Bxoxjeꞌ sey de gállinaꞌ
8
Naꞌ ka bxoxj Beenaꞌ Zaklebi to Xilꞌdoꞌ sey de gállinaꞌ, goklli yabanaꞌ ka do gashj gor.
2 Naꞌch bleꞌidꞌ gall anjlkaꞌ zegakeꞌ lao Chiozaꞌ, naꞌ biꞌe ḻegakeꞌ gall trompet.
3 Naꞌtech blaꞌ sto anjl nox̱ee to barser de or, naꞌ jsieꞌ kwit daa nak ka mes de or ganaꞌ chzeygakeꞌ yalaꞌ daa zoa lao beenaꞌ chṉabiaꞌ. Naꞌ biꞌeneꞌ yal zan kwenc̱he wzeyeꞌn lawinnaꞌ, naꞌ gakan toz xtillꞌ beṉꞌkaꞌ nak lallꞌ naꞌ Chiozaꞌ katꞌ choeꞌḻwillgakeꞌneꞌ.
4 Naꞌ llen c̱he yalaꞌ daa yoo ḻoo barseraꞌ nox̱ꞌ anjlaꞌ wyasan zejan lao Chiozaꞌ nakan txen xtillꞌ beṉꞌkaꞌ choeꞌḻwillgakeꞌneꞌ.
5 Naꞌ anjlaꞌ bex̱ee barseraꞌ, wloꞌen yiꞌ gaḻjaꞌ daa chiꞌ ganaꞌ chey yalaꞌ, naꞌ bzaḻeen lo yell-lioni. Naꞌ goshj wtin, naꞌ gok sshag, naꞌ wyep yes, naꞌ wxoꞌ wṉib yell-lioni.
Trompetkaꞌ gall
6 Naꞌ anjlkaꞌ gall, beṉꞌkaꞌ nox̱ꞌ trompetkaꞌ, wze kwasgakeꞌ wkwellꞌgakeꞌn.
7 Naꞌ anjl nechaꞌ bkwelleꞌ trompet c̱heꞌnaꞌ, naꞌ bxop lo yell-lioni yaj yaba naꞌch yiꞌ naꞌ nc̱hix̱gakan chen. Naꞌ schoo yell-lioni wyey, zi latꞌzə ki gokan gashjə,a naꞌ wyeylenan dii zan inlleb yag, naꞌ doxen ganaꞌ de shgaꞌ.
8 Naꞌ anjl wchopinaꞌ bkwell trompet c̱heꞌnaꞌ, naꞌ bxop ḻoo nisdoꞌnaꞌ to dii nak ka to yaa xen dii chaḻꞌṉiṉ. Naꞌ zi latꞌzə ki gok gashjə nisdoꞌnaꞌ biyakan chen.
9 Naꞌ zi latꞌzə ki gok gashjə badoꞌkaꞌ lleꞌ ḻoo nisdoꞌnaꞌ witgakb, naꞌ ḻekzkaꞌ zi latꞌzə ki gok gashjə barkwkaꞌ chda lo nisdoꞌnaꞌ wlliayiꞌ.
10 Naꞌ anjl wyoṉinaꞌ bkwell trompet c̱heꞌnaꞌ naꞌ bxop to belj xen chaḻꞌṉiṉan, naꞌ bxopan ganaꞌ de yaokaꞌ naꞌ ganaꞌ chal niskaꞌ.
11 Naꞌ belj xennaꞌ len Dii Zḻaꞌ. Naꞌ zi latꞌzə ki gok gashjə nisaꞌ gokan zḻaꞌ, naꞌ beṉꞌ zan wit ni c̱he nis zḻaꞌnaꞌ.
12 Naꞌ anjl wdapinaꞌ bkwelleꞌ trompet c̱heꞌnaꞌ, naꞌ zi latꞌzə ki gok gashjə wbillaꞌ naꞌ beoꞌdoꞌnaꞌ naꞌch beljdoꞌkaꞌ wnit beeniꞌ c̱heyinkaꞌ. Naꞌ bich bzeeniꞌgakan zi latꞌzə ki gok shgobill naꞌ gashj yel.
13 Naꞌch ni zej chwiaꞌ naꞌ benidꞌ to bsia chzob gchoḻ xan yabanaꞌ naꞌ wṉeb zillj inlleb, nab:
―¡Nyeshꞌlaz gak c̱he beṉꞌ yell-liokaꞌ katꞌ wkwell anjlkaꞌ tompetkaꞌ zi shoṉ!