Yeḻꞌ zakꞌziꞌkaꞌ gall daa yoll ḻoo kopkaꞌ
16
Naꞌ benidꞌ wṉe to beṉꞌ zillj inlleb ḻoo yoodoꞌnaꞌ, chiꞌe anjlkaꞌ gall:
―Ḻi shaj naꞌ ḻi lljalatj lo yell-lionaꞌ yeḻꞌ zakꞌziꞌ c̱he Chiozaꞌ diikaꞌ yoll ḻoo kopkaꞌ gall.
2 Naꞌ wyaj anjl nechaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ lo yell-lionaꞌ naꞌ yogꞌḻoḻ beṉꞌkaꞌ yoo seṉ c̱he bayix̱aa naꞌ beꞌlaꞌogakeꞌ lwaa lsakꞌbaꞌ byaljgakeꞌ weꞌ dii wyoll guullꞌ naꞌ wyey wlagakeꞌ.
3 Naꞌ anjl, beṉꞌ wchopinaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ lo nisdoꞌnaꞌ, naꞌ nisdoꞌnaꞌ biyakan ka xc̱hen beṉꞌ witi yesya, naꞌ wit yogꞌḻoḻ dii de yeḻꞌ mban c̱heyin ḻoo nisdoꞌnaꞌ.
4 Naꞌ anjl, beṉꞌ wyoṉinaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ ḻoo yaokaꞌ naꞌ yogꞌ ga chal nis, naꞌ biyakgakan chen.
5 Naꞌ benidꞌ wṉe anjlaꞌ blalj yeḻꞌ zakꞌziꞌnaꞌ lo nisaꞌ, wneꞌ:
―Chios, linꞌ nakoꞌ dowalj beṉꞌ ḻi beṉꞌ shaoꞌ. Linꞌ zoꞌ ṉaa, naꞌ liꞌkzan zoꞌ ka wxe wzil yell-lioni. Linꞌ chonoꞌ daa nak shḻicha daa ba bc̱hogloꞌ c̱he beṉꞌki kon ka chiyaḻꞌ gak.
6 Ḻaꞌ ḻegakeꞌ blaljgakeꞌ xc̱hen beṉꞌkaꞌ nak lallꞌ noꞌ naꞌ beṉꞌkaꞌ wdix̱jee daa golloꞌ ḻegakeꞌ, naꞌ ba beꞌgakoꞌneꞌ chennaꞌ yeejgakeꞌ, ka chidoḻꞌkzə gak c̱hegakeꞌn.
7 Naꞌ ḻekzkaꞌ benidꞌ wna beenaꞌ ze kwit daa nak ka ganaꞌ chzeygakeꞌ diikaꞌ chjwaꞌgakeꞌ lao Chiozaꞌ, neꞌ:
―Kanꞌ nakan Chios, beṉꞌ nak X̱anntoꞌ, beṉꞌ yeḻꞌ wak choo yeḻꞌ wak xen, liꞌ ba benoꞌ yeḻꞌ josc̱his kon ka chiyaḻꞌ gakan.
8 Naꞌ anjl, beṉꞌ wdapinaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ lo wbilldoꞌnaꞌ, naꞌ bzeyan beṉꞌ yell-lionaꞌ.
9 Naꞌ yogꞌḻoḻgakeꞌ wyeygakeꞌ nall inlleb. Per bi biyaj bilengakileꞌ lao Chiozaꞌ, ni bi beꞌlaꞌogakeꞌneꞌ, san wṉelgakeꞌ zban c̱heꞌ daa biꞌe latj chak yeḻꞌ zakꞌziꞌkaꞌ.
10 Naꞌ anjl, beṉꞌ gayiꞌnaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ ganaꞌ llia bayix̱aa chṉabiaꞌb, banaꞌ bchej ḻoo nisdoꞌnaꞌ, naꞌ gok shgasj shc̱hoḻ doxen ganaꞌ chṉabiaꞌb. Naꞌ beṉꞌ yell-liokaꞌ non ḻeb txen wdaoyaa ḻolleekaꞌ daa ḻe wyey wlagakeꞌ.
