Beṉꞌkaꞌ nak to guiyoa tapiyona mil
7
Ka biyoll bleꞌidꞌ diiki, bizleꞌidꞌ tap anjl zechagakeꞌ tap ḻaate yell-lioni, chzagꞌgakeꞌ beꞌnaꞌ zaꞌ tap ḻaate kwenc̱he bibi beꞌ se lo yell-lioni ni lo nisdoꞌnaꞌ naꞌ ni lo yagkaꞌ.
2 Ḻekzkaꞌ bleꞌidꞌ sto anjl zee ganaꞌ chlaꞌlə wbillaꞌ, naꞌ nox̱ee sey c̱he Chios yaa Chios bannaꞌ. Naꞌ besyaa anjli zillj inlleb wṉieꞌ anjlkaꞌ tap, beṉꞌkaꞌ gok lo naꞌgakeꞌ yeḻꞌ wakaꞌ kwenc̱he gak wlliayiꞌgakeꞌ diikaꞌ de lo yell-lionaꞌ naꞌ ḻoo nisdoꞌnaꞌ, naꞌ chiꞌe ḻegakeꞌ:
3 ―Bibi gonile yell-lioni, nisdoꞌnaꞌ, ni yagdoꞌkaꞌ shlak biṉꞌ wdaꞌcho seyaꞌ loxga beṉꞌkaꞌ nonḻilallꞌ Chios c̱hechonaꞌ.
4 Naꞌ benidꞌ kaꞌkꞌ beṉꞌkaꞌ wdaꞌ seyaꞌ loxgueꞌkaꞌ, naꞌ nakgakeꞌ to guiyoa tapiyona mil beṉꞌ, beṉꞌkaꞌ nak shlliṉ kwen dia c̱he dii Israelaꞌ.
5 Shlliṉa mil beṉꞌkaꞌ nak dia c̱he dii Judánaꞌ, shlliṉa mil beṉꞌkaꞌ nak dia c̱he dii Rubénnaꞌ, shlliṉa mil beṉꞌkaꞌ nak dia c̱he dii Gadaꞌ,
6 shlliṉa mil beṉꞌkaꞌ nak dia c̱he dii Aseraꞌ, shlliṉa mil beṉꞌkaꞌ nak dia c̱he dii Neftalínaꞌ, shlliṉa mil beṉꞌkaꞌ nak dia c̱he dii Manasézaꞌ,
7 shlliṉa mil beṉꞌkaꞌ nak dia c̱he dii Simeónnaꞌ, shlliṉa mil beṉꞌkaꞌ nak dia c̱he dii Levínaꞌ, shlliṉa mil beṉꞌkaꞌ nak dia c̱he dii Isacaraꞌ,
8 shlliṉa mil beṉꞌkaꞌ nak dia c̱he dii Zabulónnaꞌ, shlliṉa mil beṉꞌkaꞌ nak dia c̱he dii Josénaꞌ, naꞌ zi shlliṉa mil beṉꞌkaꞌ nak dia c̱he dii Benjamínnaꞌ.
Beṉꞌ be beṉꞌ zil beṉꞌkaꞌ zoa do xtil
9 Ka biyoll dga, naꞌch bwiaꞌ naꞌ bleꞌidꞌ beṉꞌ zan inlleb, beṉꞌ zaꞌ doxen yell-lioni, naꞌ lo wde wdeli dia, naꞌ beṉꞌ chṉe wde wdeli dillꞌ, naꞌ beṉꞌ zaꞌ yogꞌ yell. Zegakeꞌ lao beenaꞌ llia chṉabiaꞌ naꞌ lao Beenaꞌ Zaklebi to Xilꞌdoꞌ, naꞌ kono ibabi ḻegakeꞌ daa nakgakeꞌ beṉꞌ be beṉꞌ zil inlleb. Naꞌ nakwgakeꞌ twej xagakeꞌ dii xtil naꞌ nox̱ꞌgakeꞌ twej zin.
10 Naꞌ yogꞌḻoḻzgakeꞌ chosyaagakeꞌ zillj inlleb, nagakeꞌ:
Chios c̱hechonaꞌ, beenaꞌ llia ganaꞌ chṉabiꞌe,
naꞌ Beenaꞌ Zaklebi to Xilꞌdoꞌ
ba bislagakeꞌ choꞌ.
11 Naꞌ yogꞌḻoḻ anjlkaꞌ nec̱hjgakeꞌ beenaꞌ llia chṉabiaꞌ, naꞌ beṉꞌkaꞌ tapichoa len beṉꞌkaꞌ tap, bc̱hekꞌ xibeꞌkaꞌ laweꞌnaꞌ ax̱t lo yonaꞌ bllin loxgueꞌkaꞌ, naꞌ beꞌlaꞌogakeꞌ Chiozaꞌ,
12 nagakeꞌ:
¡Kanꞌ nakan! Toshiizi weꞌlaꞌocho Chios c̱hechoni, naꞌ koochoneꞌ balaaṉ,
naꞌ weꞌcho dillꞌ ka nak yeḻꞌ sinꞌ c̱heꞌnaꞌ, naꞌ weꞌchoneꞌ yeḻꞌ chox̱ken,
naꞌ weꞌcho dillꞌ nakeꞌ beṉꞌ zakii nlleb, beṉꞌ chṉabiaꞌ doxen, naꞌ beṉꞌ yeḻꞌ wak choo yeḻꞌ wak xen. ¡Kanꞌ nakan!
13 Naꞌ to beenaꞌ len beṉꞌkaꞌ tapichoa wṉabileꞌ nadꞌ:
―¿Nora beṉꞌki nakw lechꞌ xtilaꞌ? ¿Gara zaꞌgakeꞌ, lla?
14 Naꞌ goshee:
―Liꞌkz ṉeziloꞌ daa, beṉꞌdoꞌ.
Naꞌ ḻeꞌ wneꞌ nadꞌ:
Beṉꞌkin ba bichej lo yeḻꞌ zakꞌziꞌ xennaꞌ, naꞌ ba biyib bix̱isi xeꞌkaꞌ xc̱hen Beenaꞌ Zaklebi to Xilꞌdoꞌ, naꞌ daan nakwgakeꞌ lechꞌ xtilaꞌ.
15 Daan, zegakeꞌ lao Chiozaꞌ ganaꞌ zoeꞌ chṉabiꞌe naꞌ ka waḻ ka tella choeꞌlaꞌogakeꞌneꞌ. Naꞌ Chiozaꞌ, beenaꞌ llia chṉabiꞌa soaleneꞌ ḻegakeꞌ naꞌ gap wwieꞌ ḻegakeꞌ.
16 Bich ibiḻ idongakeꞌ, ni bich wzey wbilldoꞌnaꞌ ḻegakeꞌ, ni bich gakgakileꞌ zeyꞌ,
17 ḻaꞌ Beenaꞌ Zaklebi to Xilꞌdoꞌ, beenaꞌ zoa ganaꞌ chiꞌ Chiozaꞌ chṉabiꞌe, gap wwieꞌ ḻegakeꞌ. Naꞌ wc̱hiꞌe ḻegakeꞌ ganaꞌ chal nisaꞌ daa nsaꞌ yeḻꞌ mbannaꞌ. Naꞌ Chiozaꞌ wkwaseꞌ yogꞌḻoḻ daa chkwellyeshaan ḻegakeꞌ.