Nool wdanaꞌ beenaꞌ llia kollꞌ bayix̱ꞌ xṉanaꞌ
17
To anjlaꞌ, beenaꞌ len beṉꞌkaꞌ gall, beṉꞌkaꞌ nox̱ꞌgakeꞌ kopkaꞌ, bideꞌ ganaꞌ ziaꞌ naꞌ wneꞌ nadꞌ:
―Da, wliidꞌ liꞌ yeḻꞌ zakꞌziꞌnaꞌ ileꞌi noolə wdanaꞌ, beenaꞌ zaklebi yellaꞌ ḻe zeyi c̱heyin daa llia ganaꞌ chde yao zan.
2 Beṉꞌ wṉabiaꞌkaꞌ lleꞌ yell-lionaꞌ ba benlengakeꞌneꞌ txen lo yeḻꞌ wdanaꞌ, naꞌ beṉꞌkaꞌ lleꞌ yell-lionaꞌ ba lenzgakeꞌ nak ka beṉꞌ chzoll chniti daa chongakeꞌ dii malkaꞌ choneꞌ.
3 Naꞌ anjlaꞌ bc̱hiꞌe nadꞌ latjaꞌ ganaꞌ bibi chashj chḻeb naꞌ Espíritu c̱he Chiozaꞌ beneꞌ ka bleꞌdoꞌidꞌ to noolə llieꞌ kollꞌ to bayix̱ꞌ xṉa, naꞌ doxem daꞌ dillꞌ daa chṉe zban c̱he Chiozaꞌ, naꞌ llia gall yic̱hjb naꞌ zi shi ḻozb.
4 Naꞌ noolaꞌ nakweꞌ to lechꞌ de morad naꞌ dii xṉaliḻ, naꞌ ḻe nonilenꞌ nc̱hineꞌ or, yaj wan naꞌ perla. Naꞌ nox̱ee to kop de or daa nak tollaꞌ dii zbankaꞌ naꞌ yeḻꞌ wdanaꞌ choneꞌ.
5 Naꞌ loxgueꞌnaꞌ daꞌ to lieꞌ daa kono wyajnii bin zejin, naꞌ nan: “Babilónianaꞌ, yellaꞌ ḻe zeyi c̱heyin, x̱axṉaꞌ yeḻꞌ wdanaꞌ naꞌ yogꞌḻoḻ dii zban daa chak doxen lo yell-lioni.”
6 Naꞌ gokbeꞌidꞌ wzolli noolaꞌ daa weejeꞌ xc̱hen beṉꞌkaꞌ beteꞌ, beṉꞌkaꞌ benḻilallꞌ Chiozaꞌ naꞌ beṉꞌkaꞌ beꞌ choꞌa xtillꞌ Jesúzaꞌ.
7 Naꞌ anjlaꞌ wneꞌ nadꞌ:
―¿Bic̱he chibanziloꞌ? Naꞌ iṉiaꞌ liꞌ bi zeji daa bleꞌiloꞌ noolaꞌ naꞌ bayix̱aa, banaꞌ llieꞌ, banaꞌ llia gall yic̱hjin naꞌ zi shi ḻozb.
8 Bayix̱ꞌ xṉanaꞌ bleꞌiloꞌ, ḻeban wzoa kaniꞌyi, naꞌ bich zoab ṉaa. Naꞌ wiyedb sto shii ichejb ḻoo yechaꞌ daa bi chiyoll chido nak zitj kwenc̱he kwiayiꞌb toshiizi. Naꞌ beṉꞌkaꞌ lleꞌ lo yell-lioni, beṉꞌkaꞌ bi daꞌ lieꞌkaꞌ ḻee libraꞌ ganaꞌ daꞌ le beṉꞌkaꞌ de yeḻꞌ mban c̱hegakeꞌ zejḻi kaṉi kanaꞌ zi x̱e silte yell-lioni, yibangakileꞌ ileꞌgakileꞌ bayix̱aa, banaꞌ wzoa kanaꞌ, naꞌ bich zoab ṉaa, per wibam sto shii.
