Bayix̱aa bchej ḻoo nisdoꞌnaꞌ
13
Naꞌ bleꞌidꞌ bchej ḻoo nisdoꞌnaꞌ to bayix̱ꞌ llia gall yic̱hjb naꞌ zi shi ḻozb. Naꞌ to to ḻozbaꞌ zoan twej corona, naꞌ to to yic̱hjbaꞌ llian lebaꞌ daa zeji chon kwim ka Chiozaꞌ.
2 Naꞌ bayix̱aa bleꞌidꞌ, nakb katekzə bell tigra, naꞌ ṉiꞌa nabaꞌ nakan ka ṉiꞌa naꞌ oso, naꞌ choꞌabaꞌ nakan ka c̱he bell lión. Naꞌ bayix̱ꞌ xṉanaꞌ beꞌb ḻeb yeḻꞌ wak naꞌ yeḻꞌ wṉabiaꞌ c̱hebaꞌ kwenc̱he iṉabiaꞌb.
3 To yic̱hj bayix̱aa zoalejan byaljan to weꞌ daa nan guetib, naꞌ weꞌnaꞌ biyakin. Naꞌ yogꞌ beṉꞌ yell-liokaꞌ bibangakileꞌ naꞌ bengakeꞌ bayix̱aa txen.
4 Naꞌ beꞌlaꞌogakeꞌ bayix̱ꞌ xṉanaꞌ, daa beꞌ yeḻꞌ wṉabiaꞌ c̱hebaꞌ bayix̱aa nak ka bell tigr, naꞌ ḻekzkaꞌ beꞌlaꞌogakeꞌ bell tigraꞌ, nagakeꞌ:
―Kono zoa sto ka bayix̱ii, naꞌ kono so saki tiḻ-lem.
5 Naꞌ kono bsej bllon beꞌb dillꞌ chaꞌsibə naꞌ wṉeb zban c̱he Chiozaꞌ, naꞌ wṉabiaꞌb c̱hopiyon beoꞌ.
6 Wṉeb zban c̱he Chiozaꞌ, naꞌ biz ben wnab c̱heꞌ, naꞌ c̱he yabanaꞌ ganaꞌ zoeꞌ, naꞌ c̱he beṉꞌkaꞌ zoa yabanaꞌ.
7 Naꞌ gok lo naꞌb til-ḻem beṉꞌkaꞌ nak lallꞌ naꞌ Chiozaꞌ, naꞌ bem ḻegakeꞌ gan. Naꞌ ḻekzkaꞌ gok lo naꞌb iṉabiaꞌb lao yogꞌḻoḻ beṉꞌ zaꞌ yogꞌ dia, beṉꞌ lleꞌ yogꞌ yell, beṉꞌ lleꞌ yogꞌ nación, naꞌ beṉꞌ chṉe wde wdeli dillꞌ.
8 Naꞌ yogꞌḻoḻ beṉꞌkaꞌ lleꞌ yell-lioni, beṉꞌkaꞌ bi daꞌ leinnaꞌ ḻee libr c̱he Jesucrístonaꞌ, weꞌlaꞌogakeꞌ bayix̱aa. Ḻaꞌ kanaꞌ wxe wzilte yell-lioni, Jesucrístonaꞌ, Beenaꞌ Zaklebi to Xilꞌdoꞌ daa betgakeꞌneꞌ, bzejeꞌ ḻee libr c̱heꞌnaꞌ le yogꞌ beṉꞌkaꞌ gatꞌ yeḻꞌ mban c̱heyin zejḻi kaṉi.
9 Beenaꞌ cheni dga niaꞌ, chiyaḻꞌ wzenagyeṉeen.
10 Beenaꞌ wc̱heꞌgakeꞌ wsejgakeꞌ, shajshazeꞌ gatee lillyanaꞌ. Naꞌ beenaꞌ ba nakan guetileꞌ yesyanaꞌ, guetshazileꞌn. Naꞌ daan, beṉꞌkaꞌ nak lo naꞌ Chiozaꞌ chiyaḻꞌ soac̱hec̱hgakeꞌ gonḻilallꞌgakeꞌneꞌ.
11 Naꞌtech bleꞌidꞌ sto bayix̱ꞌ bchejb ḻoo yell-lionaꞌ naꞌ llia c̱hop ḻozb dii nak ka c̱he to xilꞌdoꞌ, per chṉeb ka bayix̱ꞌ xṉanaꞌ.
12 Naꞌ wdapb do ka nak yeḻꞌ wṉabiaꞌ c̱he bayix̱ꞌ nechaꞌ, naꞌ ba nechaꞌ beꞌb latj wṉabiaꞌb kwenc̱he bem byen yogꞌ beṉꞌ lleꞌ yell-lioni beꞌlaꞌogakeꞌ ba nechaꞌ, banaꞌ biyaki weꞌ c̱hebaꞌ daa nan guetib.
13 Naꞌ ḻekzkaꞌ banaꞌ bchej ḻoo yell-lionaꞌ bem yeḻꞌ wak xen daa benan ka bibani beṉꞌ, ax̱t bem ka betj yiꞌ xan yabanaꞌ bxopan lo yell-lioni chwiate beṉꞌ yell-liokaꞌ.
14 Naꞌ ni c̱he yeḻꞌ wakki gok lo naꞌb gom ganaꞌ llia ba nechaꞌ, wxiyeꞌb beṉꞌkaꞌ lleꞌ yell-lioni kwenc̱he bzenaggakeꞌ c̱he ba nechaꞌ, naꞌ bem byen bengakeꞌ to lwaa lsakꞌ ba nechaꞌ banaꞌ biyaki weꞌ c̱hebaꞌ daa bsalj yesyanaꞌ.
15 Naꞌ bayix̱ꞌ wchopinaꞌ wdapb yeḻꞌ wak kwenc̱he wloob bishbe daa nak lwaa lsakꞌ bayix̱ꞌ nechaꞌ, kwenc̱he gak iṉen naꞌ gonan ka witgakeꞌ yogꞌ beṉꞌkaꞌ bi weꞌlaꞌo ḻen.
16 Naꞌ ḻekzkaꞌ bem byen yogꞌḻoḻ beṉꞌ shoꞌ nee de shḻinaꞌ wa loxgueꞌnaꞌ to seṉ, ka beṉꞌ zakii ka beṉꞌ bi zakii, ka beṉꞌ wniꞌa ka beṉꞌ yeshꞌ, ka beṉꞌ ndoo lla yel choneꞌ xshin beṉꞌ naꞌ ka beṉꞌ chon xshinkzeꞌ.
17 Naꞌ kono gok witꞌ wde bi dii de c̱heꞌ wa siꞌe bi dii chyalljileꞌ shi bi yoꞌe seṉ c̱he bayix̱aa daa nak leb wa número daa zeji lebaꞌ.
18 Chyalljicho yeḻꞌ sinꞌ kwenc̱he shajniicho dga. Beenaꞌ shajniileꞌn naꞌ yiyiljniꞌe número c̱he bayix̱aa daa nak to número c̱he beṉꞌ. Naꞌ númeronaꞌ nakan x̱op guiyoa guiyon x̱op.