C̱hop beṉꞌ wiꞌe dillꞌ daa cheꞌ Chiozaꞌ ḻegakeꞌ
11
Naꞌ beṉeꞌ nadꞌ to ya dii gak wchix̱idꞌ, naꞌ wneꞌ:
―Wyaj naꞌ jachix̱ kaꞌkꞌ nak yoodoꞌ c̱he Chiozaꞌ naꞌ kaꞌkꞌ nak ganaꞌ chzeygakeꞌ yalaꞌ, naꞌ blab kaꞌkꞌ beṉꞌkaꞌ choeꞌlaꞌo Chiozaꞌ naꞌ.
2 Naꞌ bi wchix̱oꞌ leshꞌ chyoodoꞌnaꞌ, ḻaꞌ ba nakan lallꞌ naꞌ beṉꞌkaꞌ bi nombiaꞌ Chiozaꞌ, beṉꞌkaꞌ wlej wshoshjgakeꞌ yell c̱he Chiozaꞌ c̱hopiyon beoꞌ.
3 Naꞌ wseḻaa c̱hop beṉꞌ wiꞌe choꞌa xtillaanaꞌ, naꞌ gakwgakeꞌ lechꞌ zeshaa, naꞌ to mil c̱hop guiyoa guiyon lla c̱hix̱jeꞌgakeꞌ daa yepgakee.
4 Beṉꞌki c̱hop zaklebgakeꞌ c̱hop yag olívokaꞌ naꞌ c̱hop candelerkaꞌ zoa lao Chiozaꞌ, beenaꞌ nak X̱an yell-lioni.
5 Naꞌ shi no bi goni ḻegakeꞌ, ḻoo choꞌekaꞌ ichej yiꞌ naꞌ wlliayiꞌn beṉꞌkaꞌ chakzbani ḻegakeꞌ. Naꞌ kaꞌ kwiayiꞌ nottezə beṉꞌ gaklallee bi gonileꞌ ḻegakeꞌ.
6 Beṉꞌkaꞌ c̱hop napgakeꞌ yeḻꞌ wak kwenc̱he bi gak yejaꞌ shlak c̱hix̱jeꞌgakeꞌ daa yeꞌ Chiozaꞌ ḻegakeꞌ. Naꞌ ḻekzkaꞌ napgakeꞌ yeḻꞌ wak yiyongakeꞌ nisaꞌ chen, naꞌ gongakeꞌ yiya dii wsakꞌziꞌn beṉꞌ yell-lioki kon kaꞌkꞌto cheengakileꞌ.
7 Naꞌ katꞌ yiyoll c̱hix̱jeꞌgakeꞌ choꞌa xtillꞌ Chiozaꞌ, daa nak ka bayix̱ꞌ zṉia daa ichej ḻoo yechaꞌ daa bi chiyoll chido nak zitj, gox̱aan ḻegakeꞌ naꞌ gonan gan witan ḻegakeꞌ.
8 Naꞌ kwerp c̱heꞌkaꞌ gatꞌgakan yawi nez c̱he yell xennaꞌ ganaꞌ bdaꞌgakeꞌ X̱ancho Jesucrístonaꞌ ḻee yag cruzaꞌ, daa zaklebi Sodómanaꞌ naꞌch Egíptonaꞌ.
9 Naꞌ beṉꞌ wde wdeli yell, naꞌ wde wdeli dia, naꞌ beṉꞌ chṉe wde wdeli dillꞌ, naꞌ beṉꞌ wde wdeli nación wwiagakeꞌ kwerp c̱heꞌkaꞌ shoṉ lla shgobill, naꞌ bi weꞌgakeꞌ latj no wkwashꞌ ḻegakeꞌ.
10 Naꞌ beṉꞌkaꞌ zoa lo yell-lioni yiba yizakgakileꞌ daa ba witgakeꞌ. Naꞌ daa ḻe yiba yizakgakileꞌ weꞌ ljwellgakeꞌ dii chizaꞌlallꞌgakeꞌ, ḻaꞌ beṉꞌkaꞌ wdix̱jee daa goll Chiozaꞌ ḻegakeꞌ chiya dii bengakeꞌ kwenc̱he bsakꞌziꞌgakeꞌ ḻegakeꞌ.
