Anjlaꞌ nox̱ee to yish dii ba biyesh
10
Naꞌch bleꞌidꞌ sto anjl, beṉꞌ nap yeḻꞌ wak xen, chetjeꞌ yabanaꞌ zindobeꞌ to bej. Yic̱hjeꞌnaꞌ xoa to betyaa, naꞌ choꞌalaweꞌnaꞌ chep cheeniꞌn ka wbillaꞌ, naꞌ ṉiꞌekaꞌ nakgakan ka beḻ yiꞌ dii chzollaꞌ.
2 Naꞌ nox̱ee to yish dii ba biyesh, naꞌ bzoeꞌ ṉiꞌe de shḻinaꞌ lo nisdoꞌnaꞌ naꞌ de robesaꞌ bzoeꞌn lo yell-lionaꞌ.
3 Naꞌ besyaadieꞌ zillj inlleb ka chosyaa to bell. Naꞌ ka besyee, wṉe wziwaa gall shii.
4 Naꞌ ka biyoll wṉe wziwaa gall shii, naꞌch nan wzejꞌ daa wnagakan. Per benidꞌ wṉe to beṉꞌ yabanaꞌ, naꞌ wneꞌ nadꞌ:
―Bi wzejoꞌ daa wna wziwaa, san wlooshawaan ḻoo yic̱hjlallꞌdoꞌnaꞌ.
5 Naꞌ anjlaꞌ, beenaꞌ bleꞌidꞌ nzoa ṉiꞌenaꞌ tḻaa lo nisdoꞌnaꞌ naꞌ daa zi tḻaa lo yell-lionaꞌ, bḻis nee de shḻinaꞌ yabalə
6 naꞌ bzoeꞌ de tasc̱hiw beenaꞌ zoa zejḻi kaṉi, beenaꞌ bx̱e bsil yabanaꞌ naꞌ yogꞌḻoḻ daa llia xaninnaꞌ, naꞌ yell-lioni naꞌ yogꞌḻoḻ daa de lawinnaꞌ, naꞌ nisdoꞌnaꞌ naꞌ yogꞌḻoḻ daa lleꞌ ḻoꞌinnaꞌ, naꞌ wneꞌ:
―Aga chllach gak daa llia biaꞌ gak.
7 San katꞌ wkwell anjl, beṉꞌ gállinaꞌ, trompet c̱heꞌnaꞌ, naꞌ yiyoll yido gak yogꞌḻoḻ daa bllia Chiozaꞌ biaꞌ gak, kon ka golleꞌ dii beṉꞌkaꞌ wdix̱jee daa wneꞌ kaniꞌyi.
8 Naꞌ sto shii benidꞌ shii beenaꞌ wṉe yabanaꞌ, naꞌ wneꞌ nadꞌ:
―Wyaj kwit anjlaꞌ, beenaꞌ nzoa ṉiꞌenaꞌ lo nisdoꞌnaꞌ naꞌ lo yell-lionaꞌ, naꞌ jaxiꞌ yishaꞌ daa nox̱ee.
9 Naꞌ wyaꞌ kwit anjlaꞌ naꞌ biṉabidee yishaꞌ. Naꞌ wneꞌ nadꞌ:
―Ni den, wdawan. Naꞌ idawilonꞌ zix̱ sia ka shin baseraꞌ, per ḻoo ḻiꞌonaꞌ yiyakan zic̱hj zḻaꞌ.
10 Naꞌ bikaa yishaꞌ lo naꞌ anjlaꞌ naꞌ wdawaꞌn. Naꞌ bdawidaan zix̱ sia ka shin baseraꞌ, per ka bidon wdawꞌ naꞌ biyakan zic̱hj zḻaꞌ ḻoo ḻiꞌanaꞌ.
11 Naꞌ wneꞌ nadꞌ:
―Chonan byen wiꞌo dillꞌ daa na Chiozaꞌ gak c̱he beṉꞌkaꞌ lleꞌ yellkaꞌ, naꞌ naciónkaꞌ, naꞌ beṉꞌ chṉe wde wdeli dillꞌ, naꞌ beṉꞌ wṉabiaꞌkaꞌ.