9
Naꞌ anjl, beṉꞌ gayiꞌnaꞌ, bkwelleꞌ trompet c̱heꞌnaꞌ, naꞌ bleꞌidꞌ to belj dii bxop xan yabanaꞌ jetꞌan lo yell-lionaꞌ. Naꞌ beꞌgakeꞌneꞌ xiiṉya c̱he yechaꞌ daa bi chiyoll chido nak zitj.
2 Naꞌ bsaljeꞌ choꞌa yechaꞌ daa bi chiyoll chido nak zitj naꞌ bchej ḻoꞌinnaꞌ llen ka c̱he to gorn xen. Naꞌ llennaꞌ daa bchej ḻoꞌinnaꞌ bkwashaan wbillaꞌ naꞌ xan yabanaꞌ.
3 Naꞌ ḻoo llennaꞌ bllesh ba zan inlleb bishꞌzo naꞌ blliljgakb doxen lo yell-lioni. Naꞌ beneꞌ kwenc̱he gak gadꞌgakb ka chadꞌ bex̱joniꞌkaꞌ.
4 Naꞌ bi biꞌe latj bi gongakib yix gaꞌnaꞌ daa de yell-lioni, ni tlishꞌ dii nak shiꞌa shgaꞌ, ni tlishꞌ yag, san toz beṉꞌkaꞌ bi daꞌ sey c̱he Chiozaꞌ loxgueꞌkaꞌ bzoaziꞌyaagakb.
5 Naꞌ bi biꞌe latj witgakb ḻegakeꞌ, san to wzoaziꞌyaazgakb ḻegakeꞌ gayꞌ beoꞌ. Naꞌ ganaꞌ godꞌgakb wlan ka chla ganaꞌ chadꞌ bex̱joniꞌnaꞌ.
6 Naꞌ katꞌkaꞌ gak dga, beṉꞌ yell-liokaꞌ gaklallꞌgakeꞌ guetgakeꞌ per bi guetgakeꞌ; naꞌ selallꞌgakeꞌ bich soagakeꞌ per yeḻꞌ witaꞌ wxoṉj wkwashiin ḻegakeꞌ.
7 Naꞌ bishꞌzokaꞌ nakgakb ka kabay ba shaj lo wdiḻ. Naꞌ yic̱hjbkaꞌ zoa twej dii nak ka corona de or, naꞌ choꞌalaobkaꞌ nakan ka choꞌalao beṉꞌ.
8 Naꞌ yishꞌ yic̱hjbkaꞌ nakan ka yishꞌ yic̱hj noolə, naꞌ ḻeybkaꞌ nakan ka ḻey bell.
9 Naꞌ daa nakwgakb nakan de ya naꞌ chkweejan kwerp c̱hebkaꞌ. Naꞌ x̱ilbkaꞌ chongakan sshag inlleb ka ga zaꞌ zan kabay ba ngoyo karret dii zej lo wdiḻaꞌ.
10 Naꞌ lo xbambkaꞌ zoagakan ka ḻew bex̱joniꞌ, naꞌ wc̱hingakban kwenc̱he wzoaziꞌyaagakb beṉꞌ yell-lionaꞌ gayꞌ beoꞌ.
11 Naꞌ anjlaꞌ, beenaꞌ nak lallꞌ nee yech zitjaꞌ, chṉabiꞌe bishꞌzokaꞌ, naꞌ dillꞌ hebrewaꞌ lieꞌ Abadón, naꞌ dillꞌ griegonaꞌ lieꞌ Apolión, naꞌ zejin Williayiꞌ Williade.
12 Naꞌ biyoll yeḻꞌ zakꞌziꞌ nechaꞌ, per ni chyallj zi c̱hopan.
13 Naꞌch anjl, beṉꞌ wxopinaꞌ, bkwell trompet c̱heꞌnaꞌ, naꞌ benidꞌ wṉe to beṉꞌ ganaꞌ zoa daa nak ka mes de or ganaꞌ chzeygakeꞌ yalaꞌ daa llia ka ḻozdoꞌin to to sc̱hin daa zoa lao Chiozaꞌ.
14 Naꞌ golleꞌ anjl, beṉꞌ wxopinaꞌ, beenaꞌ nox̱ꞌ trompetaꞌ:
―Bsell anjlkaꞌ tap, beṉꞌkaꞌ nchej choꞌa yao xennaꞌ le Éufrates.
15 Naꞌ bselleꞌ tapte anjlkaꞌ, beṉꞌkaꞌ nzoeꞌ kwenc̱he witgakeꞌ beṉꞌ, naꞌ zi latꞌzə ki gok gashjəa beṉꞌ yell-lionaꞌ betgakeꞌ. Ḻaꞌ ba nllieꞌ biaꞌ gongakeꞌ kaꞌ ka lo goraꞌ, lo llanaꞌ, lo bewaa, naꞌ lo yizaꞌ.
16 Naꞌ benidꞌ nak c̱hop guiyoa millón soldadkaꞌ lliagakeꞌ kabay.
17 Naꞌ ki nak kabaykaꞌ bleꞌdoꞌidꞌ naꞌ beṉꞌkaꞌ llia kollꞌbkaꞌ: daa nkweej choꞌalc̱hoꞌekaꞌ nakan dii xṉa ka yiꞌnaꞌ, naꞌch de azul ka yaj wan daa le zafiro, naꞌ dii gush ka bishte daa neꞌ azufre. Naꞌ yic̱hj kabaykaꞌ nakgakan ka yic̱hj bell, naꞌ ḻoo choꞌabkaꞌ chchej yiꞌ dii nc̱hix̱ azufre naꞌch llen.
18 Zlatꞌzə ki gok gashjəb beṉꞌ yell-liokaꞌ witgakeꞌ ni c̱he shoṉ yeḻꞌ ziꞌki: yiꞌnaꞌ, llennaꞌ, naꞌch azúfrenaꞌ diikaꞌ bchej choꞌa kabaykaꞌ.
19 Naꞌ kabaykaꞌ, bc̱hingakb choꞌabkaꞌ naꞌ xbambkaꞌ kwenc̱he betgakb beṉꞌ, ḻaꞌ xbambkaꞌ nakgakan ka beḻ, naꞌ yic̱hji daa zoa xbamkaꞌ daa nak ka beḻ bzoaziꞌyaagakan beṉꞌ.
20 Naꞌ beṉꞌkaꞌ bi biya gueti diiki, bi biyaj bilengakileꞌ dii malkaꞌ chongakeꞌ, ni bi wlej yic̱hjgakeꞌ weꞌlaꞌogakeꞌ dii xiwꞌkaꞌ naꞌ diikaꞌ nongakeꞌ de or, de plat, de bronce, naꞌ de yaj naꞌ de yag, diikaꞌ bi chleꞌi ni bi chengakin, ni bi chak saꞌgakan.
21 Ni bi biyaj bilengakileꞌ daa chitgakeꞌ beṉꞌ, daa nḻangakeꞌ yeḻꞌ willaꞌnaꞌ, ni daa chṉelen ljwellgakeꞌ, ni daa chziꞌ chbangakeꞌ.