Daa beḻ beṉꞌkaꞌ to guiyoa tapiyona mil
14
Naꞌ bleꞌidꞌ Jesucrístonaꞌ, Beenaꞌ Zaklebi to Xilꞌdoꞌ, zieꞌ lo yaanaꞌ le yaa Sión. Naꞌ leneꞌ to guiyoa tapiyona mil beṉꞌ, naꞌ daꞌ loxgueꞌkaꞌ le Jesucrístonaꞌ, Beenaꞌ Zaklebi to Xilꞌdoꞌ, naꞌ le X̱eꞌnaꞌ.
2 Naꞌch benidꞌ to sshag wal zaꞌn yabanaꞌ, naꞌ sshagaꞌ nenan ka nen yao xennaꞌ daa chxop choꞌa bnaṉjaꞌ naꞌ ka nen katꞌ chashj chtin. Daa benidꞌ, nenan ka shii dii zan arpa dii chsillgakeꞌ.
3 Naꞌ choḻgakeꞌ to dii kob lao beenaꞌ llia chṉabiꞌa naꞌ lao beṉꞌkaꞌ tap zoa x̱ilin, naꞌ lao beṉꞌkaꞌ tapichoa. Naꞌ koch no beṉꞌ yoblə gok goḻ daa choḻgakeꞌ, san toz beṉꞌkaꞌ nak to guiyoa tapiyona mil, beṉꞌkaꞌ bisla Chiozaꞌ ladj beṉꞌkaꞌ lleꞌ yell-lioni.
4 Beṉꞌkin wdapshii kwingakeꞌ naꞌ bi bdiꞌgakeꞌ nool, naꞌ nogakeꞌ Jesucrístonaꞌ, Beenaꞌ Zaklebi to Xilꞌdoꞌ, gattezə zejeꞌ. Naꞌ bisla Chiozaꞌ ḻegakeꞌ ladj beṉꞌ yell-liokaꞌ kwenc̱he gakgakeꞌ lo nee naꞌ lo naꞌ Jesucrístonaꞌ. Naꞌ zaklebgakileꞌ ka to dii nech dii chiziꞌ chilap beṉꞌ choꞌen Chiozaꞌ.
5 Naꞌ biga bchej dillꞌ wxiyeꞌ choꞌekaꞌ, naꞌ ni to bibi ndaꞌ nchengakeꞌ lao Chiozaꞌ.
Dillꞌ daa beꞌ anjlkaꞌ shoṉ
6 Naꞌ bleꞌidꞌ sto anjl chzoeꞌ xan yabanaꞌ, naꞌ chyix̱jiꞌe dillꞌ wen dii kob c̱he Chiozaꞌ daa bi te c̱heyin lao beṉꞌkaꞌ lleꞌ yell-lioni, beṉꞌkaꞌ lleꞌ yogꞌ naciónkaꞌ, yogꞌ yell, beṉꞌkaꞌ zaꞌ yogꞌ dia, naꞌ beṉꞌkaꞌ chneꞌ wde wdeli dillꞌ.
7 Naꞌ wṉieꞌ zillj inlleb, chiꞌe:
―Ḻi illeb Chiozaꞌ naꞌ ḻi kwee balaaṉ, ḻaꞌ ba bllin lla goneꞌ yeḻꞌ josc̱his c̱he to to beṉꞌ. Ḻi weꞌlaꞌo beenaꞌ ben yabanaꞌ len yell-lionaꞌ, naꞌ nisdoꞌnaꞌ, naꞌ ganaꞌ chal niskaꞌ.
8 Naꞌ no sto anjl ḻeꞌ, naꞌ neꞌ:
―Ba wlliayiꞌ Babilónianaꞌ, yellaꞌ ḻe wzeyi c̱heyi, yellaꞌ ganaꞌ wlleꞌ beṉꞌkaꞌ zaklebi noolaꞌ chsolli beṉꞌ kwenc̱he gonlen ljwellgakeꞌ bittez dii zbankaꞌ cheeni beli chen c̱heꞌkaꞌ, daa wlooyeḻꞌgakeꞌ beṉꞌkaꞌ lleꞌ yogꞌ naciónkaꞌ kwenc̱he gongakeꞌ dii malkaꞌ bengakeꞌ.
9 Naꞌ jano sto anjl ḻegakeꞌ, beṉꞌ wyoṉi, naꞌ wṉieꞌ zillj inlleb, wneꞌ:
―Nottezə beṉꞌ weꞌlaꞌo bayix̱aa naꞌ lwaa lsakꞌbaꞌ, naꞌ wiꞌe latj shoꞌ seṉ c̱hebaꞌ loxgueꞌnaꞌ wa neenaꞌ,
10 yen ileꞌileꞌ do ka nak yeḻꞌ chllaa c̱he Chiozaꞌ. Naꞌ sakꞌziꞌe lo yiꞌ gabiḻaꞌ daa nak ka yinaꞌ nc̱hix̱ azúfrenaꞌ chwiate beṉꞌkaꞌ nak anjl c̱he Chiozaꞌ naꞌ Jesucrístonaꞌ, Beenaꞌ Zaklebi to Xilꞌdoꞌ.