11 Naꞌ wṉelgakeꞌ zban c̱he Chiozaꞌ, beenaꞌ zoa yabanaꞌ, daa chey chlagakeꞌ ni c̱he weꞌkaꞌ lliagakeꞌ, naꞌ bi biyaj bilengakileꞌ dii malaꞌ chongakeꞌ.
12 Naꞌ anjl, beṉꞌ wxopinaꞌ, jalatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ ḻoo yao xennaꞌ le Éufrates, naꞌ biyeej yao xennaꞌ kwenc̱he gok wde beṉꞌ wṉabiaꞌkaꞌ zaꞌ ganaꞌ chlaꞌlə wbillaꞌ.
13 Naꞌ bleꞌidꞌ shoṉ dii x̱iwꞌ dii nak ka bḻoll. Ton bchej ḻoo choꞌa bayix̱ꞌ xṉanaꞌ, naꞌ ston bchej lo choꞌa bayix̱aa banaꞌ beꞌlaꞌo beṉꞌ yell-lionaꞌ, naꞌ ston bchej ḻoo choꞌa banaꞌ chziyeꞌ beṉꞌ, choꞌeb dillꞌ daa cheꞌ bayix̱aa sto ḻeb.
14 Naꞌ dii x̱iwꞌki chongakan yeḻꞌ wak. Naꞌ bchejgakan jatopgakan beṉꞌ wṉabiaꞌkaꞌ lleꞌ doxen yell-lioni kwenc̱he yiyakgakeꞌ toz tiḻ-lengakeꞌ Chiozaꞌ, beenaꞌ zeelo nap yeḻꞌ wak choo yeḻꞌ wak xen, katꞌ illin lla choo lla xen c̱heꞌnaꞌ.
15 “Ḻi se wṉeyi, nadꞌ zizaa tokonganzi, ka chon to beṉꞌ wban aga no chsiꞌnileꞌ katꞌ chjḻaneꞌ. Chakomba beenaꞌ ze wṉeyi naꞌ nakw xeꞌnaꞌ kwenc̱he bi te gaḻꞌyid gaḻꞌbelꞌzeꞌ naꞌ siꞌe yeḻꞌ ztoꞌ.”
16 Naꞌ dii x̱iwꞌkaꞌ btopgakan beṉꞌ wṉabiaꞌkaꞌ latjaꞌ le Armagedón de dillꞌ hebreo.
17 Naꞌ anjl, beṉꞌ gállinaꞌ, blatjeꞌ yeḻꞌ zakꞌziꞌ daa yoll ḻoo kop c̱heꞌnaꞌ lo llazə. Naꞌ ḻoo yoodoꞌnaꞌ zoa yabanaꞌ, ganaꞌ llia Chiozaꞌ chṉabiꞌe, wṉieꞌ zillj, wneꞌ:
―Ba gok daa chiyaḻꞌ gak.
18 Naꞌch wyep yes, naꞌ gok sshag, naꞌ goshj wtin, naꞌ bṉib yell-lionaꞌ ni c̱he to bedxoꞌ xen inlleb dii nakch zibiaꞌ ka yogꞌ bedxoꞌkaꞌ ba gok shlak wzoa beṉꞌ lo yell-lioni.
19 Naꞌ yell daa ḻe zeyi c̱heyin gokan shoṉ ḻaalə, naꞌ yellkaꞌ lleꞌ yell-lioni wlliayiꞌgakan. Naꞌ ngoo yic̱hj Chiozaꞌ wsakꞌziꞌe Babilónianaꞌ, yellaꞌ ḻe zeyi c̱heyin, kwenc̱he beṉꞌkaꞌ lleꞌ naꞌ yen ileꞌgakileꞌ yeḻꞌ zakꞌziꞌ xen c̱heꞌnaꞌ daa ḻe bshaagakeꞌ ḻeꞌ.
20 Naꞌ yogꞌ yell-liodoꞌkaꞌ llia lo nisdoꞌnaꞌ naꞌ no yaakaꞌ binitlogakan.
21 Naꞌ xan yabanaꞌ bxop yaj yaba dii yeḻ inlleb naꞌ ziigakan wdeli c̱hoa kil. Naꞌ beṉꞌ yell-liokaꞌ wṉelgakeꞌ zban c̱he Chiozaꞌ ni c̱he yaj yabanaꞌ daa gokan to yeḻꞌ zakꞌziꞌ xen inlleb.