Anjlkaꞌ gall
15
Naꞌ bleꞌidꞌ yabanaꞌ sto dii wal, dii chonan ka yibanicho. Bleꞌidꞌ gall anjl, beṉꞌkaꞌ nak lallꞌ naꞌgakeꞌ wisgakeꞌ zi gall yeḻꞌ zakꞌziꞌkaꞌ gatꞌ lo yell-lioni kwenc̱he yiyoll yido yeḻꞌ chllaa c̱he Chiozaꞌ.
2 Naꞌ ḻekzkaꞌ bleꞌidꞌ daa nak ka nisdoꞌ de vidr nc̱hix̱an yiꞌ. Naꞌ bleꞌidꞌ beṉꞌkaꞌ bizo bizaki bi beꞌlaꞌogakeꞌ bayix̱aa naꞌ lwaa lsakꞌbaꞌ naꞌ bi beꞌgakeꞌ latj shoꞌgakeꞌ seṉ c̱hebaꞌ, zegakeꞌ choꞌa nisdoꞌ de vidraꞌ naꞌ nox̱ꞌgakeꞌ twej arpa daa beꞌ Chiozaꞌ ḻegakeꞌ.
3 Naꞌ choḻgakeꞌ to dii beḻ dii Moisézaꞌ, beenaꞌ ben ka cheeni Chiozaꞌ, naꞌ daa beḻ Jesucrístonaꞌ, Beenaꞌ Zaklebi to Xilꞌdoꞌ, nagakeꞌ:
Ḻe nak diikaꞌ chonoꞌ naꞌ chongakan ka chibanintoꞌ,
Chios, beṉꞌ nak X̱anntoꞌ, beṉꞌ yeḻꞌ wak choo yeḻꞌ wak xen.
Yogꞌ diikaꞌ chonoꞌ, chonoꞌn ka chiyaḻꞌ,
liꞌ nakoꞌ beṉꞌ wṉabiaꞌ c̱he yogꞌ beṉꞌ yell-lio.
4 Biga zoa beṉꞌ bi gall illebeꞌ liꞌ, X̱anꞌ.
Biga zoa beṉꞌ bi kweꞌ liꞌ balaaṉ.
Ḻaꞌ tozoꞌ linꞌ nakoꞌ dowalj beṉꞌ ḻi beṉꞌ shaoꞌ.
Naꞌ beṉꞌkaꞌ lleꞌ doxen yell-lioni yidgakeꞌ weꞌlaꞌogakeꞌ liꞌ,
daa bleꞌgakileꞌ diikaꞌ chonoꞌ nakan shḻicha.
5 Naꞌ ka biyoll dga, bizleꞌidꞌ byalj yoodoꞌ c̱he Chiozaꞌ yabanaꞌ, latj ganaꞌ yooshaoꞌ ley c̱he Chiozaꞌ daa bzejeꞌ ḻee yaj taakaꞌ.
6 Naꞌ ḻoo yoodoꞌnaꞌ bchej gall anjl, beṉꞌkaꞌ nak lallꞌ naꞌgakeꞌ wisgakeꞌ gall yeḻꞌ zakꞌziꞌkaꞌ gatꞌ lo yell-lionaꞌ. Nakwgakeꞌ twej lechꞌ xtil dii chey cheeniꞌ naꞌ ngoo ḻiꞌekaꞌ twej badꞌ de or bllinten ka de choꞌalc̱hoꞌekaꞌte.
7 Naꞌ to beṉꞌkaꞌ tap, beṉꞌkaꞌ zoa x̱ilinnaꞌ, biꞌe to to anjlkaꞌ twej kop de or nakgakan tollaꞌ yeḻꞌ zakꞌziꞌ c̱he Chiozaꞌ, beenaꞌ zoa zejḻi kaṉi.
8 Naꞌ ḻoo yoodoꞌnaꞌ gokan tollaꞌ llennaꞌ ni c̱heyi balaaṉ xen c̱he Chiozaꞌ naꞌ yeḻꞌ wak choo yeḻꞌ wak xen c̱heꞌnaꞌ. Naꞌ kono gok yiyoo ḻoo yoodoꞌnaꞌ ax̱t ki biyoll bido gallte yeḻꞌ zakꞌziꞌkaꞌ daa nak lo naꞌ anjlkaꞌ gall.