Tu guichi, en Bönniꞌ náquiëꞌ Böꞌcuꞌ Zxílaꞌdoꞌ
5
Níꞌirö biléꞌedaꞌ tu guichi lu naꞌ ibëla Nu naꞌ röꞌö lataj lo.
Guichi naꞌ naca tu guichi nudubi,
en dáꞌgaca didzaꞌ lë́ꞌelö,
en láhuilö.
Naguelaꞌ guichi naꞌ gadxi le nusáyajgaca le.
2 Biléꞌedaꞌ-nëꞌ tuëꞌ gubáz láꞌayi lo,
ateꞌ bëꞌë zidzaj didzaꞌ,
gunnë́ꞌ:
“¿Nuzxi naca lesacaꞌ uladzuꞌ le naguélaꞌgaca guichi ni,
en usalaj le?”
3 Cuntu nu guca usalaj guichi naꞌ,
en bitiꞌ guca nu uyú le,
calëga nu zoa yehuaꞌ yubá,
en calëga nu zoa luyú,
en calëga nu zoa zxánilö luyú.
4 Níꞌirö gurödxaꞌ tuꞌ cabí bidzöli nu naca lesacaꞌ usalaj guichi naꞌ,
en bitiꞌ bidzöli nu naca lesacaꞌ ulaba le,
en cuntu nu naca lesacaꞌ uyú le.
5 Níꞌirö tuëꞌ bönniꞌ gula niꞌ gudxëꞌ nedaꞌ,
gunnë́ꞌ:
“Bitiꞌ cödxuꞌ.
Bönniꞌ naꞌ náquiëꞌ ca bëdxi guixiꞌ,
en nabábalenëꞌ zxíꞌini xiꞌsóëꞌ Judá,
en náquiëꞌ caꞌ zxíꞌini xiꞌsóëꞌ David,
chibidéliꞌnëꞌ lu yúguꞌtë le raca,
en séquiꞌnëꞌ uládzuꞌë le naguélaꞌgaca guichi ni,
en usálajëꞌ le.”
6 Níꞌirö biléꞌedaꞌ-nëꞌ Bönniꞌ náquiëꞌ Böꞌcuꞌ Zxílaꞌdoꞌ,
zuínëꞌ lahuiꞌ lo lataj lo naꞌ zoa gatsaj láhuiꞌlö nupa naꞌ nabángaca,
en gatsaj láhuiꞌlëꞌ caꞌ yuguꞌ bönniꞌ gula naꞌ.
Dxíëꞌ huëꞌ ca naca que tu böꞌcuꞌ zxilaꞌ zoa nu bëti lëbaꞌ lahuëꞌ Dios,
nacuáꞌ gadxi lúzubaꞌ,
en gadxi guiö́j lobaꞌ,
le tuꞌluíꞌi ca nácagaca gadxi böꞌ naꞌ dzágagaca Dios,
nasö́l-lëꞌë léguequi idútë yödzölió.
7 Gudödëꞌ Bönniꞌ náquiëꞌ Böꞌcuꞌ Zxílaꞌdoꞌ,
en gudélëꞌë guichi naꞌ lu naꞌ ibëla Nu naꞌ röꞌö lataj lo naꞌ.
8 Cateꞌ chigudélëꞌë guichi naꞌ,
buluꞌzóa zxíbiguequi idapa nupa naꞌ nabángaca,
en idapa uruꞌë bönniꞌ gula naꞌ lahuëꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ.
Tu tuëꞌ bönniꞌ gula naꞌ zö́ngaquiëꞌ le rul-la nazíꞌi le arpa,
en nuáꞌagaquiëꞌ caꞌ yuguꞌ zxígaꞌdoꞌ néquiguequini oro,
yuguꞌ le yúdzugaca yalaj,
lë naꞌ ruluíꞌi yöl-laꞌ rulidza Dios quégaca bönachi queëꞌ.
9 Tul-lëꞌ tu le rul-la yöl-laꞌ ba,
le naca cubi,
le rnna caní:
Nacuꞌ lesacaꞌ quéluꞌu guichi naꞌ,
en uládzuꞌu le naguélaꞌgaca le,
tuꞌ bëꞌu lataj yuguꞌ bönniꞌ gulútiëꞌ Liꞌ,
ateꞌ len xichönuꞌ böáꞌuuꞌ bönachi para ilequi queëꞌ Dios,
nupa nácagaca bönachi izáꞌa nacuáꞌ idútë yödzölió,
bönachi tuíꞌi yúguꞌtë didzaꞌ yúbölö,
en nabábagaca yúguꞌtë yödzö,
en yúguꞌtë luyú nacuáꞌ idútë yödzölió.
10 Benuꞌ ga nácagaquiëꞌ bönniꞌ taꞌnná bëꞌë
en ga nácagaquiëꞌ bixúz queëꞌ Dios queë́ruꞌ.
Benuꞌ ga taꞌnná bëꞌë lu yu yödzölió.
11 Níꞌirö buyúaꞌ,
en biyöndaꞌ chíꞌigaquiëꞌ gubáz láꞌayi zián.
Zián gáyuꞌë,
en gáyuꞌë nacuꞌë.
Nacuꞌë idú gásibiꞌilö lataj lo naꞌ tsözxö́n len nupa naꞌ nabángaca,
encaꞌ yuguꞌ bönniꞌ gula naꞌ.
12 Tuꞌë zidzaj didzaꞌ yúguꞌtëꞌ,
taꞌnnë́ꞌ:
¡Bönniꞌ naꞌ náquiëꞌ Böꞌcuꞌ Zxílaꞌdoꞌ gulútiëꞌ,
náquiëꞌ lesacaꞌ gataꞌ yöl-laꞌ unná bëꞌ lu nëꞌë,
en yöl-laꞌ tsahuiꞌ,
en yöl-laꞌ réajniꞌi,
en yöl-laꞌ huáca!
¡Náquiëꞌ lesacaꞌ gunruꞌ-nëꞌ bal,
en tseaj ládxiꞌruꞌ Lëꞌ,
en cúꞌuruꞌ-nëꞌ yöl-laꞌ ba!
13 Níꞌirö biyöndaꞌ tul-la yúguꞌtë le benëꞌ Dios yehuaꞌ yubá,
en lu yu yödzölió,
en zxánilö luyú,
en lu nísadoꞌ.
Tul-la yúguꞌtë le nacuáꞌ yuguꞌ lataj naꞌ,
taꞌnná:
¡Yöl-laꞌ ba Nu naꞌ röꞌö lataj lo,
encaꞌ Bönniꞌ naꞌ náquiëꞌ Böꞌcuꞌ Zxílaꞌdoꞌ!
¡Gúnticaꞌsiruꞌ-nëꞌ bal
en cúꞌuticaꞌsiruꞌ-nëꞌ yöl-laꞌ ba,
ateꞌ inná bë́ꞌticaꞌsëꞌ Lëꞌ!
14 Idápatë nupa naꞌ nabángaca taꞌnná:
“¡Caꞌ gaca!”
Níꞌirö idapa uruꞌë bönniꞌ gula naꞌ buluꞌtsaga lógaquiëꞌ lu yu,
en gulaꞌyéaj ládxiꞌgaquiëꞌ Nu naꞌ zóaticaꞌsö.