11 Naꞌ ka gok shoṉ lla shgobill, Chiozaꞌ bisbaneꞌ ḻegakeꞌ, naꞌ biyasgakeꞌ sto shii. Naꞌ yogꞌ beṉꞌkaꞌ bleꞌgakileꞌ ḻegakeꞌ ḻe bllebgakeꞌ.
12 Naꞌ beṉꞌki c̱hop bengakileꞌ wṉe to beṉꞌ yabanaꞌ, chiꞌe ḻegakeꞌ:
―Ḻi yiyep nilə.
Naꞌ biyepgakeꞌ yabanaꞌ to lo bej, chwiate beṉꞌkaꞌ gokziꞌ gokzbani ḻegakeꞌ.
13 Naꞌ ka chiyepgakeꞌ gok to bedxoꞌ xen, naꞌ bc̱hiṉjan latꞌa yellaꞌ, naꞌ wit galla mil beṉꞌ. Naꞌ beṉꞌkaꞌ bi wit ḻe bllebgakeꞌ naꞌ beꞌlaꞌogakeꞌ Chiozaꞌ, beenaꞌ llia yabanaꞌ.
14 Naꞌ biyoll yeḻꞌ zakꞌziꞌ de wchopinaꞌ, per lii zaꞌte de wyoṉinaꞌ.
Bkwelleꞌ trompet de gállinaꞌ
15 Naꞌ anjl, beṉꞌ gállinaꞌ, bkwelleꞌ trompet c̱heꞌnaꞌ, naꞌ benidꞌ wṉe beṉꞌ zan zillj inlleb yabanaꞌ, wnagakeꞌ:
Yeḻꞌ wṉabiaꞌnaꞌ de yell-lionaꞌ
ba nakan c̱he X̱ancho Chiozaꞌ len Crístonaꞌ,
beenaꞌ wlejeꞌ kwenc̱he iṉabiꞌe;
naꞌ iṉabiꞌe zejḻi kaṉi.
16 Naꞌ beṉꞌkaꞌ tapichoa, beṉꞌkaꞌ llia lao Chiozaꞌ, bc̱hekꞌ yic̱hjeꞌkaꞌ ax̱t lo yonaꞌ, beꞌlaꞌogakeꞌneꞌ,
17 nagakeꞌ:
Choṉntoꞌ liꞌ yeḻꞌ chox̱ken, Chios,
beṉꞌ ḻiizelozi nap yeḻꞌ wak choo yeḻꞌ wak xen, beṉꞌ nak X̱anntoꞌ.
Liꞌkzan zoꞌ ṉaa, naꞌ liꞌkzan zoꞌ ka wxe wzil yell-lionaꞌ, naꞌ zejḻi kaṉi zoꞌ.
Naꞌ ba wzolo chṉabiaꞌlenoꞌ yeḻꞌ wak choo yeḻꞌ wak xen c̱hoꞌnaꞌ.
18 Beṉꞌkaꞌ lleꞌ yell-lionaꞌ ba bllaa blokgakeꞌ,
naꞌ ba bllin lla wsakꞌziꞌgakoꞌneꞌ.
Naꞌ ṉaa gonoꞌ yeḻꞌ josc̱his c̱he beṉꞌ wetkaꞌ,
naꞌ wiꞌo daa chidoḻꞌ beṉꞌkaꞌ wdix̱jee daa golloꞌ ḻegakeꞌ,
naꞌ beṉꞌkaꞌ nak lallꞌ noꞌ, len beṉꞌkaꞌ chgoo liꞌ balaaṉ,
ka beṉꞌ zakii ka beṉꞌ bi zakii;
naꞌ wlliayoo beṉꞌkaꞌ chlliayiꞌ beṉꞌ yell-lionaꞌ.
19 Naꞌch byalj yoodoꞌnaꞌ zoa yabanaꞌ, naꞌ ḻoo yoodoꞌnaꞌ nḻaꞌ yiiṉaꞌ ganaꞌ lleꞌ yaj taakaꞌ ganaꞌ bzej Chiozaꞌ diikaꞌ bllieꞌ biaꞌ gon beṉꞌ Israelkaꞌ. Naꞌ wyep yes, naꞌ gok sshag, naꞌ goshj wtin, naꞌ gok to bedxoꞌ wal, naꞌ wcheꞌchga yaj yabanaꞌ.