Choeꞌlaꞌogakeꞌ Chiozaꞌ yabanaꞌ
4
Ka biyoll bzejꞌ diikaꞌ wneꞌ nadꞌ, naꞌ bleꞌdoꞌidꞌ nyalj to puert xan yabanaꞌ. Naꞌ bizenidꞌ bishbenaꞌ daa benidꞌ dii nech daa nen ka ga chbell to trompet, naꞌ wneꞌ nadꞌ:
―Nilə wyep, naꞌ wliidꞌ liꞌ diikaꞌ ziꞌ zaꞌ gak.
2 Naꞌ ka wṉieꞌ nadꞌ, Espíritu c̱he Chiozaꞌ beneꞌ ka bleꞌidꞌ yabanaꞌ ganaꞌ llia to beṉꞌ chṉabiꞌe.
3 Naꞌ beenaꞌ llia naꞌ, chey cheeniꞌchgueꞌ ka yaj wan daa le jaspe naꞌ daa le cornalina. Naꞌ tchoꞌa tlawi ganaꞌ llieꞌ ze to betyaa naꞌ chṉaꞌtitan ka yaj wan daa le esmeralda.
4 Naꞌ ganaꞌ llieꞌ, bleꞌidꞌ nec̱hj zi tapichoa beṉꞌ lliagakeꞌ chṉabiaꞌgakeꞌ, naꞌ zoagakeꞌ do xtil naꞌ nzoa twej corona de or yic̱hjeꞌkaꞌ.
5 Naꞌ ganaꞌ llia beṉꞌ nechaꞌ chep yes, naꞌ chashj chtin, naꞌ chak sshag inlleb. Naꞌ laweꞌnaꞌ ze gall yiꞌ chaḻꞌṉiṉan naꞌ ḻegakannanꞌ espíritukaꞌ gall c̱he Chiozaꞌ.
6 Ḻekzkaꞌ lao beenaꞌ llia chṉabiaꞌ de to dii nak katekzə nisdoꞌnaꞌ naꞌ nakan ka de vidr.
Naꞌ gchoḻ ganaꞌ chiꞌe chṉabiꞌe lleꞌ tap beṉꞌ de yeḻꞌ mban c̱heyin, naꞌ dii zan jalaogakeꞌ llia, ka laoləgakeꞌ naꞌ ka kollꞌləgakeꞌ.
7 Beṉꞌ nechaꞌ nakeꞌ ka bell, naꞌ beṉꞌ wchopinaꞌ nakeꞌ ka gooṉ, naꞌ beṉꞌ wyoṉinaꞌ nak choꞌalaweꞌnaꞌ ka c̱he beṉec̱h, naꞌ beṉꞌ wdapinaꞌ nakeꞌ ka bsia, ba chzo.
8 To to beṉꞌki zoa x̱op wej x̱ilgakeꞌ, naꞌ zoa dii zan jalaogakeꞌ ka ḻoolə naꞌ ka kollꞌlə x̱ileꞌkaꞌ. Naꞌ bi chsangakeꞌ ka waḻ ka tella nagakeꞌ:
Dowalj beṉꞌ ḻi beṉꞌ shaoꞌ, dowalj beṉꞌ ḻi beṉꞌ shaoꞌ, dowalj beṉꞌ ḻi beṉꞌ shaoꞌ, nak X̱ancho Chiozaꞌ,
beenaꞌ nap yeḻꞌ wak choo yeḻꞌ wak xen,
beenaꞌ zoa ka wxe wzil yell-lionaꞌ,
naꞌ ḻekzenꞌ zoeꞌ ṉaa, naꞌ zoakzeꞌ zejḻi kaṉi.
9 Naꞌ beṉꞌkaꞌ tap chgoogakeꞌ balaaṉ beenaꞌ llia chṉabiaꞌ, beenaꞌ mban zejḻi kaṉi. Naꞌ choeꞌgakeꞌ xtillee nakeꞌ beṉꞌ zakii nlleb naꞌ choeꞌgakeꞌneꞌ yeḻꞌ chox̱ken. Naꞌ to to ka chongakeꞌ kaꞌ,
10 beṉꞌkaꞌ tapichoa chc̱hekꞌ xibeꞌkaꞌ lao beenaꞌ mban zejḻi kaṉi naꞌ choeꞌlaꞌogakeꞌneꞌ. Naꞌ chzaḻꞌgakeꞌ corona c̱heꞌkaꞌ laweꞌnaꞌ, nagakeꞌ:
11 Chios, liꞌ nakoꞌ X̱anntoꞌ, naꞌ chidoḻoo koontoꞌ liꞌ balaaṉ naꞌ weꞌntoꞌ xtilloo nakoꞌ beṉꞌ zakii nlleb,
naꞌ beṉꞌ yeḻꞌ wak choo yeḻꞌ wak xen.
Linꞌ bx̱e bsiloꞌ yogꞌḻoḻte dii de,
naꞌ daa goklalloo soagakan, bx̱e bsilgakoꞌn.