Yuguꞌ le naguélaꞌgaca guichi
6
Níꞌirö biléꞌedaꞌ-nëꞌ Bönniꞌ náquiëꞌ Böꞌcuꞌ Zxílaꞌdoꞌ,
ateꞌ buládzuꞌë tu le naguelaꞌ guichi naꞌ,
ateꞌ biyöndaꞌ tu nu nutsaꞌ ladaj idapa naꞌ nabángaca,
ateꞌ biyö́n chiꞌi ca guziúꞌ rinnë́,
gunná:
“¡Gudá uyúꞌ!”
2 Buyúaꞌ,
en biléꞌedaꞌ-baꞌ tubaꞌ böaꞌ chiguichi,
ateꞌ nu naꞌ dxía lëbaꞌ zön tu uxitiꞌ yaga.
Guluꞌë lëꞌ tu le néquini oro udxíëꞌ icjëꞌ,
ateꞌ birúajëꞌ ca tu nu nácatërö lo para idéliꞌnëꞌ lu gudil-la.
3 Cateꞌ buládzuꞌë le buropi le naguelaꞌ guichi naꞌ,
biyöndaꞌ nu buropi naꞌ nabán,
ateꞌ gunná:
“¡Gudá uyúꞌ!”
4 Níꞌirö birúajbaꞌ iaꞌtubaꞌ böaꞌ,
nácabaꞌ xiná.
Buluꞌdödëꞌ lu nëꞌe nu naꞌ dxía lëbaꞌ yöl-laꞌ huáca unná bëꞌ tsöjtúa yöl-laꞌ riböza dxiꞌa tsáhuiꞌdoꞌ quégaca bönachi,
en gun ga iluti luzë́ꞌeguequi.
Buluꞌnödzjëꞌ queëꞌ tu guíë tuchiꞌ zxön.
5 Cateꞌ buládzuꞌë le bunni le naguelaꞌ guichi naꞌ,
biyöndaꞌ nu bunni naꞌ nabán,
ateꞌ gunná:
“¡Gudá uyúꞌ!”
Buyúaꞌ,
en biléꞌedaꞌ-baꞌ tubaꞌ böaꞌ gasaj,
ateꞌ nu naꞌ dxía lëbaꞌ zön tu zxigóns.
6 Biyöndaꞌ ruíꞌi didzaꞌ tu chiꞌi gatsaj láhuiꞌlö tapa naꞌ nabángaca,
ateꞌ gunná:
“Chopa guíë zxoaꞌ xtila len lazxaj que tu dza huen dxin tuꞌ gaca gubín,
en xopa guíë zxoaꞌ cebada len lazxaj que tu dza huen dxin,
pero bitiꞌ gunuꞌ ga yadzaj le naca za,
en bitiꞌ bi gunuꞌ que xisi uva nal-la.”
7 Cateꞌ buládzuꞌë le budapi le naguelaꞌ guichi naꞌ,
biyöndaꞌ ruíꞌi didzaꞌ nu budapi naꞌ nabán,
ateꞌ gunná:
“¡Gudá uyúꞌ!”
8 Buyúaꞌ,
en biléꞌedaꞌ-baꞌ tubaꞌ böaꞌ gulaj,
ateꞌ nu naꞌ dxía lëbaꞌ nazíꞌi le Yöl-laꞌ Guti,
ateꞌ zéajlen nu naꞌ nu nazíꞌi le Lataj Chul-la.
Buluꞌdödëꞌ lu nëꞌe nu naꞌ inná beꞌe gatsaj tu gatsaj bönachi nacuáꞌ yödzölió para guti léguequi len guíë tuchiꞌ,
en len yöl-laꞌ ridún,
en len yuguꞌ yödzöhuë́ꞌ,
en len yuguꞌ böaꞌ guixiꞌ síniaꞌ dzö́ꞌöbaꞌ luyú.
