Kwiayiꞌ yell Babilónianaꞌ
18
Ka biyoll bleꞌidꞌ dga, naꞌch bleꞌidꞌ sto anjl chetjeꞌ yabanaꞌ, naꞌ nsaꞌchgueꞌ yeḻꞌ wṉabiaꞌ xen inlleb, naꞌ beeniꞌ c̱heꞌnaꞌ bzeeniꞌn doxen yell-lioni.
2 Naꞌ besyaadieꞌ neꞌ:
―¡Ba wlliayiꞌ Babilónianaꞌ, yellaꞌ ḻe wzeyi c̱heyi! ¡Ba wlliayiꞌn! Ba biyakan lill xḻatjə dii x̱iwꞌkaꞌ. Ba biyakan ga lleꞌ llaꞌ chiya dii x̱iwꞌ naꞌ ga lleꞌ llaꞌ yogꞌḻoḻ ba chda xan yabanaꞌ ba nak zban, ba chpani beṉꞌ.
3 Ḻaꞌ yellaꞌ wlleꞌ beṉꞌkaꞌ zaklebi noolaꞌ chsolli beṉꞌ kwenc̱he gonlen ljwellgakeꞌ bittez dii zbankaꞌ cheeni beli chen c̱heꞌkaꞌ, daa wlooyeḻꞌgakeꞌ beṉꞌkaꞌ lleꞌ yogꞌ naciónkaꞌ len beṉꞌkaꞌ chṉabiaꞌ ḻegakeꞌ kwenc̱he gongakeꞌ dii malkaꞌ bengakeꞌ. Naꞌ beṉꞌkaꞌ chitꞌ chde lo yell-lioni biyakgakeꞌ beṉꞌ wniꞌa ni c̱he yellaꞌ daa chitꞌ chdegakeꞌ diikaꞌ zeelo chibayi beṉꞌkaꞌ lleꞌ naꞌ.
4 Naꞌ benidꞌ wṉe sto beṉꞌ yabanaꞌ, neꞌ:
―Ḻi yichej yell Babilónianaꞌ, ka leꞌ nakle lallꞌ naꞌ, kwenc̱he bi gonle txen saaxyakaꞌ chongakeꞌ, naꞌ bi ileꞌileꞌ yeḻꞌ zakꞌziꞌkaꞌ ileꞌi beṉꞌkaꞌ lleꞌ naꞌ.
5 Ḻaꞌ saaxyakaꞌ chak yellaꞌ nakan dii zan inlleb, naꞌ ngoo yic̱hj Chiozaꞌ dii malkaꞌ chongakeꞌ.
6 Ka ba bsakꞌziꞌgakeꞌ beṉꞌ, kaꞌkzan sakꞌziꞌgakeꞌ. Yeḻꞌ zakꞌziꞌ xench yen ileꞌgakileꞌ aga ka daa ba bengakileꞌ beṉꞌ, ax̱t c̱hoplə ka daa bc̱hiꞌ bsakꞌgakeꞌ beṉꞌ yen ileꞌgakileꞌ.
7 Ka to ba beꞌlaꞌo kwingakeꞌ naꞌ ka to ba biba bizakgakileꞌ bengakeꞌ daa nazan c̱hegakeꞌ, kaꞌkzan illaglogakenꞌ naꞌ kwellyeshꞌgakeꞌ lao yeḻꞌ zakꞌziꞌ c̱heꞌkaꞌ. Ḻaꞌ ḻoo yic̱hjlallꞌdoꞌekaꞌ nan: “Ni zoantoꞌ ka beṉꞌ wṉabiaꞌ. Bi nakntoꞌ ka beṉꞌ ba bzeb naꞌ biga kwellyeshꞌntoꞌ.”
