Yishaꞌ daa ndosꞌ gall sey
5
Naꞌ beenaꞌ llia chṉabiaꞌ nox̱ee lo nee de shḻinaꞌ to yish dii ndobə, naꞌ c̱hop ḻaatenꞌ nyoj. Naꞌ ganaꞌ biyoll bidoban ndosaꞌn gall sey.
2 Naꞌ bleꞌidꞌ to anjl, beṉꞌ nap yeḻꞌ wak xen, naꞌ wṉieꞌ zillj inlleb, chṉabeꞌ:
―¿Notg zakii wxoxjeꞌ seykaꞌ naꞌ wselleꞌ yishaꞌ?
3 Naꞌ kono bllel yabanaꞌ ni lo yell-lionaꞌ, ni xan yell-lionaꞌ, beṉꞌ gak wzesheꞌn naꞌ wwieꞌ bin daꞌn.
4 Naꞌ ḻe wchellchgaꞌ daa kono bllel beṉꞌ zakii wzesheꞌ yishaꞌ naꞌ wwieꞌ bin daꞌn.
5 Naꞌch to beenaꞌ len beṉꞌkaꞌ tapichoa wneꞌ nadꞌ:
―Bich kwelloꞌ, ḻaꞌ beenaꞌ nsiꞌgakeꞌ Bell c̱he Judá daa mbejlaweꞌ lo dia c̱he dii Judánaꞌ, beenaꞌ nak xiiṉ dia c̱he dii Davinaꞌ, ba beneꞌ gan dii malaꞌ naꞌ wak wxoxjeꞌ seykaꞌ gall naꞌ wzesheꞌ yishaꞌ.
6 Naꞌch bleꞌidee zieꞌ gchoḻ ganaꞌ llia beenaꞌ chṉabiaꞌ naꞌ ganaꞌ nec̱hj beṉꞌkaꞌ tap naꞌ beṉꞌkaꞌ tapichoa. Naꞌ bleꞌidee ka to xilꞌdoꞌ, ba betgakeꞌ. Naꞌ llia gall ḻozb naꞌ zi gall jalaob, diikanꞌ nak espíritukaꞌ gall daa nak c̱he Chiozaꞌ daa nseḻee doxen yell-lioni.
7 Naꞌch beenaꞌ bleꞌidꞌ ka xilꞌdoꞌ wbiguee lao beenaꞌ llia chṉabiaꞌ naꞌ wdoyoeꞌ yishaꞌ daa ndobə daa nox̱ee lo nee de shḻinaꞌ.
8 Naꞌ kon ka wdoyoeꞌ yishaꞌ daa ndobə, beṉꞌkaꞌ tap naꞌ beṉꞌkaꞌ tapichoa bc̱hekꞌ xibeꞌkaꞌ lao beenaꞌ bleꞌidꞌ nak ka xilꞌdoꞌ. To togakeꞌ nox̱ꞌgakeꞌ twejə arpa, naꞌ ḻekzkaꞌ nox̱ꞌgakeꞌ barser de or yoogakan yalaꞌ daa chzeygakeꞌ, naꞌ llen yalaꞌ zaklebin xtillꞌ beṉꞌkaꞌ nak lallꞌ naꞌ Chiozaꞌ, dillꞌkaꞌ choeꞌlengakeꞌneꞌ katꞌ choeꞌḻwillgakeꞌneꞌ.
9 Naꞌ beḻgakeꞌ to dii kob dii chgoon ḻeꞌ balaaṉ, naꞌ ki nan:
Linꞌ chidoḻoo gox̱oo yishi ndobə naꞌ wxoxjoꞌ seykaꞌ, daa betgakeꞌ liꞌ,
naꞌ daa blalj xc̱henoꞌnaꞌ biyaꞌo biziꞌo
beṉꞌ zaꞌ yogꞌ dia, yogꞌ yell naꞌ yogꞌ nación,
naꞌ beṉꞌ chṉe wde wdeli dillꞌ,
kwenc̱he nakgakeꞌ lo naꞌ Chiozaꞌ.
10 Naꞌ ba nonoꞌ lallꞌ naꞌgakeꞌ iṉabiaꞌgakeꞌ lo yell-lionaꞌ
naꞌ gakgakeꞌ bx̱oz c̱he Chios c̱hechonaꞌ.
11 Naꞌch bleꞌidꞌ anjl zan, naꞌ benidꞌ shiꞌekaꞌ. Nec̱hjgakeꞌ ganaꞌ llia beenaꞌ chṉabiaꞌ len beṉꞌkaꞌ tap naꞌ beṉꞌkaꞌ tapichoa. Naꞌ daa nakgakeꞌ beṉꞌ zan inlleb ni bi wbabidꞌgakeꞌ.
12 Naꞌ wnagakeꞌ zillj nlleb:
Beenaꞌ nak ka xilꞌdoꞌ, beenaꞌ betgakeꞌ,
chidoḻee weꞌntoꞌ xtillee napeꞌ yeḻꞌ wṉabiaꞌ xen,
naꞌ naki c̱heꞌ yogꞌḻoḻ yeḻꞌ wniꞌa dii de,
napeꞌ yeḻꞌ sinꞌ xen naꞌ yeḻꞌ wak choo yeḻꞌ wak xen,
nakeꞌ beṉꞌ zakii nlleb,
naꞌ chidoḻee weꞌlaꞌontoꞌneꞌ naꞌ koontoꞌneꞌ balaaṉ.
13 Naꞌ benidꞌ wṉe yogꞌḻoḻ dii de yeḻꞌ mban c̱heyin naꞌ yogꞌḻoḻ diikaꞌ bx̱e bsil Chiozaꞌ yabanaꞌ naꞌ yell-lioni, naꞌ xan yell-lioni, naꞌ ḻoo nisdoꞌnaꞌ, nagakan:
Beenaꞌ llia chṉabiaꞌ len beenaꞌ nak ka xilꞌdoꞌ,
chidoḻꞌgakeꞌ weꞌlaꞌocho ḻegakeꞌ naꞌ koocho ḻegakeꞌ balaaṉ zejḻi kaṉi,
naꞌ weꞌcho xtillꞌgakeꞌ nakgakeꞌ beṉꞌ zakii nlleb, naꞌ napgakeꞌ yeḻꞌ wak choo yeḻꞌ wak xen.
14 Naꞌ beṉꞌkaꞌ tap nec̱hj ḻeꞌ, nagakeꞌ:
―¡Kanꞌ nakan!
Naꞌ beṉꞌkaꞌ tapichoa bc̱hekꞌ xibeꞌkaꞌ beꞌlaꞌogakeꞌ ḻegakeꞌ.