19
Ka biyoll bleꞌidꞌ diiki, benidꞌ chosyaa beṉꞌ zan yabanaꞌ, nagakeꞌ:
¡Weꞌlaꞌocho Chiozaꞌ!
X̱ancho Chiozaꞌ, beenaꞌ chisla beṉꞌkaꞌ nonḻilallꞌgakeꞌneꞌ,
chidoḻee shoꞌe balaaṉ naꞌ iṉabiꞌe toshiizi,
2 ḻaꞌ ḻenꞌ choneꞌ yeḻꞌ josc̱his kon ka chiyaḻꞌ gakan.
Ba blliayee yellaꞌ daa ḻe wzeyi c̱heyi.
Yelli zaklebin nool wdanaꞌ daa wlooyeḻꞌgakeꞌ beṉꞌ yell-lionaꞌ bengakeꞌ ḻegakeꞌ txen bx̱iṉj bḻengakeꞌ.
Ba biziꞌe wzon c̱he beṉꞌkaꞌ nak lallꞌ nee, beṉꞌkaꞌ betgakeꞌ.
3 Naꞌch wiznagakeꞌ sto shii:
―¡Weꞌlaꞌocho Chiozaꞌ! Ba wlliayiꞌ wlliade yellaꞌ toshiizi.
4 Naꞌ beṉꞌkaꞌ tapichoa len beṉꞌkaꞌ zi tap, beṉꞌkaꞌ zoa x̱ilin, bc̱hekꞌ xibeꞌkaꞌ naꞌ yic̱hjeꞌkaꞌ bllinan ax̱t lo yonaꞌ beꞌlaꞌogakeꞌ Chiozaꞌ, beenaꞌ llia ganaꞌ chṉabiꞌe. Naꞌ nagakeꞌ:
―Kanꞌ nakan. Weꞌlaꞌocho Chiozaꞌ.
5 Naꞌ ganaꞌ llieꞌ chṉabiꞌe benidꞌ wṉe to beṉꞌ, naꞌ neꞌ:
Ḻi weꞌlaꞌo Chios c̱hechonaꞌ,
yogꞌḻoḻ-le leꞌ nakle lallꞌ nee naꞌ chall chllebleneꞌ,
ka beṉꞌ zakii ka beṉꞌ bi zakii.
Yeḻꞌ wishagnaꞌ c̱he Beenaꞌ Zaklebi to Xilꞌdoꞌ
6 Naꞌ benidꞌ shii beṉꞌ zan inlleb, naꞌ nenan ka nen to yao xen daa chxop choꞌa bnaṉjaꞌ naꞌ ka ga chṉe to wziwꞌ xen inlleb, nagakeꞌ:
¡Weꞌlaꞌocho Chiozaꞌ!
X̱ancho Chios, beṉꞌ yeḻꞌ wak choo yeḻꞌ wak xennaꞌ, ba wzoloeꞌ chṉabiꞌe.
7 Yiba yizakicho dii xen wal naꞌ koochoneꞌ balaaṉ.
Ḻaꞌ ba bllin lla wshagnaꞌ Beenaꞌ Zaklebi to Xilꞌdoꞌ.
Naꞌ beṉꞌkaꞌ nonḻilallꞌ ḻeꞌ ba ze kwasgakeꞌ chbezgakeꞌneꞌ ka chon noolaꞌ llanaꞌ wshagnee.
8 Naꞌ ba biꞌe twej xagakeꞌ de lechꞌ shaoꞌ dii nxi nyech naꞌ chep cheeniꞌn.
Naꞌ lechꞌ shawaa zaklebin dii wenkaꞌ bengakeꞌ.
9 Naꞌ wna anjlaꞌ nadꞌ:
―Bzej dga: “Chakomba beṉꞌkaꞌ gox wṉab Jesucrístonaꞌ soagakeꞌ katꞌ gak yeḻꞌ wishagnaꞌnaꞌ.”
Naꞌ wneꞌ:
―Diikin dillꞌ ḻi c̱he Chiozaꞌ.
10 Naꞌ bc̱hekꞌ xibaa lao anjlaꞌ kwenc̱he nan weꞌlawaaneꞌ, naꞌ wneꞌ nadꞌ:
―¡Bi gonoꞌ kaꞌ! Ḻaꞌ ḻekzkaꞌ wen llin c̱he Chiozaꞌ nadꞌ, ka nakoꞌ liꞌ naꞌ ka bishꞌ ljwelloꞌkaꞌ, beṉꞌkaꞌ zoac̱hec̱hgakeꞌ chajḻeꞌgakeꞌ c̱he Jesúzaꞌ. ¡Beꞌlaꞌo Chiozaꞌ!
Ḻaꞌ beṉꞌkaꞌ choeꞌ dillꞌ ḻi c̱he Jesúzaꞌ, zoa Espíritu c̱he Chiozaꞌ chzajniileꞌ ḻegakeꞌ kwenc̱he weꞌgakeꞌ xtilleenaꞌ.
