Yöl-laꞌ ba taꞌguꞌë Dios yehuaꞌ yubá
4
Gudödi gulaca yuguꞌ lë ni,
buyúaꞌ,
en biléꞌedaꞌ tu ga nu riyaza le nayalaj yehuaꞌ yubá.
Biyöndaꞌ caꞌ chiꞌë bönniꞌ naꞌ biyöndaꞌ zíꞌalö,
ateꞌ bulidza zidzaj ca ribödxi lúzubaꞌ böaꞌ bëdxi.
Chiꞌi ni bulidza nedaꞌ,
gunná:
“Gudá xitsáꞌalö ni,
ateꞌ nedaꞌ uluíꞌidaꞌ liꞌ le run bayudxi ilaca tödi ni.”
2 Laꞌ níꞌisö guzóalenëꞌ Dios Böꞌ Láꞌayi nedaꞌ,
ateꞌ biléꞌedaꞌ yehuaꞌ yubá niꞌ tu lataj ga Nu röꞌö rinná bëꞌ,
en biléꞌedaꞌ caꞌ Nu naꞌ röꞌö lataj naꞌ.
3 Rëpi yösa beníꞌ Nu naꞌ röꞌö lataj naꞌ,
ca naꞌ rëpi yösa beníꞌ guiö́j jaspe,
en guiö́j cornalina,
yuguꞌ guiö́j nazácaꞌdaꞌ.
Idú gásibiꞌilö lataj naꞌ zoa biguitaꞌ le naca lachi ca naca guiö́j esmeralda,
le rë́pidaꞌ yösa beníꞌ.
4 Idú gásibiꞌilö lataj naꞌ nacuáꞌ caꞌ iaꞌtapa uruáꞌ lataj gapa taꞌbö́ꞌ nupa taꞌnná bëꞌ,
ateꞌ yuguꞌ lataj naꞌ rö́ꞌögaquiëꞌ tapa uruꞌë bönniꞌ gula,
nácugaquiëꞌ lariꞌ chiguíchidoꞌos,
en dxíagaca ícjagaquiëꞌ le néquiguequini oro.
5 Taꞌrúaj yösa,
en guziúꞌ rinnë́ lu lataj lo ga niꞌ röꞌö Nu naꞌ,
ateꞌ bö zxön ruꞌu.
Lahuiꞌ lo lataj naꞌ tuꞌzeníꞌ gadxi le taꞌgúꞌu beníꞌ,
le nácagaca gadxi böꞌ dzágagaca Dios.
6 Ca dö́dilö lahui lataj ni dë tu ca naca tu nísadoꞌ le rëpi yösa beníꞌ ca guiö́j jara.
Nacuáꞌ tapa nupa nabángaca cuiti lataj naꞌ,
tsöláꞌa huéaj,
ateꞌ zián guiö́j lógaca dxíagaca zacaꞌ cúdziꞌlöguequi,
en láhuilöguequi.
7 Tu nu nutsaꞌ ladaj tapa ni naláꞌ ca nácabaꞌ bëdxi guixiꞌ.
Nu naꞌ buropi naláꞌ ca nácabaꞌ bëdxi,
ateꞌ nu naꞌ bunni naláꞌ lahui ca naca lo bönniꞌ,
ateꞌ nu budapi naláꞌ ca nácabaꞌ bisiáꞌ ruzubaꞌ.
8 Idápatë nupa ni,
nacuáꞌ xopa xíligaca que queëguequi,
ateꞌ idáꞌalöguequi,
en lë́ꞌelöguequi xíliguequi dxíadaꞌgaca zián guiö́j lóguequi.
Rëla,
en te ža bitiꞌ taꞌcuáꞌ dxisö,
taꞌnná:
¡Láꞌayi!
¡Láꞌayi!
¡Láꞌayi náquiëꞌ Xanruꞌ Dios!
¡Napa cazëꞌ yöl-laꞌ huáca!
¡Guzóa cazëꞌ Lëꞌ,
en zoa cazëꞌ,
en chizóa ulë́ꞌ!
9 Nupa naꞌ nabángaca taꞌgúꞌu yöl-laꞌ ba Nu naꞌ röꞌö rinná bëꞌ,
en zóaticaꞌsö nabán.
Tun bal Nu naꞌ,
en të Nu naꞌ:
“Xclenuꞌ.”
Bátatiꞌtës tun idapa naꞌ caní,
10 tuꞌtsaga lógaca tapa uruꞌë bönniꞌ gula naꞌ lu yu lahuiꞌ lo Nu naꞌ,
en taꞌyéaj ládxiꞌgaca Nu naꞌ zóaticaꞌsö,
en tuꞌcuꞌë le néquiguequini oro dxía ícjagaquiëꞌ lahuiꞌ lo lataj ga niꞌ röꞌö rinná bëꞌ Nu naꞌ,
taꞌnnë́ꞌ:
11 ¡Xantuꞌ Dios,
nacuꞌ lesacaꞌ
cúꞌutuꞌ Liꞌ yöl-laꞌ ba,
en guntuꞌ Liꞌ bal,
en gataꞌ quiuꞌ yöl-laꞌ unná bëꞌ tuꞌ benuꞌ yúguꞌtë le dë!
¡Ca rë́ꞌëni quézinuꞌ nacuáꞌ,
en gulaꞌsí lo nacuáꞌ!