Kart daa bzej Júdazaꞌ
1
Nadꞌ Judas, nakꞌ wen llin c̱he Jesucrístonaꞌ naꞌ ḻekzkaꞌ nakꞌ beṉꞌ bishꞌ Jacóbonaꞌ. Chzejꞌ leꞌ, ka leꞌ chaki X̱acho Chiozaꞌ, leꞌ ba gox wṉabeꞌ, naꞌ chap chwia Jesucrístonaꞌ leꞌ.
2 Chiozaꞌ yiyeshꞌlallꞌshgaileꞌ leꞌ, naꞌ gonshgueꞌ ka soachle mbalaz naꞌ goneꞌ ka gakbeꞌchileꞌ ka chakileꞌ leꞌ.
3 Leꞌ beṉꞌ bishꞌdawaa naꞌ leꞌ beṉꞌ zandawaa, ḻe ba goklallꞌchgaꞌ wzejꞌ leꞌ naꞌ weꞌlenꞌ leꞌ dillꞌ ka nak daa ba ben Chiozaꞌ bisleꞌ choꞌ. Per chonchan byen wzejꞌ leꞌ kwenc̱he gonle ka dii le shajḻeꞌle kwasḻoḻ dillꞌ ḻi c̱he Chiozaꞌ daa bkwaaṉleneꞌ choꞌ c̱he toshiizi, ka choꞌ nakcho lallꞌ nee.
4 Ḻaꞌ ladjlenaꞌ do ngashꞌzə ba chda baḻ beṉꞌ, naꞌ ḻegakenꞌ, kaniꞌteyi ba nchogbiaꞌ c̱hegakeꞌ kwiayiꞌgakeꞌ daa nakgakeꞌ beṉꞌ mal. Naꞌ nagakeꞌ daa chiyeshꞌlalli Chiozaꞌ choꞌ wak goncho kon daa nan c̱hecho. Naꞌ chzoagakeꞌ kaꞌlə X̱ancho Jesucrístonaꞌ, beenaꞌ zeelo chṉabiaꞌ choꞌ.
5 Ḻaꞌkzi leꞌ ba ṉezilen, cheenidꞌ yisaa lallꞌle ka biyoll bibej X̱ancho Chiozaꞌ beṉꞌ Israelkaꞌ Egíptonaꞌ, blliayee beṉꞌkaꞌ bi wyajḻeꞌ c̱heꞌ.
6 Naꞌ ḻekzkaꞌ beneꞌ c̱he anjlkaꞌ, beṉꞌkaꞌ wlej yic̱hjgakeꞌ yeḻꞌ wṉabiaꞌ c̱heꞌkaꞌ daa beneꞌ lallꞌ nagakeꞌ, naꞌ bchejgakeꞌ latj ganaꞌ lleꞌgakeꞌ. Chiozaꞌ ntakw nc̱hejeꞌ ḻegakeꞌ zejḻi kaṉi ganaꞌ shgasj shc̱hoḻ, naꞌ nanꞌ nkwezeꞌ ḻegakeꞌ ax̱t katꞌ illin lla choo lla xennaꞌ wc̱hogloeꞌ c̱he yogꞌḻoḻ beṉꞌ.
7 Ḻekzkaꞌ beṉꞌkaꞌ wlleꞌ yell Sodómanaꞌ naꞌ yell Gomórranaꞌ, naꞌ yellkaꞌ nllaggakan, bengakeꞌ daa wnaz beli chen c̱heꞌkaꞌ, naꞌ wṉelen ljwellgakeꞌ, naꞌ ax̱t beṉꞌ byokaꞌ biyatꞌlen ljwellgakeꞌ naꞌ bengakeꞌ dii zban ka daa bi chiyaḻꞌ gonlencho beli chen c̱hechonaꞌ. Naꞌ Chiozaꞌ bseḻee yiꞌnaꞌ bzey bten ḻegakeꞌ. Naꞌ daa beneꞌ c̱hegakeꞌ kaꞌ, chsiꞌnileꞌ yogꞌḻoḻ beṉꞌ nan de yeḻꞌ zakꞌziꞌ zejḻi kaṉi c̱he beṉꞌkaꞌ bi chon wen.
