Didzaꞌ gusö́l-lëꞌë yödzö Sardis
3
Gunnë́ꞌ caꞌ:
“Lëscaꞌ caní buzúaj lu guichi didzaꞌ ni isö́l-luꞌu queëꞌ gubáz quiaꞌ zóalenëꞌ bönachi quiaꞌ lu yödzö Sardis.
Caní uzúajuꞌ lu guichi:
Ruꞌë didzaꞌ Bönniꞌ naꞌ nacuáꞌlen Lëꞌ gadxi böꞌ naꞌ,
ateꞌ zxóagacabaꞌ gadxi bölaj beníꞌ lu nëꞌë ibëla,
rnnëꞌ:
Nedaꞌ nöz quézidaꞌ le ruáꞌ döꞌ runliꞌ,
en nözdaꞌ chinati cázaliꞌ sal-laꞌ téquiguequi bönachi zóaliꞌ nabanliꞌ.
2 Buliꞌsubán ládxiꞌliꞌ.
Guliꞌgún tsutsu le nacuáꞌlen libíꞌiliꞌ,
le chizóa ilátigaca,
tuꞌ réquibeꞌedaꞌ le runliꞌ bitiꞌ naca idú tsahuiꞌ lahuëꞌ Dios.
3 Guliꞌtsöjné naꞌa xibá naꞌ biyö́niliꞌ le guzxíꞌ lu náꞌaliꞌ.
Guliꞌgún ca rnna xtídzëꞌë Dios,
en buliꞌbíꞌi ládxiꞌliꞌ.
Channö cabí usubán ládxiꞌliꞌ,
guídaꞌ ga zóaliꞌ tsálidoꞌos ca naꞌ ridxinëꞌ tsálidoꞌos gubán,
en bitiꞌ inö́ziliꞌ bizxi dza naꞌ guídaꞌ ga zóaliꞌ.
4 Nacuáꞌlen bal-la bönachi libíꞌiliꞌ lu yödzö Sardis,
nupa bitiꞌ nácagaca xihuiꞌ.
Ilaꞌdalen nupa ni nedaꞌ,
nácugaca lariꞌ chiguíchidoꞌos le ruluíꞌi nuhuöácagaca idú tsahuiꞌ,
en nácagaca lesacaꞌ gaca caní quéguequi.
5 Nupa ilaꞌdeliꞌ lu le raca yödzölió ugácuaꞌ léguequi lariꞌ chiguíchidoꞌos,
en bitiꞌ usúluaꞌ láguequi chinazúajgaca lu guichi ga nazúajgaca lágaca nupa nadéliꞌgaca yöl-laꞌ naꞌbán idú.
Siꞌ lu naꞌa nupa ni lahuëꞌ Xuzaꞌ Dios,
encaꞌ lógaquiëꞌ gubáz láꞌayi queëꞌ.
6 Nu riyöni ral-laꞌ uzë́ nagui lë ni rnnëꞌ Dios Böꞌ Láꞌayi,
ruíꞌilenëꞌ yuguꞌ cöꞌ bönachi quiaꞌ nedaꞌ,
Cristo,
didzaꞌ.”
Didzaꞌ gusö́l-lëꞌë yödzö Filadelfia
7 Gunnë́ꞌ caꞌ:
“Lëscaꞌ caní buzúaj lu guichi didzaꞌ ni isö́l-luꞌu queëꞌ gubáz quiaꞌ zóalenëꞌ bönachi quiaꞌ lu yödzö Filadelfia.
Caní uzúajuꞌ lu guichi:
Ruꞌë didzaꞌ Bönniꞌ naꞌ náquiëꞌ láꞌayi,
en ruꞌë didzaꞌ idútë li,
en dë lu nëꞌë zxíꞌini guíë queëꞌ David,
bönniꞌ gunná bëꞌë.
