Jesucrístonaꞌ bliileꞌ Juannaꞌ c̱he diikaꞌ ziꞌ gak
1
Dgan blii Chiozaꞌ Jesucrístonaꞌ kwenc̱he bliileꞌ beṉꞌkaꞌ nonḻilallꞌ ḻeꞌ daa ba zoa gaoshosh gak. Naꞌ Jesucrístonaꞌ bseḻee anjl c̱heꞌnaꞌ kwenc̱he bidzajniileꞌ nadꞌ Juan, nakꞌ wen llin c̱heꞌ.
2 Naꞌ choꞌa dillꞌ c̱he yogꞌḻoḻ daa bleꞌidꞌ, naꞌ ṉezidꞌ nakan dowalj daa wna Chiozaꞌ naꞌ daa bliꞌyi Jesucrístonaꞌ nadꞌ.
3 Chakomba beenaꞌ chlab dillꞌki, diiki na Chiozaꞌ ziꞌ gak, naꞌ chakomba beṉꞌkaꞌ chzenaggakeꞌ naꞌ zegakeꞌ wṉeyi c̱heyin, ḻaꞌ ba zoa gaoshosh gakgakan.
Juannaꞌ chwapeꞌ chiox beṉꞌkaꞌ nonḻilallꞌ Crístonaꞌ ganaꞌ mbani Ásianaꞌ
4 Nadꞌ Juan chwapꞌ leꞌ chiox, ka leꞌ chdop chllagle choeꞌlaꞌole Jesucrístonaꞌ, leꞌ lleꞌle yellkaꞌ gall ganaꞌ mbani Ásianaꞌ. Chiozaꞌ, beenaꞌ zoa ka wxe wzil yell-lioni, naꞌ zoakzeꞌ ṉaa, naꞌ ni zoakzeꞌ katꞌ te c̱heyin, naꞌ espíritukaꞌ gall lleꞌ ganaꞌ zoeꞌ chṉabiꞌe, gaklenshgagakeꞌ leꞌ naꞌ wzoagakeꞌ leꞌ mbalaz.
5 Naꞌ ḻekzkaꞌ Jesucrístonaꞌ gaklenshgueꞌ leꞌ naꞌ wzoeꞌ leꞌ mbalaz. Ḻenꞌ beenaꞌ choeꞌ dillꞌ ḻi c̱he Chiozaꞌ, naꞌ ḻenꞌ beṉꞌ nechaꞌ biban ladj beṉꞌ wetkaꞌ naꞌ bich bi yeḻꞌ wit ileꞌileꞌ, naꞌ napeꞌ yeḻꞌ wṉabiaꞌ lao yogꞌḻoḻ beṉꞌ wṉabiaꞌkaꞌ lleꞌ yell-lioni. Ḻenꞌ chakileꞌ choꞌ naꞌ ba bisleꞌ choꞌ lao saaxya c̱hechokaꞌ daa blalj xc̱heneꞌnaꞌ,
6 naꞌ ba beṉeꞌ choꞌ yeḻꞌ wṉabiaꞌnaꞌ, naꞌ ba noneꞌ choꞌ bx̱oz c̱he X̱eꞌ Chiozaꞌ. Ḻenꞌ chidoḻee shoꞌe balaaṉ naꞌ iṉabiꞌe zejḻi kaṉi. Kanꞌ nakan.
7 Crístonaꞌ yiyedeꞌ ladj bejkaꞌ ze xan yabanaꞌ, naꞌ yogꞌḻoḻ beṉꞌ ileꞌgakileꞌneꞌ, lente beṉꞌkaꞌ betgakeꞌneꞌ. Naꞌ yogꞌḻoḻ beṉꞌ lleꞌ yell-lioni kwellyeshꞌgakeꞌ ka ileꞌgakileꞌneꞌ. Kanꞌ nakan.
8 “Nadaan zaklebidꞌ letr nechaꞌ le Aa daa ba zoakzꞌ ka wxe wzil yell-lioni, naꞌ daa zoakzꞌ katꞌ te c̱heyin zaklebidꞌ letraꞌ chiyollin daa le Z”,b kanꞌ na X̱ancho Chiozaꞌ, beenaꞌ zoa ka wxe wzil yell-lioni, naꞌ zoakzeꞌ ṉaa, naꞌ ni zoakzeꞌ katꞌ te c̱heyin, beenaꞌ nak beṉꞌ yeḻꞌ wak choo yeḻꞌ wak xen.