8 Naꞌ kanꞌ chon beṉꞌ wxiyeꞌkaꞌ chda ladjlenaꞌ, nazgakeꞌ chleꞌdoꞌgakileꞌ, naꞌ choeꞌgakeꞌ choꞌa xbayi beli chen c̱heꞌkaꞌ, naꞌ bi cheengakileꞌ no iṉabiaꞌ ḻegakeꞌ naꞌ bi nallgakileꞌ chṉegakeꞌ c̱he anjlkaꞌ.
9 Kanaꞌ anjlaꞌ le Miguel, beenaꞌ nak beṉꞌ choo beṉꞌ xen ladj anjlkaꞌ, gokdiḻ-lenileꞌ dii x̱iwaa kwerp c̱he dii Moisézaꞌ, bi biyaxjileꞌ c̱hishjeꞌ biaꞌ blagꞌ c̱he dii x̱iwaa, san golleꞌn: “Chiozaꞌ, beenaꞌ nak X̱anꞌ, wsheshleneꞌ liꞌ.”
10 San beṉꞌ wxiyeꞌkaꞌ, chṉegakeꞌ c̱he dii bi chajniꞌgakileꞌ. Naꞌ chontezgakeꞌ diikaꞌ na beli chen c̱heꞌkaꞌ, ka chon bayix̱ꞌ ba bi nteyi. Naꞌ diikaꞌ chongakeꞌ, ḻeyeṉꞌgakannanꞌ chlliayiꞌn ḻegakeꞌ.
11 ¡Nyeshꞌlaz gak c̱he beṉꞌki!, daa chongakeꞌ ka ben dii Caínnaꞌ, naꞌ daa chongakeꞌ dii malaꞌ ni c̱he yeḻꞌ wzelallꞌ c̱heꞌkaꞌ, ka ben dii Balaamaꞌ. Naꞌ daa nakgakeꞌ widenag ka dii Corénaꞌ, kwiayiꞌgakeꞌ.
12 Beṉꞌki nakgakeꞌ ka dii bi nxe bi nzakꞌ lengakeꞌ ladjlenaꞌ katꞌ chonle lṉinaꞌ choeꞌlaꞌo ljwell-le, naꞌ lengakeꞌ leꞌ cheej chaogakeꞌ ni bi chiyii chidoꞌgakileꞌ. Naꞌ nakgakeꞌ ka to beṉꞌ chap bayix̱ꞌ naꞌ bi zieꞌ wṉeyi c̱hegakb, san ḻelgakeꞌ chap chwia kwingakeꞌ. Naꞌ nakgakeꞌ ka bejkaꞌ ze xan yabanaꞌ diikaꞌ bibi nis yollə naꞌ choaꞌ beꞌnaꞌ ḻegakan. Naꞌ nakgakeꞌ ka yag zix̱ dii bi chbia katꞌ chllin lla kwian. Latjin dii nan kwian, chilleelan chḻallꞌte do loyin naꞌ chbillan. Naꞌ beṉꞌkaꞌ chon kaꞌ ax̱t c̱hop shiilə ba mbiayiꞌgakeꞌ.
13 Naꞌ nakgakeꞌ ka bḻi c̱he nisdoꞌnaꞌ daa chas chatꞌ, naꞌ yeḻꞌ ztoꞌkaꞌ chongakeꞌ nakgakan ka bllinꞌ besjaꞌ daa chchooṉ bḻi c̱he nisdoꞌnaꞌ. Naꞌ ḻekzkaꞌ nakgakeꞌ ka beljkaꞌ diikaꞌ chlaa xṉezinkaꞌ. Naꞌ daa chongakeꞌ kaꞌ ba nchoglo c̱hegakeꞌ soaga
keꞌ ganaꞌ zeelo nak shgasj shc̱hoḻ zejḻi kaṉi.
14 Beenaꞌ wle Enoc, gokeꞌ beṉꞌ de galli lo dia c̱he Adánnaꞌ. Wdix̱jiꞌe daa goll Chiozaꞌ c̱he beṉꞌki chon dii malaꞌ, wneꞌ: “Ḻi wwiakachi, zaꞌ X̱anchonaꞌ nc̱hiꞌe beṉꞌ zan wal inlleb anjl c̱heꞌkaꞌ
15 kwenc̱he wc̱hogloeꞌ c̱he yogꞌḻoḻ beṉꞌ, naꞌ wsakꞌziꞌe beṉꞌ malkaꞌ ni c̱he yogꞌ dii malkaꞌ bengakeꞌ yeḻꞌ beṉꞌ mal c̱heꞌkaꞌ, naꞌ ni c̱he yogꞌḻoḻ daa wchell wṉegakeꞌ c̱heꞌ.”
