Bxoxjeꞌ seykaꞌ
6
Naꞌ bleꞌidꞌ Beenaꞌ Zaklebi to Xilꞌdoꞌ bxoxjeꞌ sey nechaꞌ lawi diikaꞌ gall, naꞌ benidꞌ wṉe to beṉꞌkaꞌ tap lleꞌ naꞌ, naꞌ shiꞌenaꞌ nenan ka ga chashj chtin. Naꞌ wneꞌ nadꞌ:
―Nilə da, naꞌ bwia dga.
2 Naꞌ bleꞌidꞌ to kabay llyish, naꞌ beenaꞌ llia kollꞌbaꞌ nox̱ee to xis wix̱itꞌ. Naꞌ bzoagakeꞌ to corona yic̱hjeꞌnaꞌ, naꞌ bchejeꞌ ḻega beṉꞌ ben gan lo wdiḻ naꞌ zejeꞌ sto shii lljeneꞌ gan.
3 Naꞌ ka bxoxj Beenaꞌ Zaklebi to Xilꞌdoꞌ sey de wchopinaꞌ, benidꞌ wna beṉꞌ wchopinaꞌ, beenaꞌ len ladj beṉꞌkaꞌ tap:
―Nilə da, naꞌ bwia dga.
4 Naꞌ bleꞌidꞌ bchej sto kabay, ba xṉa. Naꞌ beenaꞌ llia kollꞌbaꞌ gok ḻoo nee goneꞌ ka bich soalen ljwell beṉꞌ yell-lioni mbalaz naꞌ wit ljwellgakeꞌ. Naꞌ biꞌeneꞌ to spad xen.
5 Naꞌ ka bxoxj Beenaꞌ Zaklebi to Xilꞌdoꞌ sey de wyoṉinaꞌ, benidꞌ wna beṉꞌ wyoṉinaꞌ len ladj beṉꞌkaꞌ tap:
―Nilə da, naꞌ bwia dga.
Naꞌ bwiaꞌ naꞌ bleꞌidꞌ to kabay gasj. Naꞌ beenaꞌ llia kollꞌbaꞌ nox̱ee to xigꞌlibr.
6 Naꞌ benidꞌ wṉe to beṉꞌ ladj beṉꞌkaꞌ tap, chiꞌe:
―Gonoꞌ ka sakꞌ c̱hop ya trígonaꞌ c̱he shlla llin, naꞌ x̱op ya cebádanaꞌ c̱he shlla llin, naꞌ bi wwalꞌ wsiloꞌ setaꞌ ni vinonaꞌ.
7 Naꞌ ka bxoxj Beenaꞌ Zaklebi to Xilꞌdoꞌ sey de wdapinaꞌ, benidꞌ wna beṉꞌ wdapinaꞌ:
―Nilə da, naꞌ bwia dga.
8 Naꞌ bwiaꞌ, naꞌ bleꞌidꞌ to kabay, ba te, naꞌ beenaꞌ llia kollꞌbaꞌ lieꞌ Yeḻꞌ Wit. Naꞌ daa le Hadesa zjanon ḻeꞌ. Naꞌ gok lo nagakeꞌ witgakeꞌ to kwart beṉꞌkaꞌ lleꞌ yell-lioni lo wdiḻ, lo wbin, lo yillweꞌ naꞌ lao ba zṉiakaꞌ.
9 Naꞌ ka bxoxj Beenaꞌ Zaklebi to Xilꞌdoꞌ sey de gayiꞌnaꞌ, bleꞌidꞌ to dii nak ka ganaꞌ chzeygakeꞌ diikaꞌ chjwaꞌgakeꞌ lao Chiozaꞌ, naꞌ xṉiꞌayinnaꞌ lleꞌ beṉꞌkaꞌ betgakeꞌ ni c̱he choꞌa xtillꞌ Chiozaꞌ, naꞌ daa bi bsangakeꞌ weꞌgakeꞌ xtilleenaꞌ.
10 Naꞌ wṉegakeꞌ zillj inlleb, cheꞌgakeꞌ:
―Chios, liꞌ nakoꞌ X̱anntoꞌ. Nakoꞌ dowalj beṉꞌ ḻi beṉꞌ shaoꞌ naꞌ nakoꞌ beṉꞌ chon yogꞌ dii chc̱heboꞌ, ¿bat gonoꞌ yeḻꞌ josc̱his c̱he beṉꞌkaꞌ lleꞌ yell-lionaꞌ naꞌ yiziꞌo wzon daa betgakeꞌ netoꞌ?
11 Naꞌch biꞌe twej xa xtilgakeꞌ, naꞌ golleꞌ ḻegakeꞌ kwezgakeꞌ ziꞌ xtit ax̱t ki yizaa yibab beṉꞌkaꞌ nakgakeꞌ txen, beṉꞌkaꞌ ziꞌ witgakeꞌ daa choeꞌgakeꞌ xtillꞌ Chiozaꞌ.
12 Naꞌ ka bxoxj Beenaꞌ Zaklebi to Xilꞌdoꞌ sey de wxopinaꞌ, bleꞌidꞌ gok to bedxoꞌ xen wal. Naꞌ wbillaꞌ biyakan dii gasj ka lechꞌ gasj daa chakw beṉꞌ katꞌ chet to bishꞌ ljwelleꞌ. Naꞌ doxen beoꞌdoꞌnaꞌ biyakan dii xṉa ka chen,
13 naꞌ bllib beljdoꞌkaꞌ llia xan yabanaꞌ, bxopgakan lo yell-lionaꞌ ka chxop yix̱wew yaa katꞌ chta beꞌ walaꞌ xyaguinnaꞌ.
14 Naꞌ yabanaꞌ bidobḻoḻan ka chidob to yish, naꞌ yogꞌḻoḻ yaakaꞌ naꞌ yogꞌḻoḻ yell-liodoꞌkaꞌ llia lo nisdoꞌnaꞌ bllaꞌ xishnaꞌinkaꞌ.
15 Naꞌ beṉꞌkaꞌ chṉabiaꞌ lo yell-lioni, naꞌ no beṉꞌ zakii, naꞌ no beṉꞌ wniꞌa, naꞌ no x̱an soldadkaꞌ, naꞌ no beṉꞌ mbejlawin, no beṉꞌ ndoo lla yel choneꞌ xshin beṉꞌ naꞌ no beṉꞌ chon xshinkzeꞌ, jakwashꞌgakeꞌ no ḻoo blej, no ladj yajkaꞌ lleꞌ lo yaakaꞌ.
16 Naꞌ cheꞌgakeꞌ yaa yaokaꞌ naꞌ yajkaꞌ: