Noolaꞌ naꞌ bayix̱aa nak ba xṉa
12
Naꞌ xan yabanaꞌ bleꞌidꞌ to dii chonan ka yibanicho. Bleꞌidꞌ to nool ndobə beeniꞌ c̱he wbillaꞌ ḻeꞌ, naꞌ zoa beoꞌdoꞌnaꞌ xṉiꞌenaꞌ, naꞌ nzoa to corona yic̱hjeꞌnaꞌ naꞌ llian shlliṉ belj.
2 Naꞌ noaꞌ noolaꞌ to bdoꞌ, naꞌ chosyee daa chllagloeꞌ chaz besaꞌ saneꞌbꞌ.
3 Naꞌch bizleꞌidꞌ xan yabanaꞌ sto dii chon ka yibanicho. Bleꞌidꞌ to bayix̱ꞌ xen inlleb, ba xṉa, naꞌ llia gall yic̱hjb naꞌ zi shi ḻozb, naꞌ twej corona zoa to to yic̱hjbaꞌ.
4 Naꞌ bta xbamaꞌ bshibb zan beljdoꞌkaꞌ llia xan yabanaꞌ, zi latꞌzə ki gokan gashj,a naꞌ bzaḻꞌb ḻegakan lo yell-lioni. Naꞌ wze bayix̱aa lao noolaꞌ beenaꞌ san, kwenc̱he guebb xiiṉeꞌnaꞌ kate galjbꞌ.
5 Naꞌ noolaꞌ wxaneꞌ to biꞌ byodoꞌ, biꞌnaꞌ iṉabiaꞌ doxen zbii zkaaṉ yell-lioni naꞌ gomꞌ byen wzenaggakeꞌ c̱hebꞌ. Naꞌ Chiozaꞌ lii bigoyotieꞌbꞌ ziyajbꞌ ganaꞌ chiꞌe chṉabiꞌe.
6 Naꞌ bxoṉj noolaꞌ zejeꞌ ganaꞌ bibi chashj chḻeb, ganaꞌ ba nonshaoꞌ Chiozaꞌ to latj c̱heꞌ, naꞌ weꞌgakeꞌ dii gaweꞌ to mil c̱hop guiyoa guiyon lla.
7 Naꞌtech gok to wdiḻ yabanaꞌ. Anjl, beenaꞌ le Miguel, naꞌ anjlkaꞌ ngoo lallꞌ nee wdiḻ-lengakeꞌ bayix̱ꞌ xṉanaꞌ. Naꞌ bayix̱ꞌ xṉanaꞌ, daa nak dii x̱iwaa, len anjl c̱heyinkaꞌ wdiḻ-lengakan ḻegakeꞌ,
8 per bi wzogakin gongakan gan. Naꞌ bich bi latj c̱hegakin gotꞌ yabanaꞌ.
9 Naꞌ wlejgakeꞌ bayix̱ꞌ xṉanaꞌ, daa nak beḻ kaniꞌteyi, daa le dii x̱iwꞌ naꞌ Satanás, daa chziyeꞌ doxen yell-lioni. Bzaḻꞌgakeꞌn yell-lioni len anjl c̱heyinkaꞌ.
10 Naꞌ benidꞌ wṉe to beṉꞌ zillj inlleb yabanaꞌ, wneꞌ:
―Ba bllin lla bisla Chios c̱hechonaꞌ beṉꞌ yell-lionaꞌ, ba bliꞌe yeḻꞌ wak choo yeḻꞌ wak xen c̱heꞌnaꞌ naꞌ yeḻꞌ wṉabiaꞌ c̱heꞌnaꞌ, naꞌ yeḻꞌ wṉabiaꞌ c̱he Crístonaꞌ, beenaꞌ wlejeꞌ iṉabiaꞌleneꞌ txen. Ḻaꞌ ba bibejgakeꞌ dii x̱iwaa daa chao xya c̱he beṉꞌkaꞌ nakcho txen, daa chao xya c̱hegakeꞌ lao Chios c̱hechonaꞌ ka tella ka waḻ.
11 Ba bengakeꞌn gan daa chonḻilallꞌgakeꞌ Jesucrístonaꞌ, Beenaꞌ Zaklebi to Xilꞌdoꞌ, beenaꞌ blalj xc̱heneꞌnaꞌ ni c̱hegakeꞌ. Naꞌ bi bllebgakeꞌ beꞌgakeꞌ xtilleenaꞌ, san bzani kwingakeꞌ guetgakeꞌ.
12 ¡Ka leꞌ zoale yabanaꞌ, ḻi yiba yizaki! Per ¡nyeshꞌlaz gak c̱hele, leꞌ lleꞌle yell-lionaꞌ naꞌ lo nisdoꞌnaꞌ! Ḻaꞌ dii x̱iwaa ba betjan ganaꞌ zoale naꞌ chllaa chlokan nall inlleb daa ṉezin bich bi latj xen c̱heyin de.
13 Naꞌ ka gokbeꞌi bayix̱ꞌ xṉanaꞌ ba bzaḻꞌgakeꞌb lo yell-lionaꞌ, naꞌ blagdob noolaꞌ wxan biꞌ byodoꞌnaꞌ.
14 Naꞌ bzoa Chiozaꞌ c̱hop x̱il noolaꞌ, ka x̱il bsia xen, kwenc̱he bxoṉjileꞌ dii x̱iwaa naꞌ lljsoeꞌ ganaꞌ bibi chashj chḻeb, ganaꞌ ba nonshaoꞌ Chiozaꞌ to latj c̱heꞌ, naꞌ weꞌgakeꞌ dii gaweꞌ shoṉ yiz yoo gashjə.
15 Naꞌ dii x̱iwaa, daa nak bayix̱ꞌ xṉanaꞌ, bem ka bchej nis zil ḻoo choꞌabaꞌ gokan to yao kwenc̱he nan waꞌn noolaꞌ.
16 Per yell-lionaꞌ byaljan kwenc̱he goklenan noolaꞌ, naꞌ wdeban yawaꞌ daa bchej ḻoo choꞌabaꞌ.
17 Naꞌ daa gok kaꞌ, bllaa blokchga bayix̱ꞌ xṉanaꞌ noolaꞌ naꞌ wyajb jtiḻ-lem xiiṉ dia c̱heꞌnaꞌ bgaaṉ, beṉꞌkaꞌ chzoa dillꞌ daa nllia Chiozaꞌ biaꞌ gongakeꞌ, beṉꞌkaꞌ zoac̱hec̱h chajḻeꞌgakeꞌ choꞌa xtillꞌ Jesucrístonaꞌ.
18 Naꞌ wze bayix̱ꞌ xṉanaꞌ choꞌa nisdoꞌnaꞌ.