16 Beṉꞌki bibikzə chazlallꞌgakeꞌ, naꞌ lillinzi chwia chyigakeꞌ c̱he beṉꞌ, naꞌ toshiizi choeꞌgakeꞌ choꞌa xbayi beli chen c̱heꞌkaꞌ. Naꞌ chshalj chshon c̱he kwingakeꞌ, naꞌ choeꞌlaꞌo choeꞌ dillꞌgakeꞌ beṉꞌ kwenc̱hezə gongakeꞌ beṉꞌ gan.
17 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, ḻi lljadini dillꞌkaꞌ beꞌ postlkaꞌ, beṉꞌkaꞌ ben X̱ancho Jesucrístonaꞌ lallꞌ naꞌgakeꞌ weꞌgakeꞌ choꞌa xtilleenaꞌ.
18 Wnagakeꞌ leꞌ, “Katꞌ ba zoa te c̱he yell-lioni, yid beṉꞌ wtitjgakileꞌ c̱he choꞌa xtillꞌ Chiozaꞌ daa chajḻeꞌcho, naꞌ gongakeꞌ kon daa nazan c̱hegakeꞌ.”
19 Ḻegakenꞌ chongakeꞌ c̱hoplə beṉꞌkaꞌ nonḻilallꞌ Chiozaꞌ, naꞌ chongakeꞌ daa na beli chen c̱heꞌkaꞌ naꞌ bi yoo Espíritu c̱he Chiozaꞌ ḻoo yic̱hjlallꞌdoꞌekaꞌ.
20 Naꞌ leꞌ beṉꞌ bishꞌdawaa naꞌ leꞌ beṉꞌ zandawaa, ḻi soac̱hec̱h gonḻilallꞌchle Chiozaꞌ, naꞌ ḻi iṉabi Espíritu Sántonaꞌ gakleneꞌ leꞌ weꞌḻwill-le Chiozaꞌ.
21 Ḻi gon ka cheeni Chiozaꞌ, beenaꞌ ḻe chaki leꞌ, naꞌ ḻi gon lez llanaꞌ goṉ X̱ancho Jesucrístonaꞌ choꞌ yeḻꞌ mban zejḻi kaṉinaꞌ daa chiyeshꞌlallileꞌ choꞌ.
22 Ḻi yiyeshꞌlallii beṉꞌkaꞌ chakc̱hopi.
23 Naꞌ zi baḻeꞌ, ḻi yislagakeꞌ lawi dii malaꞌ kwenc̱he bi lljayaakeꞌ lo yiꞌ gabiḻaꞌ. Naꞌ ḻi yiyeshlallii zi baḻ beṉꞌ chon dii malkaꞌ, per ḻi gakzbani saaxya c̱heꞌkaꞌ naꞌ ḻi wsakꞌ ki gonle ka chongakeꞌ.
24 Shajlaꞌoshga Chiozaꞌ, beenaꞌ nap yeḻꞌ wak gap wwieꞌ leꞌ kwenc̱he bi ibix̱le lao dii malaꞌ, naꞌ goneꞌ ka lljazele laweꞌnaꞌ ganaꞌ yoo balaaṉ xen c̱heꞌnaꞌ naꞌ yiba yizakile daa bibi xtoḻꞌle de.
25 Ḻaꞌ zeelo ḻenꞌ nakeꞌ Chios, naꞌ bisleꞌ choꞌ daa bseḻee X̱ancho Jesucrístonaꞌ, naꞌ chidoḻee koochoneꞌ balaaṉ naꞌ weꞌcho xtillee nakeꞌ beṉꞌ choo beṉꞌ xen, beṉꞌ ḻiizelozi chṉabiaꞌ, naꞌ beṉꞌ yeḻꞌ wak choo yeḻꞌ wak xen, ṉaa naꞌ zejḻi kaṉi. Kanꞌ nakan.