Beenaꞌ llia kollꞌ kabay llyishaꞌ
11 Naꞌ bleꞌidꞌ nyaljə yabanaꞌ naꞌ bliꞌlao to kabay llyish. Naꞌ beenaꞌ llieꞌb lieꞌ Beṉꞌ Chon Kon Ka Neꞌ naꞌ Choꞌe Dillꞌ Ḻi. Naꞌ chc̱hogloeꞌ c̱he beṉꞌ kon ka chidoḻꞌ goneꞌ c̱hegakeꞌ, naꞌ chdiḻ-leneꞌ beṉꞌkaꞌ chidoḻꞌ tiḻ-leneꞌ.
12 Jalaweꞌnaꞌ chzeeniꞌgakan ka beḻ yiꞌ, naꞌ nllin yic̱hjeꞌnaꞌ dii zan corona. Naꞌ daꞌn to lieꞌ daa tozeꞌ ḻeꞌ nombiꞌe.
13 Naꞌ nakweꞌ to xeꞌ dii nak ka dii wleej chen, naꞌ lieꞌ Choꞌa Xtillꞌ Chios.
14 Naꞌ nc̱hiꞌe wen wdiḻ c̱heꞌkaꞌ, beṉꞌkaꞌ lleꞌ yabanaꞌ, naꞌ nakwgakeꞌ lechꞌ shaoꞌ daa nxi nyech, naꞌ kabaykaꞌ lliagakeꞌ nakgakb ba llyish.
15 Naꞌ chchej choꞌenaꞌ to spad dii nḻatit kwenc̱he wlliayiꞌleneꞌn beṉꞌkaꞌ lleꞌ yell-lioni. Naꞌ iṉabiꞌe ḻegakeꞌ, naꞌ bi siꞌxeneꞌ c̱he nottez beṉꞌ bi chzenag c̱heꞌ. Naꞌ lo yeḻꞌ chllaa c̱he Chios, beṉꞌ yeḻꞌ wak choo yeḻꞌ wak xennaꞌ, wsakꞌziꞌe ḻegakeꞌ gonileꞌ ḻegakeꞌ ka chon to beṉꞌ chlej chshoshj uvanaꞌ kwenc̱he chzin.
16 Ḻee lechaa nakweꞌ ka do ḻee xic̱hjeꞌnaꞌ daꞌn lieꞌnaꞌ, nan: “Beṉꞌ zeelo nak X̱an yogꞌḻoḻ beṉꞌ, naꞌ Beṉꞌ ḻiizelozi chṉabiaꞌ lao yogꞌḻoḻ beṉꞌ.”
17 Naꞌ bleꞌidꞌ to anjl zieꞌ lo wbilldoꞌnaꞌ, naꞌ chosyee, chiꞌe yogꞌ bakaꞌ ze xan yabanaꞌ:
―Ḻi yidop yillag kwenc̱he yeej gaole to xsheꞌ xen daa ba ben Chiozaꞌ c̱hele.
18 Naꞌ gaole xpelꞌ beṉꞌ wṉabiaꞌkaꞌ, naꞌ c̱he beṉꞌkaꞌ ngoo lallꞌ naꞌ wen wdiḻkaꞌ, naꞌ c̱he beṉꞌ walkaꞌ, naꞌ gaole xpelꞌ kabaykaꞌ naꞌ c̱he beṉꞌkaꞌ chbiab. Naꞌ gaole xpelꞌ yogꞌḻoḻ beṉꞌ, ka beṉꞌ ndoo lla yel choneꞌ xshin beṉꞌ ka beṉꞌ chon llin c̱hekzeꞌ, ka beṉꞌ zakii ka beṉꞌ bi zakii.
19 Naꞌ bleꞌidꞌ bayix̱aa, banaꞌ bchej ḻoo nisdoꞌnaꞌ len beṉꞌ wṉabiaꞌkaꞌ chṉabiaꞌ lo yell-lioni naꞌ wen wdiḻ c̱heꞌkaꞌ bidop billaggakeꞌ kwenc̱he tiḻ-lengakeꞌ beenaꞌ llia kabayaꞌ naꞌ wen wdiḻ c̱heꞌkaꞌ.
20 Naꞌ bex̱ꞌgakeꞌ bayix̱aa bchej ḻoo nisdoꞌnaꞌ len banaꞌ chyix̱jee xtillꞌbaꞌ, banaꞌ ben chiya yeḻꞌ wak ganaꞌ llia bayix̱aa. Naꞌ daa bem kaꞌ wxiyeꞌb beṉꞌkaꞌ beꞌ latj shoꞌgakeꞌ seṉ c̱he bayix̱aa naꞌ beꞌlaꞌogakeꞌ lwaa lsakꞌbaꞌ. Naꞌ shiꞌa shbangakb bzaḻee c̱hopteb lo yiꞌnaꞌ chaḻꞌṉiṉ daa nc̱hix̱ azúfrenaꞌ.
21 Naꞌ beṉꞌkaꞌ len ḻegakb, beti beenaꞌ llia kabayaꞌ ḻegakeꞌ spad daa chchej choꞌenaꞌ, naꞌ yogꞌḻoḻ bakaꞌ ze xan yabanaꞌ belj bllaꞌgakib xpeleekaꞌ.