8 Naꞌ daa nagakeꞌkaꞌ, shllazə yen ileꞌgakileꞌ yeḻꞌ zakꞌziꞌki: baḻgakeꞌ guet, naꞌ beṉꞌkaꞌ yigaaṉ kwellyeshꞌgakeꞌ naꞌ ibiḻ idongakeꞌ, naꞌ sheygakeꞌ lo yiꞌnaꞌ, ḻaꞌ beṉꞌ yeḻꞌ wak choo yeḻꞌ wak xen nak X̱ancho Chiozaꞌ, beenaꞌ ba bc̱hogloeꞌ c̱hegakeꞌ.
9 Naꞌ beṉꞌ wṉabiaꞌkaꞌ lleꞌ yell-lioni beṉꞌkaꞌ ben ḻegakeꞌ txen bengakeꞌ yeḻꞌ wdanaꞌ naꞌ biba bizakgakileꞌ lawi daa na beli chen c̱heꞌkaꞌ, kwellyeshꞌgakeꞌ ni c̱he yell Babilónianaꞌ katꞌ ileꞌgakileꞌ c̱hasan llennaꞌ daa cheyan.
10 Naꞌ segakeꞌ zitꞌlə daa chllebgakeꞌ yeḻꞌ zakꞌziꞌnaꞌ chllaglo beṉꞌkaꞌ lleꞌ naꞌ, naꞌ iṉagakeꞌ:
―¡Nyeshꞌlaz inlleb chak c̱hoꞌ, yell Babilonia, liꞌ ḻe zeyi c̱hoꞌ chṉabiꞌo! Ḻaꞌ tolbeꞌ ba blaꞌ yeḻꞌ zakꞌziꞌ c̱hoꞌni.
11 Naꞌ beṉꞌkaꞌ chitꞌ chde lo yell-lioni ḻekzkaꞌ kwellgakeꞌ naꞌ gakyeshꞌgakileꞌ ni c̱heyin, ḻaꞌ kochno zoa no siꞌ diikaꞌ chitꞌ chdegakeꞌ,
12 diikaꞌ nak de or, de plat, yaj wan, perla, lechꞌ shaoꞌ de lino naꞌ de sed, lechꞌ morad naꞌ dii xṉaḻiḻ, naꞌ biya yaglaꞌ dii chḻaꞌ zix̱, no diikaꞌ chongakileꞌ ḻoshj lefantkaꞌ naꞌ de yaglaꞌ diikaꞌ nak mbalaz inlleb, naꞌch de ya, naꞌ de yajes.
13 Naꞌ ḻekzkaꞌ chitꞌ chdegakeꞌ canel, clab pimient, yal, set zix̱, nillꞌ c̱he yag dii chḻaꞌ zix̱, vino, set, yezj widi, trigo, bayix̱ꞌ ba choaꞌ yoaꞌ, xilꞌ, kabay naꞌ karret daa chgoyogakb, ga biyollin ax̱t chitꞌ chdetegakeꞌ beṉꞌ gon xshin beṉꞌ.
14 Naꞌ yeꞌgakeꞌ beṉꞌkaꞌ lleꞌ yellaꞌ:
―Bichbi yeḻꞌ shaoꞌ c̱helekaꞌ de, diikaꞌ bibaile. Ba binit yeḻꞌ wniꞌa c̱helekaꞌ naꞌ bichga ileꞌileꞌ dii wen dii shaoꞌkaꞌ.
15 Naꞌ beṉꞌkaꞌ betꞌ bde chiya diikaꞌ bsaꞌgakeꞌ naꞌ bniꞌagakeꞌ daa betꞌ bdegakeꞌn yellaꞌ, zitꞌlə segakeꞌ daa chllebgakeꞌ yeḻꞌ zakꞌziꞌnaꞌ chllaglo beṉꞌkaꞌ lleꞌ naꞌ, naꞌ kwellyeshꞌgakeꞌ.
16 Naꞌ iṉagakeꞌ:
―¡Nyeshꞌlaz inlleb chak c̱he yellaꞌ ḻe wzeyi c̱heyi, ganaꞌ gokwgakeꞌ lechꞌ shaoꞌkaꞌ nak de lino, naꞌ lechꞌ morad naꞌ dii xṉaḻiḻ, daa daꞌ or, perla naꞌch yaj wan!