9 Cateꞌ buládzuꞌë le guyuꞌ le naguelaꞌ guichi naꞌ,
biléꞌedaꞌ zxan bucugu yehuaꞌ yubá niꞌ yuguꞌ böꞌ gulaca cazëꞌ bönniꞌ niꞌ gulútiëꞌ légaquiëꞌ tuꞌ gulunëꞌ libán que xtídzëꞌë Dios,
en tuꞌ gulunëꞌ ba nalí queëꞌ.
10 Guluíꞌi zidzaj didzaꞌ yuguꞌ böꞌ ni,
gulaꞌnná:
“¡Xantuꞌ Láꞌayi,
runuꞌ ca rnnoꞌ!
¿Bátaxi caz uchiꞌa usörö́uꞌ queë́tuꞌ,
en uzíꞌi lëbuꞌ yuguꞌ bönniꞌ nacuꞌë yödzölió tuꞌ gulútiëꞌ netuꞌ?”
11 Buluꞌnödzjëꞌ quéguequi yuguꞌ lariꞌ chiguíchidoꞌos ilácuëꞌ,
en gulë́ꞌ léguequi:
“Ral-laꞌ uzíꞌ ládxiꞌliꞌ iaꞌtú chíꞌidoꞌosö,
ga idxinrö dza ilaꞌdxín yúguꞌtë luzáꞌaliꞌ huen dxin queëꞌ Cristo ni,
yuguꞌ bönniꞌ naꞌ ral-laꞌ iluti bönachi légaquiëꞌ caꞌ ca naꞌ bë́tigaca libíꞌiliꞌ.”
12 Cateꞌ buládzuꞌë le buzxopi le naguelaꞌ guichi naꞌ,
buyúaꞌ,
en biléꞌedaꞌ gudö́didaꞌ budóꞌ zxuꞌ luyú.
Böáca gasaj gubidza,
en guca ca tu lariꞌ guitsaꞌ gasaj,
ateꞌ böáca beoꞌ xiná ca naca rön.
13 Gulaꞌguínnaj bölaj lúzxiba lu yu,
le guca ca raca que yaga higo,
cateꞌ taꞌguínnaj le ribía cateꞌ rutá le böꞌ budunuꞌ.
14 Gudödi que lúzxiba,
ateꞌ guca que ca raca que tu guichi cateꞌ nu rutubi le.
Buluꞌtsáꞌ xilátjagaca yúguꞌtë guíꞌadoꞌ,
encaꞌ yúguꞌtë gapa zoa luyú bidxi lu nísadoꞌ.
15 Níꞌirö yuguꞌ bönniꞌ taꞌnná bëꞌë luyú,
en yuguꞌ bönniꞌ lo,
en yuguꞌ bönniꞌ taꞌléꞌenëꞌ yöl-laꞌ tsahuiꞌ,
en yuguꞌ bönniꞌ taꞌnná béꞌenëꞌ bönniꞌ röjáquiëꞌ gudil-la,
en yuguꞌ bönniꞌ dë lu náꞌagaquiëꞌ,
en yúguꞌtë nupa nadóꞌogaca,
en yúguꞌtë nupa bitiꞌ nadóꞌogaca buluꞌcachiꞌ lógaquiëꞌ gapa naca zxan bulóaj,
en gapa naca lëꞌe guiö́j lu guíꞌadoꞌ.
16 Gulë́ꞌ yuguꞌ guíꞌadoꞌ naꞌ,
en yuguꞌ lëꞌe guiö́j naꞌ:
“Guliꞌdubágaꞌ netuꞌ,
en buliꞌcachiꞌ netuꞌ,
para cabí iléꞌe Nu naꞌ röꞌö lataj lo niꞌ netuꞌ,
en para cabí ideliꞌ yöl-laꞌ rilé queëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ netuꞌ.
17 Chibidxín dza uluíꞌi lahui yöl-laꞌ rilé quégaquiëꞌ,
ateꞌ ¿nuzxi caz sequiꞌ guáꞌ ilén le?”