To yaba kob naꞌ sto yell-lio kob
21
Naꞌch bleꞌidꞌ to yaba kob naꞌ sto yell-lio kob, ḻaꞌ yaba nechaꞌ naꞌ yell-lio nechaꞌ binitlogakan naꞌ ḻekzkaꞌ nisdoꞌnaꞌ.
2 Naꞌ bleꞌidꞌ yell c̱he Chiozaꞌ, yell kobaꞌ le Jerusalén chetjan yabanaꞌ ganaꞌ llia Chiozaꞌ. Ba noneꞌn xochi ka to noolə beṉꞌ ba nakweꞌ xeꞌnaꞌ kwenc̱he wshagnaꞌleneꞌ beṉꞌ c̱heꞌnaꞌ.
3 Naꞌ ganaꞌ llia beenaꞌ chṉabiaꞌ, benidꞌ wṉe to beṉꞌ zillj inlleb, neꞌ:
―Chiozaꞌ ba zoeꞌ ladj beṉꞌ yell-liokaꞌ ṉaa. Naꞌ soaleneꞌ ḻegakeꞌ, naꞌ gakgakeꞌ yell c̱heꞌ, naꞌ kwin Chiozaꞌ soaleneꞌ ḻegakeꞌ naꞌ weꞌlaꞌogakeꞌneꞌ.
4 Naꞌ goneꞌ ka bich gatꞌ daa gonyeshiin ḻegakeꞌ. Bich bi yeḻꞌ wit gatꞌ, ni kochno kwell, ni koch no gakyeshii, ni koch no shey ḻa, ḻaꞌ ba wde c̱he yogꞌ diikaꞌ gotꞌ lo yell-lio nechaꞌ.
5 Naꞌ beenaꞌ llia ganaꞌ chṉabiꞌe wneꞌ nadꞌ:
―Nadaan chikobꞌ yogꞌḻoḻte.
Naꞌ ḻekzkaꞌ wneꞌ nadꞌ:
―Bzej dillꞌki, ḻaꞌ nakgakan dii ḻi naꞌ nakgakan dii gak wx̱enilallꞌ beṉꞌ.
6 Naꞌ ḻekzkaꞌ wneꞌ nadꞌ:
―Ba gok daa chiyaḻꞌ gak. Nadaan zaklebidꞌ letr nechaꞌ le Aa daa ba zoakzꞌ ka wxe wzil yell-lioni, naꞌ daa zoakzꞌ katꞌ te c̱heyin zaklebidꞌ letraꞌ chiyollin daa le Z.b Nadꞌkzan bx̱e bsilꞌ yogꞌḻoḻ dii de, naꞌ nadꞌkzan gonꞌ ka te c̱hegakin. Naꞌ beenaꞌ chbiḻi, wiꞌaneꞌ nis daa nsaꞌ yeḻꞌ mbannaꞌ naꞌ bibi sakileꞌn.
7 Beenaꞌ so saki soac̱hec̱heꞌ gonḻilallee nadꞌ, gaki c̱heꞌ dii wen dii shaoꞌ daa ba wniaꞌ gaki c̱heꞌ, naꞌ nadꞌ gak Chios c̱heꞌ naꞌ ḻeꞌ gakeꞌ biꞌ c̱haꞌ.
8 San ka nak beṉꞌkaꞌ blleb gon nadꞌ txen, naꞌ beṉꞌkaꞌ bi wyajḻeꞌ c̱haꞌ, naꞌ beṉꞌkaꞌ chongakeꞌ daa chakzbanidꞌ, naꞌ beṉꞌ wen xyakaꞌ, beṉꞌkaꞌ chṉelen ljwellin, beṉꞌkaꞌ nḻan yeḻꞌ willaꞌnaꞌ, beṉꞌkaꞌ choeꞌlaꞌo yaj yagkaꞌ, naꞌ yogꞌḻoḻ beṉꞌ wxiyeꞌkaꞌ, ḻegakenꞌ chidoḻꞌgakeꞌ shajgakeꞌ lo yiꞌ gabiḻaꞌ daa nc̱hix̱ azúfrenaꞌ, naꞌ ḻennanꞌ yeḻꞌ wit wchopinaꞌ.
Yell Jerusalénnaꞌ daa nak dii kob
9 Naꞌ ganaꞌ ziaꞌ bid to anjl beenaꞌ len anjlkaꞌ gall, beṉꞌkaꞌ nox̱ꞌ gall kopkaꞌ nakgakan tollaꞌ yeḻꞌ zakꞌziꞌkaꞌ zeelo, naꞌ wneꞌ nadꞌ:
―Da, wliidꞌ liꞌ xool Beenaꞌ Zaklebi to Xilꞌdoꞌ.
10 Naꞌ Espíritu c̱he Chiozaꞌ beneꞌ kwenc̱he wyaalenꞌ anjlaꞌ to lo yaa xen naꞌ dii sibə, naꞌ bliileꞌ nadꞌ yell Jerusalénnaꞌ daa nak yell c̱he Chiozaꞌ, chetjan yabalə ganaꞌ zoeꞌ.
11 Naꞌ yellaꞌ chey cheeniꞌn daa yoon yeḻꞌ chey cheeniꞌ c̱he Chiozaꞌ, naꞌ chṉaꞌtitan ka to yaj wan daa zakii daa le jaspe, daa chep yes ka vidr.