9 ’Nin chyalljicho yeḻꞌ sinꞌnaꞌ naꞌ yeḻꞌ chajniinaꞌ. Yic̱hjbkaꞌ gall, zaklebin gall yaakaꞌ ganaꞌ llia noolaꞌ,
10 naꞌ ḻekzkaꞌ nakgakan gall beṉꞌkaꞌ chṉabiaꞌ. Gayꞌgakeꞌ bich chṉabiaꞌgakeꞌ, toeꞌ chṉabiꞌe ṉaa, naꞌ beenaꞌ sto ziꞌ solo iṉabiꞌe. Naꞌ katꞌ solo iṉabiꞌe, xtitzan iṉabiꞌe.
11 Naꞌ bayix̱aa, banaꞌ wzoa kaniꞌyi naꞌ bich zoab ṉaa, ḻebanꞌ beṉꞌ wṉabiaꞌ de wxoniꞌnaꞌ. Naꞌ leneꞌ beṉꞌkaꞌ gall, naꞌ ba nakten kwiayiꞌtekzeꞌ.
12 ’Naꞌ ḻozbkaꞌ shi, diikaꞌ ba bleꞌiloꞌ, zaklebigakan shi beṉꞌkaꞌ ziꞌ solo iṉabiaꞌ, per shlollzan iṉabiaꞌlengakeꞌ bayix̱aa.
13 Naꞌ beṉꞌ wṉabiaꞌki shi gakgakeꞌ toz, naꞌ weꞌgakeꞌ bayix̱aa yeḻꞌ wṉabiaꞌ c̱heꞌkaꞌ.
14 Naꞌ tiḻ-lengakeꞌ Jesucrístonaꞌ, Beenaꞌ Zaklebi to Xilꞌdoꞌ, naꞌ Jesucrístonaꞌ goneꞌ ḻegakeꞌ gan, ḻaꞌ ḻenꞌ Beenaꞌ zeelo nak X̱an yogꞌḻoḻ beṉꞌ, naꞌ Beenaꞌ ḻiizelozi chṉabiaꞌ lao yogꞌḻoḻ beṉꞌ. Naꞌ beṉꞌkaꞌ zejlen ḻeꞌ txen nakgakeꞌ beṉꞌ wlej Chiozaꞌ naꞌ zoac̱hec̱hgakeꞌ nonḻilallꞌgakeꞌneꞌ do yic̱hj do lallgakeꞌ.
15 Naꞌ ḻekzkaꞌ wna anjlaꞌ nadꞌ:
―Yaokaꞌ bleꞌiloꞌ ganaꞌ llia noolə wdanaꞌ, zejin beṉꞌ zan inlleb, beṉꞌ zaꞌ yogꞌ yell naꞌ yogꞌ nación, naꞌ beṉꞌ chṉe wde wdeli dillꞌ.
16 Naꞌ bayix̱aa naꞌ beṉꞌ wṉabiaꞌkaꞌ zaklebi ḻozbaꞌ shi gakzbangakileꞌ nool wdanaꞌ. Naꞌ gakgakeꞌ txen c̱hooṉlallꞌgakeꞌneꞌ gaḻꞌyid gaḻꞌbelee naꞌ gaogakeꞌ xpeleenaꞌ, naꞌ leyi wzeygakeꞌneꞌ lo yiꞌnaꞌ.
17 Chiozaꞌ ba bzoeꞌ ḻoo yic̱hjlallꞌdoꞌekaꞌ daa cheenileꞌ gongakeꞌ, naꞌ gakgakeꞌ toz weꞌgakeꞌ yeḻꞌ wṉabiaꞌ c̱heꞌkaꞌ bayix̱aa naꞌ yiyoll yido gak daa wna Chiozaꞌ gak.
18 Naꞌ noolaꞌ ba bleꞌiloꞌ, ḻenꞌ zaklebi yell daa ḻe zeyi c̱heyin, yellaꞌ chṉabiaꞌ lao yogꞌḻoḻ beṉꞌ chṉabiaꞌ yell-lioni.