Juannaꞌ bleꞌdoꞌileꞌ Jesucrístonaꞌ
9 Nadꞌ Juan, nakꞌ leꞌ txen, naꞌ chṉabiaꞌ Chiozaꞌ choꞌ daa nakcho Crístonaꞌ txen naꞌ ḻaꞌkzi dii zan dii chen chleꞌicho daa chonḻilallꞌchoneꞌ, ḻekzenꞌ chakleneꞌ choꞌ chizo chizakicho diikaꞌ chen chleꞌicho. Naꞌ daa chyix̱jiꞌa xtillꞌ Chiozaꞌ naꞌ xtillꞌ Jesucrístonaꞌ bengakeꞌ nadꞌ pres naꞌ bseḻꞌgakeꞌ nadꞌ yell-liodoꞌni le Patmos, dga llia lo nisdoꞌni.
10 Naꞌ gok to lla, llanaꞌ nak lla c̱he X̱anchonaꞌ, Espíritu c̱he Chiozaꞌ beneꞌ ka benidꞌ wṉe to beṉꞌ zillj inlleb kollꞌləꞌ, ka ga chbell to trompet.
11 Naꞌ wneꞌ nadꞌ:
―Bzej dga chleꞌiloꞌ to ḻee yish, naꞌ bseḻaan lao beṉꞌkaꞌ chdop chllag choeꞌlaꞌogakeꞌ Jesucrístonaꞌ yellkaꞌ gall ganaꞌ mbani Ásianaꞌ: Éfesonaꞌ, Esmírnanaꞌ, Pérgamonaꞌ, Tiatíranaꞌ, Sárdizaꞌ, Filadélfianaꞌ, naꞌ Laodiceanaꞌ.
12 Naꞌ biyec̱hjꞌ kwenc̱he ileꞌidꞌ non chṉe nadꞌ, naꞌ ka biyec̱hjꞌ bleꞌidꞌ gall candeler de or chaḻꞌgakan.
13 Naꞌ ladj candelerkaꞌ gall bleꞌidꞌ to beṉꞌ nakeꞌ ka choꞌ beṉec̱h, naꞌ nakweꞌ to xeꞌ dii toṉ dii ze kollꞌ ṉiꞌenaꞌte, naꞌ ngoo ḻiꞌenaꞌ to badꞌ de or bllinten ka de choꞌalc̱hoꞌenaꞌ.
14 Yishꞌ yic̱hjeꞌnaꞌ nakan xtil ka xa xilꞌ wa ka beyaa, naꞌ jalaweꞌnaꞌ chzeeniꞌn ka beḻ yiꞌ.
15 Naꞌ ṉiꞌenaꞌ chep yesan ka daa neꞌ bronce dii ba benshawee lo yiꞌnaꞌ. Naꞌ shiꞌenaꞌ nenan sshag wal ka nen to yao xen daa chxop choꞌa bnaṉjaꞌ.
16 Nee de shḻinaꞌ nox̱ee gall belj, naꞌ choꞌenaꞌ chchejan to spad dii nḻatit c̱hop ḻaa. Naꞌ choꞌalaweꞌnaꞌ chṉaꞌtitan ka chṉaꞌtit wbillaꞌ.
17 Ka bleꞌidee, naꞌ bgooṉaa ka beṉꞌ wet xṉiꞌenaꞌ. Naꞌ bikwiseꞌ nadꞌ kon nee de shḻinaꞌ, naꞌ wneꞌ nadꞌ:
―Bi illeboꞌ. Nadaan zoaꞌ kanaꞌ wxe wzil yell-lioni naꞌ nadꞌkzan ni zoaꞌ katꞌ te c̱heyin.
18 Naꞌ nadꞌkzan beṉꞌ yaa beṉꞌ bannaꞌ. Betgakeꞌ nadꞌ, per bibanꞌ naꞌ mbanꞌ zejḻi kaṉi. Naꞌ napꞌ yeḻꞌ wak yislaꞌ beṉꞌ lo yeḻꞌ witaꞌ.
19 Bzej dga ba bleꞌiloꞌ, dga chak ṉaa, naꞌ daa ziꞌ gak.
20 Kin zeji c̱he beljkaꞌ gall daa nox̱aa lo naꞌ de shḻini naꞌ c̱he candelerkaꞌ gall diikaꞌ nak de or: beljkaꞌ gall zaklebin gall beṉꞌkaꞌc chap chwiagakeꞌ beṉꞌkaꞌ chdop chllag choeꞌlaꞌogakeꞌ nadꞌ yellkaꞌ gall. Naꞌ candelerkaꞌ gall zaklebin beṉꞌkaꞌ gall kwen.