Wsejeꞌ dii x̱iwaaꞌ to mil yiz
20
Naꞌ bleꞌidꞌ to anjl chetjeꞌ yabanaꞌ, naꞌ nox̱ee xiiṉya c̱he yechaꞌ daa bi chiyoll chido nak zitj naꞌ nox̱ee sto gden xen.
2 Naꞌ anjlaꞌ bc̱hejeꞌ bayix̱ꞌ xṉanaꞌ, banaꞌ nak beḻ kaniꞌteyi, ḻeban dii x̱iwaa naꞌ Satanázaꞌ, naꞌ bc̱hejeꞌn to mil yiz.
3 Naꞌ bzaḻeen ḻoo yechaꞌ daa bi chiyoll chido nak zitj, naꞌ bsejtipeꞌn kwenc̱he shejan to mil yiz naꞌ bich siyeꞌn beṉꞌ yell-liokaꞌ. Ka yiyoll gak to mil yiz naꞌ yiselleꞌn xtit.
4 Naꞌch bleꞌidꞌ ganaꞌ llia beṉꞌkaꞌ gok lo naꞌgakeꞌ gongakeꞌ yeḻꞌ josc̱hisaꞌ. Naꞌ ḻekzkaꞌ bleꞌidꞌ beṉꞌkaꞌ bc̱hoggakeꞌ yeneꞌkaꞌ ni c̱heyi daa beꞌgakeꞌ xtillꞌ Jesúzaꞌ naꞌ choꞌa xtillꞌ Chiozaꞌ. Ḻegakenꞌ bi beꞌlaꞌogakeꞌ bayix̱aa bchej ḻoo nisdoꞌnaꞌ ni bi beꞌgakeꞌ latj taꞌ seṉ c̱hebaꞌ loxgueꞌkaꞌ wa neekaꞌ. Naꞌ bibangakeꞌ sto shii naꞌ wṉabiaꞌlengakeꞌ Crístonaꞌ to mil yiz.
5 Ḻegakenꞌ beṉꞌ nechkaꞌ yiban ladj beṉꞌ wetkaꞌ. Naꞌ beṉꞌ wetkaꞌ sto, ka biyollch bzaꞌ de to mil yizaꞌ bibangakeꞌ.
6 Chakomba beṉꞌkaꞌ yiban nech ladj beṉꞌ wetkaꞌ, ḻaꞌ beṉꞌkanꞌ nak lallꞌ naꞌ Chiozaꞌ. Naꞌ bi ileꞌgakileꞌ yeḻꞌ wit wchopinaꞌ, san gakgakeꞌ bx̱oz c̱he Chiozaꞌ naꞌ c̱he Crístonaꞌ naꞌ iṉabiaꞌlengakeꞌneꞌ to mil yiz.
7 Katꞌ yiyoll izaꞌ de to mil yizaꞌ, yiselleꞌ Satanázaꞌ ganaꞌ nc̱hejeꞌn.
8 Naꞌ tan siyeꞌn beṉꞌkaꞌ lleꞌ tap ḻaate yell-lioni, beṉꞌkaꞌ zaklebgakeꞌ beṉꞌkaꞌ lleꞌ yellkaꞌ le Gog naꞌ Magog, naꞌ wtopan ḻegakeꞌ kwenc̱he shajlengakeꞌn lo wdiḻaꞌ, naꞌ gakgakeꞌ beṉꞌ be beṉꞌ zil ka yoxaꞌ chiꞌ choꞌa nisdoꞌnaꞌ.
9 Naꞌ bllesh bcheeṉgakeꞌ doxen lo yell-lioni naꞌ wyec̱hjgakeꞌ yellaꞌ daa ḻe chaki Chiozaꞌ, ganaꞌ lleꞌ beṉꞌkaꞌ nak lallꞌ nee, nan wlliayiꞌgakeꞌ ḻegakeꞌ. Per Chiozaꞌ bḻetjeꞌ yiꞌnaꞌ xan yabanaꞌ bisya bisḻenan ḻegakeꞌ.
10 Naꞌ bzaḻee dii x̱iwaa, daa wxiyeꞌn ḻegakeꞌ, lo yiꞌ gabiḻaꞌ daa nc̱hix̱ꞌ azúfrenaꞌ, ganaꞌ bzaḻee bayix̱aa bchej ḻoo nisaꞌ naꞌ banaꞌ wdix̱jeeb xtillꞌbaꞌ. Nanꞌ illaglogakan yeḻꞌ zakꞌziꞌnaꞌ ka tella ka waḻ zejḻi kaṉi.
Chiozaꞌ goneꞌ yeḻꞌ josc̱his c̱he beṉꞌ wetkaꞌ
11 Naꞌ bleꞌidꞌ ganaꞌ llia Chiozaꞌ chṉabiꞌe, nakan to dii llyish naꞌ to dii xen. Naꞌ laweꞌnaꞌ binitlo yell-lioni len yabanaꞌ, naꞌ koch no bleꞌi ḻegakan.
12 Naꞌ bleꞌidꞌ beṉꞌ wetkaꞌ, ka beṉꞌ zakii naꞌ ka beṉꞌ bi zakii, zegakeꞌ lao Chiozaꞌ ganaꞌ llieꞌ chṉabiꞌe. Naꞌ bsaljeꞌ librkaꞌ, naꞌtech bsaljeꞌ sto libr yoblə ganaꞌ daꞌ le beṉꞌkaꞌ de yeḻꞌ mban c̱heyin zejḻi kaṉi. Naꞌ beneꞌ yeḻꞌ josc̱his c̱he beṉꞌ wetkaꞌ kon ka choeꞌ librkaꞌ dillꞌ ben to toeꞌ.
13 Naꞌ biban yogꞌ beṉꞌkaꞌ wit ḻoo nisdoꞌnaꞌ, naꞌ beṉꞌ wetkaꞌ lleꞌ latj c̱he yeḻꞌ witaꞌ ganaꞌ le Hades,a naꞌ yogꞌḻoḻgakeꞌ gok yeḻꞌ josc̱his c̱heꞌkaꞌ kon ka ben to toeꞌ.
14 Naꞌch ḻekzkaꞌ bzaḻꞌ Chiozaꞌ yeḻꞌ witaꞌ naꞌ latjaꞌ le Hades lo yiꞌ gabiḻaꞌ. Naꞌ lo yiꞌ gabiḻanꞌ nakan yeḻꞌ wit wchopinaꞌ.
15 Naꞌ bzaḻee lo yiꞌ gabiḻaꞌ beṉꞌkaꞌ bi daꞌ lieꞌkaꞌ ḻee libraꞌ ganaꞌ daꞌ le beṉꞌkaꞌ de yeḻꞌ mban c̱heyin zejḻi kaṉi.