö bidëꞌ iaꞌtúëꞌ gubáz láꞌayi,
nuꞌë tu zxígaꞌdoꞌ néquini oro,
en guzuínëꞌ raꞌ bucugu yehuaꞌ yubá niꞌ.
Gulúꞌudëꞌë yalaj lu nëꞌë para ugutsëꞌ le len yöl-laꞌ rulidza Dios le gulún yúguꞌtë bönachi queëꞌ Cristo,
en uzéguiꞌë le lu bucugu naꞌ néquini oro,
le zoa lahui lo lataj lo naꞌ.
4 Gurén dzön que yalaj naꞌ zoa lu nëꞌë gubáz láꞌayi naꞌ,
en guca tuz len yöl-laꞌ rulidza Dios le gulún bönachi queëꞌ Cristo,
ateꞌ bidxín ga naꞌ röꞌë Dios.
5 Níꞌirö gubáz láꞌayi naꞌ bulíëꞌ zxígaꞌdoꞌ naꞌ len boꞌ yalaj dxía lu bucugu naꞌ,
ateꞌ gurúꞌunëꞌ le luyú.
Gunnë́ guziúꞌ,
ateꞌ bö zidzaj biyö́n.
Guyëpi yösa,
en gudödi budóꞌ zxuꞌ.
Tuꞌcödxëꞌ lúzubaꞌ böaꞌ bëdxi
6 Níꞌirö igádxitëꞌ gubáz láꞌayi naꞌ zö́ngaquiëꞌ gadxi lúzubaꞌ böaꞌ bëdxi naꞌ gulaꞌcuꞌë sinaꞌ uluꞌcödxëꞌ léguequi.
7 Bucödxëꞌ gubáz láꞌayi zíꞌalö lúzubaꞌ böaꞌ bëdxi,
ateꞌ gurö́ꞌö guiö́j böguiꞌ yöla sunna,
en guíꞌ nutsíꞌi rön,
ateꞌ buluꞌhuöxaj luyú.
Guyegui tu cöꞌ tsa tu tsonna cöꞌ le dë luyú ni,
ateꞌ guyegui caꞌ tu cöꞌ tsa tu tsonna cöꞌ yaga.
Guyegui caꞌ yúguꞌtë guixiꞌ yaꞌa.
8 Bucödxëꞌ gubáz láꞌayi buropi naꞌ lúzubaꞌ böaꞌ bëdxi,
ateꞌ gubixi tu le naca ca tu guíꞌa zxön régui lu nísadoꞌ,
ateꞌ iaꞌlátiꞌdoꞌos ca gatsaj tu gatsaj nísadoꞌ naꞌ böáca rön.
9 Guti tu cöꞌ tsa tu tsonna cöꞌ le nabángaca dzöꞌö lu nisa zxön naꞌ,
ateꞌ guca ditaj tu cöꞌ tsa tu tsonna cöꞌ le taꞌdödi láhuiꞌlö nisa naꞌ.
10 Bucödxëꞌ gubáz láꞌayi bunni lúzubaꞌ böaꞌ bëdxi,
ateꞌ böxaj tu bölaj lúzxiba,
le régui ca tu guíꞌ yöri gapa dë nisa yegu,
encaꞌ gapa ralaj nisa,
ateꞌ guca caní que iaꞌlátiꞌdoꞌos ca gatsaj tu gatsaj nisa naꞌ röꞌö luyú.
11 Bölaj ni lëbaꞌ Ajenjo,
le naca tu le siláꞌ,
ateꞌ böáca siláꞌ iaꞌlátiꞌdoꞌos ca gatsaj tu gatsaj nisa gapa naꞌ dë nisa,
en guca ca naca le siláꞌ naꞌ,
ateꞌ gulati bönachi zián niꞌa que nisa naꞌ böáca siláꞌ.
12 Bucödxëꞌ gubáz láꞌayi budapi lúzubaꞌ böaꞌ bëdxi,
ateꞌ böáca chul-la iaꞌlátiꞌdoꞌos ca gatsaj tu gatsaj gubidza,
en lëscaꞌ caní guca que beoꞌ,
ateꞌ böáca chul-la tu cöꞌ tsa tu tsonna cöꞌ bölaj.
Caní guca,
bitiꞌ buzeníꞌ gubidza iaꞌlátiꞌdoꞌos ca gatsaj tu gatsaj dza,
en bitiꞌ buluꞌzeníꞌ bölaj,
en beoꞌ iaꞌlátiꞌdoꞌos ca gatsaj tu gatsaj rëla.
13 Níꞌirö buyúaꞌ,
en biyöndaꞌ ruꞌë zidzaj didzaꞌ tuëꞌ gubáz láꞌayi ridödëꞌ gatsaj láhuiꞌlö lúzxiba,
en rnnëꞌ:
“¡Bicaꞌ bayechiꞌ libíꞌiliꞌ!
¡Bicaꞌ bayechiꞌ libíꞌiliꞌ!
¡Bicaꞌ bayechiꞌ libíꞌiliꞌ zóaliꞌ luyú ni cateꞌ uluꞌcödxëꞌ iaꞌtsonnëꞌ gubáz láꞌayi naꞌ lúzubaꞌ böaꞌ bëdxi!”