12 To zee xen dii sibə nec̱hjan yellaꞌ naꞌ zoan shlliṉ puert xen, naꞌ to to choꞌa puertkaꞌ ze twej anjl. Naꞌ ḻekzkaꞌ to to ḻee puertkaꞌ llia le tkwen dia c̱he dii Israelaꞌ.
13 Naꞌ tap ḻaate zeenaꞌ nec̱hj yellaꞌ zoan shoṉ wej puertkaꞌ.
14 Ḻoo len zee xennaꞌ nec̱hj yellaꞌ yoon shlliṉ yaj, naꞌ daꞌgakan le shlliṉte postl c̱he Jesucrístonaꞌ, Beenaꞌ Zaklebi to Xilꞌdoꞌ.
15 Naꞌ anjl, beenaꞌ bshaljleneꞌ nadꞌ, nox̱ee to dii nak ka xis de or kwenc̱he wchix̱ileꞌn yellaꞌ len puertkaꞌ naꞌch zee daa nec̱hjan.
16 Naꞌ yellaꞌ toz ka nakan de toṉlə naꞌch de zlagꞌlə. Naꞌ bchix̱ anjlaꞌ yellaꞌ naꞌ nakan c̱hopa mil c̱hop guiyoa kilómetro, naꞌ toz ka nakan ka de toṉlə, ka de siblə, naꞌch ka de zlagꞌlə.
17 Naꞌch bchix̱eꞌ zeenaꞌ naꞌ c̱hillan to guiyoa tapiyon llit.c Kon ka chchix̱ə nottezə beṉꞌ, kaꞌkzə bchix̱ anjlanꞌ.
18 Naꞌ zeenaꞌ daa nec̱hj yellaꞌ nakan de yaj wan daa le jaspe, naꞌ yellaꞌ nakan de or dowalj daa chep yes ka vidr.
19 Naꞌ yajkaꞌ yoo ḻoo len zeenaꞌ nakan xochi, nakan de biya yaj wan. Dii nechaꞌ nakan yaj wan daa le jaspe, de wchopinaꞌ nakan yaj wan daa le zafiro, de wyoṉinaꞌ nakan yaj wan daa le ágata, de wdapinaꞌ nakan yaj wan daa le esmeralda,
20 de gayiꞌnaꞌ nakan yaj wan daa le ónice, de wxopinaꞌ nakan yaj wan daa le cornalina, de gállinaꞌ nakan yaj wan daa le crisólito, de wxoniꞌnaꞌ nakan yaj wan daa le berilo, de gayinaꞌ nakan yaj wan daa le topacio, de shiyinaꞌ nakan yaj wan daa le crisoprasa, de shnejinaꞌ nakan yaj wan daa le jacinto, naꞌch de shlliṉinaꞌ nakan yaj wan daa le amatista.
21 Naꞌ puertkaꞌ shlliṉ nakgakan shlliṉ perla, to to puertkaꞌ nakan de toz perla. Naꞌ nez daa chde yellaꞌ nakan de or dowalj daa chep yes ka vidr.
22 Naꞌ ni to yoodoꞌ bi bleꞌidꞌ yellaꞌ, ḻaꞌ kwin X̱ancho Chiozaꞌ, beenaꞌ nak ḻiizelozi beṉꞌ yeḻꞌ wak choo yeḻꞌ wak xen, len Jesucrístonaꞌ, Beenaꞌ Zaklebi to Xilꞌdoꞌ, zoagakeꞌ ladj beṉꞌkaꞌ lleꞌ naꞌ.
23 Naꞌ yellaꞌ bi byalljin wbillaꞌ ni beoꞌdoꞌnaꞌ kwenc̱he wzeeniꞌgakan lawinnaꞌ, ḻaꞌ yeḻꞌ chey cheeniꞌ c̱he Chiozaꞌ naꞌ c̱he Jesucrístonaꞌ, Beenaꞌ Zaklebi to Xilꞌdoꞌ, chzeeniꞌn lawinnaꞌ.
24 Naꞌ beṉꞌkaꞌ zaꞌ doxen lo yell-lionaꞌ soagakeꞌ lao beeniꞌ c̱he Chiozaꞌ de yellaꞌ. Naꞌ beṉꞌkaꞌ chṉabiaꞌ yell-lioni wsaꞌgakeꞌ yeḻꞌ zakii c̱heꞌkaꞌ naꞌ balaaṉ c̱heꞌkaꞌ yellaꞌ.
25 Naꞌ puertkaꞌ zoa yellaꞌ toshiizi iyaljgakan, ḻaꞌ bichbi waḻ gatꞌ naꞌ.
26 Naꞌ yisaꞌgakeꞌ yellaꞌ do ka nak balaaṉ naꞌ yeḻꞌ zakii c̱he naciónkaꞌ.
27 Naꞌ biga shoꞌ ni to dii ndaꞌ nchen dii mal, ni nottez beṉꞌ chon dii chakzbani Chiozaꞌ, ni beṉꞌ chziyeꞌ, san toz beṉꞌkaꞌ daꞌ lieꞌkaꞌ ḻee libr c̱he Beenaꞌ Zaklebi to Xilꞌdoꞌ, ganaꞌ daꞌ le beṉꞌkaꞌ de yeḻꞌ mban c̱heyin zejḻi kaṉi.