17 ¡Ḻaꞌ tolbeꞌ binit yeḻꞌ wniꞌa c̱heyinnaꞌ!
Naꞌ yogꞌ beṉꞌkaꞌ chsaꞌ barkwkaꞌ, naꞌ yogꞌ beṉꞌkaꞌ choogakeꞌn, naꞌ beṉꞌkaꞌ chon llin ḻoo barkwkaꞌ, naꞌ yogꞌ beṉꞌkaꞌ chon llin lo nisdoꞌnaꞌ kwenc̱he cheej chaogakeꞌ, segakeꞌ zitꞌlə wwiagakeꞌn.
18 Naꞌ ka ileꞌgakileꞌ chey yellaꞌ naꞌ gosyaagakeꞌ, iṉagakeꞌ:
―¡Bichga zoa sto yell dii zaklebin yelli dga ḻe zeyi c̱heyin!
19 Naꞌ yillee bishte yonaꞌ yic̱hjeꞌkaꞌ, leyi kwellyeshꞌgakeꞌ, naꞌ gosyaagakeꞌ iṉagakeꞌ:
―¡Nyeshꞌlaz inlleb chak c̱he yelli dga ḻe zeyi c̱heyin! Yogꞌ beṉꞌkaꞌ wdalen barkwkaꞌ lo nisdoꞌnaꞌ bniꞌalengakeꞌ yeḻꞌ shaoꞌ c̱heyinnaꞌ. ¡Naꞌ tolbeꞌ ba wlliayiꞌn!
20 Ka leꞌ lleꞌle yabanaꞌ, leꞌ nakle lallꞌ naꞌ Chiozaꞌ, naꞌ ka leꞌ bseḻee weꞌle xtilleenaꞌ, naꞌ ka leꞌ nakle beṉꞌ wdix̱jee daa wna Chiozaꞌ leꞌ, ḻi yiba yizaki, ḻaꞌ Chiozaꞌ ba biziꞌe wzonnaꞌ daa bc̱hiꞌ bsakꞌgakeꞌ leꞌ.
21 Naꞌch to anjl, beṉꞌ wal, bḻiseꞌ to yaj xen inlleb naꞌ bzaḻeen ḻoo nisdoꞌnaꞌ, naꞌ chiꞌe:
―Kanꞌ gak c̱he yell Babilónianaꞌ daa ḻe zeyi c̱heyin, naꞌ bichga llia ileꞌi beṉꞌ ḻen.
22 Bichga yeni beṉꞌ chsillgakeꞌ árpanaꞌ, ni beṉꞌ chkwell no bllej no trompet lawinnaꞌ. Ni bichga soa beṉꞌ wḻan wde wdeli llin, ni bich gak sshag c̱he yaj molinnaꞌ.
23 Bich bi beeniꞌ c̱he yiꞌ kandil gatꞌ lawinnaꞌ, ni bich bi lṉi c̱he wishagnaꞌ gatꞌ lawinnaꞌ. Ḻaꞌ beṉꞌkaꞌ betꞌ bde bi de c̱heyin lawinnaꞌ gokgakeꞌ beṉꞌ choo beṉꞌ xen yell-lioni, naꞌ beṉꞌ Babilóniakaꞌ wxiyeꞌlengakeꞌ yeḻꞌ willaꞌ c̱heꞌkaꞌ yogꞌ beṉꞌ lleꞌ yell-lioni.
24 Naꞌ lawinnaꞌ betgakeꞌ beṉꞌkaꞌ wdix̱jee daa goll Chiozaꞌ ḻegakeꞌ len beṉꞌkaꞌ nak lallꞌ nee, naꞌ ndobgakileꞌ yeḻꞌ wit c̱he yogꞌ beṉꞌ ba betgakeꞌ doxen lo yell-lioni.