Bönniꞌ naꞌ ruꞌë didzaꞌ risálajëꞌ ga nu riyaza,
ateꞌ cuntu nu gaca usayaj le,
en rusayjëꞌ ga nu riyaza,
ateꞌ cuntu nu gaca isalaj le.
8 Bönniꞌ ni rnnëꞌ:
Nedaꞌ nöz quézidaꞌ le runliꞌ.
Nözdaꞌ nápaliꞌ látiꞌdoꞌos yöl-laꞌ huáca,
pero runliꞌ ca rnna xtídzaꞌa,
en bitiꞌ rutuíꞌiliꞌ rnnaliꞌ néquiliꞌ quiaꞌ.
Que lë ni naꞌ nuzóaꞌ loliꞌ tu ga nu tsaz le nayalaj,
ateꞌ cuntu nu gaca usayaj le.
9 Buliꞌyútsöcaꞌ,
taꞌdë́ꞌ bönniꞌ niꞌ Satanás,
tuꞌ xihuiꞌ,
en taꞌzíꞌ yëꞌë,
taꞌnnë́ꞌ nácagaquiëꞌ bönachi judío taꞌyéaj ládxiꞌgaca Dios,
pero bitiꞌ nácagaquiëꞌ caní,
gunaꞌ ga ilaꞌdxinëꞌ loliꞌ,
en uluꞌzechu zxíbigaquiëꞌ xiníꞌaliꞌ.
Níꞌirö iléquibeꞌenëꞌ nadxíꞌidaꞌ libíꞌiliꞌ.
10 Tuꞌ benliꞌ ca rnna xtídzaꞌa,
en gulö́zaliꞌ zxön ladxiꞌ,
gun chiꞌa libíꞌiliꞌ dza naꞌ ilaꞌguíꞌi ilaꞌzacaꞌ yúguꞌtë bönachi lu yödzölió ni,
lë naꞌ gaca para siꞌ bëꞌ léguequi.
11 ¡Siꞌ guídaꞌ!
Que lë ni naꞌ guliꞌgún chiꞌi le nápaliꞌ,
para cabí gaca nu gun ga cabí síꞌiliꞌ lë naꞌ ral-laꞌ gunnaꞌ queë́liꞌ.
12 Núlöliꞌ niꞌ idélaꞌliꞌ lu le raca yödzölió,
nedaꞌ gunaꞌ ga gácaliꞌ tsutsu ca nácagaca yaꞌzxö́n,
ateꞌ sóaliꞌ yudoꞌ ga naꞌ zoëꞌ Dios,
en catu caz irúajliꞌ niꞌ.
Udáꞌa libíꞌiliꞌ ca lëꞌ Dios quiaꞌ,
encaꞌ ca lë yödzö queëꞌ Dios le naca Jerusalén cubi,
le huötaj irúaj yehuaꞌ yubá lu nëꞌë Dios.
Lëscaꞌ udáꞌa libíꞌiliꞌ Laꞌ cubi.
13 Nu riyöni ral-laꞌ uzë́ nagui lë ni rnnëꞌ Dios Böꞌ Láꞌayi,
ruíꞌilenëꞌ yuguꞌ cöꞌ bönachi quiaꞌ nedaꞌ,
Cristo,
didzaꞌ.”
Didzaꞌ gusö́l-lëꞌë yödzö Laodicea
14 Gunnë́ꞌ caꞌ:
“Lëscaꞌ caní buzúaj lu guichi didzaꞌ ni isö́l-luꞌu queëꞌ gubáz quiaꞌ zóalenëꞌ bönachi quiaꞌ lu yödzö Laodicea.
Caní uzúajuꞌ lu guichi:
Ruꞌë didzaꞌ Bönniꞌ naꞌ zoëꞌ tsaz,
Bönniꞌ runëꞌ ca rnnëꞌ,
en ruꞌë didzaꞌ idútë li ca runëꞌ ba nalí,
en náquiëꞌ caꞌ Bönniꞌ naꞌ gulén lu nëꞌë yúguꞌtë le benëꞌ Dios.
