Tu gayuáꞌ yuꞌ tapa-un milëꞌ bönniꞌ
7
Gudödi gulaca yuguꞌ lë ni biléꞌedaꞌ tapa gubáz láꞌayi zuíguequinëꞌ idapa laꞌa yödzölió.
Tuꞌzáguëꞌë xinö́zgaca idapa böꞌ recja tsöláꞌa huéaj luyú,
para cabí tsecja böꞌ luyú yödzölió,
en para cabí tsecja lu nísadoꞌ,
en para cabí utá yaga.
2 Biléꞌedaꞌ caꞌ iaꞌtúëꞌ gubáz láꞌayi zëꞌë rirúajëꞌ ga rilén gubidza.
Nuꞌë tu le udë́ꞌë nupa nácagaca queëꞌ Dios ban le gaca bëꞌ léguequi.
Bëꞌë zidzaj didzaꞌ,
en bulidzëꞌ idapëꞌ gubáz láꞌayi niꞌ nadödi lu náꞌagaquiëꞌ yöl-laꞌ huáca unná bëꞌ ilún dítjanëꞌ luyú,
en nísadoꞌ.
3 Gudxëꞌ légaquiëꞌ:
“Bitiꞌ gun dítjaliꞌ luyú,
en nísadoꞌ,
en yuguꞌ yaga cateꞌ udáꞌarötuꞌ tu le gaca bëꞌ raꞌ xigágaquiëꞌ bönniꞌ huen dxin queëꞌ Dios queë́ruꞌ.”
4 Biyöndaꞌ tsca nácagaquiëꞌ bönniꞌ daꞌ légaquiëꞌ lë naꞌ naca bëꞌ.
Nácagaquiëꞌ idú tu gayuáꞌ yuꞌ tapa-un milëꞌ ladaj yúguꞌtë cöꞌ zxíꞌini xiꞌsóëꞌ Israel.
5 Yuguꞌ bönniꞌ naꞌ daꞌ légaquiëꞌ lë naꞌ naca bëꞌ nácagaquiëꞌ:
Chinnu milëꞌ diꞌa dza queëꞌ Judá.
Chinnu milëꞌ diꞌa dza queëꞌ Rubén.
Chinnu milëꞌ diꞌa dza queëꞌ Gad.
6 Chinnu milëꞌ diꞌa dza queëꞌ Aser.
Chinnu milëꞌ diꞌa dza queëꞌ Neftalí.
Chinnu milëꞌ diꞌa dza queëꞌ Manasés.
7 Chinnu milëꞌ diꞌa dza queëꞌ Leví.
Chinnu milëꞌ diꞌa dza queëꞌ Isacar.
8 Chinnu milëꞌ diꞌa dza queëꞌ Zabulón.
Chinnu milëꞌ diꞌa dza queëꞌ José.
Chinnu milëꞌ diꞌa dza queëꞌ Benjamín.
Bönachi guizxi yu nácugaca lariꞌ chiguíchidoꞌos
9 Gudödi guca lë ni buyúaꞌ,
en biléꞌegacadaꞌ bönachi zián,
cuntu nu gaca ulaba léguequi.
Nabábagaquiëꞌ yúguꞌtë yödzö tuíꞌi didzaꞌ yúbölö idútë yödzölió.
Zuíguequinëꞌ ca dö́dilö lahui lataj lo,
ga naꞌ röꞌë caꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ,
en nácugaquiëꞌ lariꞌ chiguíchidoꞌos,
en zö́ngaquiëꞌ zin.
10 Tuꞌë zidzaj didzaꞌ yúguꞌtëꞌ,
taꞌnnë́ꞌ:
¡Yöl-laꞌ rusölá zaꞌ lu nëꞌë Dios queë́ruꞌ,
röꞌë lataj lo ni,
en zaꞌ caꞌ lu nëꞌë Bönniꞌ naꞌ náquiëꞌ Böꞌcuꞌ Zxílaꞌdoꞌ!
11 Zuíguequinëꞌ yúguꞌtë gubáz láꞌayi idú gásibiꞌilö lataj lo naꞌ,
encaꞌ idú gásibiꞌilö ga nacuꞌë bönniꞌ gula,
encaꞌ idú gásibiꞌilö ga nacuáꞌ idapa naꞌ nabángaca,
ateꞌ tuꞌtsaga lógaquiëꞌ lu yu ca dö́dilö lahui lataj lo naꞌ,
en taꞌyéaj ládxiꞌgaquiëꞌ Dios,
12 taꞌnnë́ꞌ:
¡Caꞌ gaca!
¡Yöl-laꞌ ba Liꞌ,
Dios queë́tuꞌ!
¡Napuꞌ yöl-laꞌ zxön,
en yöl-laꞌ réajniꞌi!
¡Rëtuꞌ Liꞌ:
“Xclenuꞌ”,
en runtuꞌ Liꞌ bal!
¡Napuꞌ yöl-laꞌ unná bëꞌ,
en yöl-laꞌ huáca!
¡Gácaticaꞌsö caní quiuꞌ,
Dios queë́tuꞌ!
¡Caꞌ gaca!
13 Níꞌirö gunábinëꞌ nedaꞌ tuëꞌ bönniꞌ gula naꞌ,
gunnë́ꞌ:
“¿Nupxi naꞌ nácugaca lariꞌ chiguíchidoꞌos,
en gapxi bönniꞌ légaquiëꞌ?”
14 Nedaꞌ gudxaꞌ lëꞌ:
“Xan,
liꞌ nöz quézinuꞌ.”
Lëꞌ gudxëꞌ nedaꞌ:
“Nupa ni gulaꞌguíꞌi gulaꞌzácaꞌdaꞌ.
Gulaꞌguíbëꞌ lariꞌ nácugaquiëꞌ,
en buluꞌún léguequi chiguíchidoꞌos len xichönëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ.
15 Que lë ni naꞌ nacuꞌë ca dö́dilö lahui lataj lo ga röꞌë rinná bëꞌë Dios,
en tunëꞌ dxin lahuëꞌ Lëꞌ rëla,
en të dza lu yudoꞌ queëꞌ.
Nu naꞌ röꞌö lataj lo ni gun chiꞌi légaquiëꞌ tuꞌ zóalenticaꞌsö légaquiëꞌ.
16 Bítiꞌrö ilaꞌdunëꞌ,
en bítiꞌrö ilaꞌbidxëꞌ nisa,
en bítiꞌrö ilaꞌyéguinëꞌ gubidza,
en bítiꞌrö iléquinëꞌ xilá
17 tuꞌ uyúëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ légaquiëꞌ ca nu uyú böꞌcuꞌ zxilaꞌ.
Zoëꞌ gatsaj láhuiꞌlö lataj lo naꞌ.
Ichë́ꞌë légaquiëꞌ gapa ralaj nisa le ruíꞌi yöl-laꞌ naꞌbán,
ateꞌ Dios uzxíëꞌ lógaquiëꞌ nisa taꞌbödxëꞌ.”