11 Naꞌ llen c̱he yiꞌnaꞌ ganaꞌ sakꞌziꞌgakeꞌ c̱hasan zejḻi kaṉi. Naꞌ beṉꞌkaꞌ choeꞌlaꞌo bayix̱aa naꞌ lwaa lsakꞌbaꞌ naꞌ beṉꞌkaꞌ weꞌgakeꞌ latj shoꞌgakeꞌ seṉ c̱hebaꞌ, bibi yeḻꞌ wixiꞌlallꞌ gatꞌ c̱hegakeꞌ ka tella ka waḻ.
12 Naꞌ daa gak kaꞌ, beṉꞌkaꞌ nak lallꞌ naꞌ Chiozaꞌ naꞌ chzoagakeꞌ xtilleenaꞌ, naꞌ zoatezi zoagakeꞌ chonḻilallꞌgakeꞌ Jesúzaꞌ, chiyaḻꞌ so sakgakileꞌ daa yen ileꞌgakileꞌ.
13 Naꞌ benidꞌ wṉe to beṉꞌ yabanaꞌ, naꞌ wneꞌ nadꞌ:
―Bzej dga: “Chakomba beṉꞌkaꞌ nak X̱ancho Jesucrístonaꞌ txen, beṉꞌkaꞌ guet ṉaa naꞌ beṉꞌkaꞌ ziꞌ guet ni c̱heꞌ.” Kanꞌ nakan, ―na Espíritu c̱he Chiozaꞌ―, ḻegakenꞌ yiziꞌlallꞌgakeꞌ c̱he yogꞌ dii ben bleꞌgakileꞌ, naꞌ yogꞌ dii wenkaꞌ bengakeꞌ bi gaḻ-lallii Chiozanꞌ.
Chiozaꞌ yitopeꞌ beṉꞌ yell-lionaꞌ ka beṉꞌ chiziꞌ chilap
14 Naꞌ bwiaꞌ naꞌ bleꞌidꞌ to bej llyish, naꞌ lo bejaꞌ chiꞌ to beṉꞌ nakeꞌ ka beṉec̱h. Naꞌ nzoa to corona de or yic̱hjeꞌnaꞌ naꞌ nox̱ee to garbat dii nḻatit.
15 Naꞌ bchej sto anjl ḻoo yoodoꞌ c̱he Chiozaꞌ, naꞌ chosyee zillj inlleb chiꞌe beenaꞌ chiꞌ lo bejaꞌ:
―Bc̱hin garbataꞌ daa nox̱oo naꞌ biziꞌ bilap, ḻaꞌ ba goḻꞌ yiziꞌ yilapoꞌ daa de yell-lionaꞌ.
16 Naꞌ beenaꞌ chiꞌ lo bejaꞌ biziꞌ bilapeꞌ daa de lo yell-lioni.
17 Naꞌch bchej sto anjl ḻoo yoodoꞌ c̱he Chiozaꞌ zoa yabanaꞌ, ḻekzkaꞌ nox̱ee sto garbat dii nḻatit.
18 Naꞌ bchej sto anjl ganaꞌ zoa daa nak ka mes de or ganaꞌ chzeygakeꞌ yalaꞌ, naꞌ nak lo nee yiꞌnaꞌ. Naꞌ wṉieꞌ zillj beenaꞌ nox̱ꞌ garbataꞌ daa nḻatit, chiꞌeneꞌ:
―Bic̱hogui garbataꞌ nox̱oo uvanaꞌ de yell-lionaꞌ, ḻaꞌ ba wegakan.
19 Naꞌ anjlaꞌ bic̱hoguileꞌ garbataꞌ uvakaꞌ de lo yell-lionaꞌ naꞌ biziꞌ bilapeꞌn, naꞌ blleen ganaꞌ chsigakeꞌn. Naꞌ zejin Chiozaꞌ bitopeꞌ beṉꞌ yell-liokaꞌ bi nakgakeꞌneꞌ txen, naꞌ wloꞌe ḻegakeꞌ ganaꞌ sakꞌziꞌgakeꞌ, ganaꞌ yen ileꞌgakileꞌ yeḻꞌ chllaa c̱heꞌnaꞌ.
20 Naꞌ beṉꞌkaꞌ zaklebi uvakaꞌ, wzakꞌziꞌgakeꞌ choꞌa yellaꞌ. Naꞌ ganaꞌ bllee ḻegakeꞌ wlalj dii zil inlleb xc̱heneꞌkaꞌ naꞌ wyasan ka to ze choꞌa kabayaꞌ naꞌ blliljan shoṉ guiyoa kilómetro.