15 Caní rnnëꞌ:
Nedaꞌ nöz quézidaꞌ le runliꞌ.
Ca runliꞌ naca ca nisa bitiꞌ naca ziaga,
tuꞌ cabí rucáꞌanaliꞌ tsaz nedaꞌ,
en bitiꞌ naca ca nisa zöguiꞌ,
tuꞌ cabí dáꞌaliꞌ nedaꞌ idú ládxiꞌliꞌ.
Dxíꞌarö gaca laꞌ gácaliꞌ ca nisa ziaga o ca nisa zöguiꞌ.
16 Naꞌa,
tuꞌ nácaliꞌ ca nisa nati yúlasö,
en bitiꞌ nácaliꞌ ca nisa ziaga,
en bitiꞌ nácaliꞌ ca nisa zöguiꞌ,
chúꞌunaꞌ libíꞌiliꞌ ca run nu ruhuë́bi nisa nati yula naꞌ.
17 Libíꞌiliꞌ rnnaliꞌ riléꞌeliꞌ yöl-laꞌ tsahuiꞌ queë́liꞌ,
en raca dxiꞌa queë́liꞌ,
en bitiꞌ bi riyadzaj queë́liꞌ,
pero bitiꞌ réquibeꞌeliꞌ le nácaliꞌ.
¡Bayechiꞌ nácaliꞌ!
¡Nácaliꞌ xizíꞌ!
¡Nácaliꞌ yechiꞌ,
en lo chul-la,
en ridaliꞌ xiguídisö!
18 Que lë ni naꞌ,
nedaꞌ ruzéajniꞌidaꞌ libíꞌiliꞌ gáꞌuliꞌ le naca ca oro lu naꞌa nedaꞌ le nunaꞌ dxiꞌa lu guíꞌ,
para gataꞌ yöl-laꞌ tsahuiꞌ idú queë́liꞌ.
Ral-laꞌ gáꞌuliꞌ caꞌ lariꞌ chiguichi quiaꞌ le gáculiꞌ para igachiꞌ yöl-laꞌ xiguídidö queë́liꞌ le run ga nu rutuíꞌi.
Ral-laꞌ gáꞌuliꞌ caꞌ quiaꞌ le gun ga uluꞌhuöáca guiö́j loliꞌ para gaca iléꞌeliꞌ le naca quiaꞌ.
19 Nedaꞌ ruzedaꞌ bach,
en run ziꞌa yúguꞌtë nupa nadxíꞌidaꞌ channö cabí tun le naca dxiꞌa.
Que lë ni naꞌ,
buliꞌbíꞌi ládxiꞌliꞌ,
en guliꞌgún xichinaꞌ idú ládxiꞌliꞌ.
20 Buliꞌyútsöcaꞌ,
nedaꞌ caz zuínaꞌ ga nu riyaza,
en rulidzaꞌ.
Channö nútiꞌtës nu yöni chiꞌa,
en isalaj quiaꞌ,
tsáziaꞌ,
en gágulenaꞌ nu naꞌ,
ateꞌ nu naꞌ gágulen nedaꞌ.
21 Núlöliꞌ idéliꞌliꞌ lu le raca yödzölió,
nedaꞌ gunaꞌ ga cö́ꞌöliꞌ tsözxö́n len nedaꞌ ga naꞌ röꞌa rinná bëꞌa,
ca naꞌ benëꞌ caꞌ Xuzaꞌ quiaꞌ nedaꞌ.
Bidéliꞌdaꞌ nedaꞌ lu le guca quiaꞌ,
ateꞌ gurö́ꞌlenaꞌ Xuzaꞌ tsözxö́n ga naꞌ röꞌë rinná bëꞌë.
22 Nu riyöni,
ral-laꞌ uzë́ nagui lë ni rnnëꞌ Dios Böꞌ Láꞌayi,
ruíꞌilenëꞌ didzaꞌ yuguꞌ cöꞌ bönachi quiaꞌ nedaꞌ,
Cristo.”